Guitar Hero podería sextuplicar en vendas a Rock Band

O máximo responsable de Activision, Bobby Kotick, non conforme con asegurar que o Guitar Hero de Aerosmith xerou máis beneficios que calquera disco do grupo, asegurou durante o XVII Congreso Goldman Sachs Communacopia que a súa franquicia de videoxogos musicais domina o sector de xeito evidente, pois por cada copia do Rock Band de Harmonix, dende Activision venderían 6 copias de Guitar Hero.
Engade que unha das principais vantaxes da súa compañía é que teñen acceso ao 30% da música mundial grazas aos seus acordos coa Universal, aínda que os recursos dedicados a Guitar Hero tamén son moi importantes, xa que hai preto de 2.000 persoas traballando nos distintos procesos do xogo (dende a adaptación das cancións ata a creación de instrumentos) mentres que os seu competidores só terían un par de centos de traballadores nesas tarefas.
Tampouco habería que esquecer que Rock Band ten unha comercialización bastante mala (a súa primeira entrega aínda remata a súa chegada a España este mes, cando xa saíu a súa secuela nos EE.UU.) mentres que Guitar Hero xa ten 6 títulos á venda en todo o mundo (e varios en preparación).