Código Cero - Diario Tecnolóxico de Galicia

Declaración institucional da Xunta de Galicia co gallo do Día Internacional das Telecomunicacións e da Sociedade da Información

2012-05-16T22:22:35Z

A adopción xeneralizada da Internet na sociedade xerou cambios de tal magnitude que hoxe experimentamos o mundo como unha comunidade global, onde as persoas se relacionan de xeito instantáneo e calquera información se difunde velozmente e pode provocar cambios e reaccións en calquera lugar do mundo.
Así, estase a configurar unha sociedade demandante de novas solucións e servizos que poidan dar resposta ás necesidades que trae consigo esta revolución dixital. Unha sociedade cada vez mais dixital que, sen embargo, ten o reto de que ninguén quede excluído. Estar do lado positivo da chamada fenda dixital supón ter mais oportunidades de acceso ao coñecemento, aos mercados, á formación, ao emprego.
E ese é un dos retos fundamentais das Administracións e un dos obxectivos da Axenda Dixital 2014.gal, integrar as TIC en todos os ámbitos da sociedade e facilitar o seu acceso igualitario a todos os galegos. Coa súa posta en marcha en xuño de 2010, Galicia iniciou o camiño do progreso tecnolóxico. Un camiño que permitirá a Galicia facer fronte aos retos da nova sociedade do coñecemento e integrarse definitivamente no novo contexto dixital europeo no horizonte de 2014.
Estamos avanzando pero neste camiño aínda nos quedan moitos pasos por dar. Neste sentido, debemos seguir traballando e esforzándonos por configurar unha administración máis moderna e eficiente, que poida dar resposta ás esixencias tecnolóxicas da nosa cidadanía, así como ser capaz de paliar os innegables efectos da crise que está a acontecer.
En Galicia estamos a por os medios para ocupar o lugar que nos corresponde na sociedade de información, en primeiro lugar, achegando as infraestruturas de telecomunicación a toda Galicia co obxectivo de ter, por primeira vez, unha Comunidade totalmente conectada en 2014. E estamos cumprindo obxectivos, dotando xa de posibilidade de conexión á rede ao 60% da poboación que hai dous anos carecía deste servizo e estendo ás redes máis punteiras ás que xa teñen acceso preto dun millón de galegos.
O despregamento de infraestruturas modernas e sustentables a través do Plan de Banda Larga é só unha parte desta Axenda Dixital pero é a base sobre a que se desenvolven todas as actuacións dirixidas ao ámbito das telecomunicacións, á modernización administrativa, á dinamización da sociedade da información e ao impulso do sector empresarial das novas tecnoloxías.
O obxectivo de esta estratexia tecnolóxica global é contribuír ao desenvolvemento económico e social de Galicia, é ambicioso pero irrenunciable, imposto pola propia e vertixinosa evolución das TIC.
A coincidencia coa celebración do Día das Letras Galegas é tamén un bo motivo para lembrar os instrumentos que proporcionan as novas tecnoloxías para impulsar o coñecemento da cultura galega no mundo. Neste sentido, a Xunta está a contribuír á difusión da nosa identidade na Rede, colaborando en iniciativas como a candidatura do dominio .gal na Internet.
Sen dúbida, a Rede constitúe unha excelente plataforma para impulsar o coñecemento de Galicia no mundo e tamén unha fiestra á que todos os galegos debemos ter a posibilidade de asomarnos.

Novo número da nosa edición impresa

Marcus Fernández — 2012-05-16T21:47:00Z

Para celebrar o Día Mundial das Telecomunicacións e da Sociedade da Información (tamén coñecido como Día da Internet) e do Día das Letras Galegas quixemos achegar un novo número da nosa edición impresa, dispoñible de balde nunha completa rede de puntos de distribución, podendo tamén descargarse en formato PDF.
Aparte de tratar os temas relativos ás celebracións que coinciden no 17 de maio, tamén abordamos outros asuntos como os seguintes:
Crónica da pasada edición de Xuventude Galicia Net
Preséntase o Plan de Software Libre 2012
Repaso ao pasado e ao futuro da Axenda Dixital 2014.gal
Resumo das xornadas sobre Administración Electrónica do CPEIG
O COETG celebra o Día da Internet reivindicando o papel da muller
A cultura galega faise forte no contorno dixital
Chévere e Rede Nasa acadan un grande éxito con Amores Prohibidos 2.0
En marcha unha web e un documental sobre os voluntarios do Prestige
Entrevista ao profesor e blogueiro Enrique Dans
Todo sobre a Trasnada 2012

Halo 4 terá unha edición especial moi completa

Marcus Fernández — 2012-05-16T20:45:00Z

A franquía estrela da Xbox 360 vai volver en forma dunha nova triloxía que botará a andar o vindeiro 6 de novembro, data na que chegará ás tendas Halo 4, xogo que pasará do popular estudo Bungie a ser desenvolvido por 343 Industries, continuando a historia do Xefe Mestre, que regresará para enfrontarse aos seu destino e a un antigo mal que ameaza o universo enteiro. Promete unha campaña máis épica que as anteriores e con máis elementos de exploración, así como un modo multi-xogador revolucionario.
Confiando nos xogadores incondicionais que van reservar o xogo antes do seu lanzamento, adiantan que vai contar cunha edición limitada de auténtico luxo, que nos EE.UU. custará 99,99 dólares, e que incluirá o acceso a 9 mapas descargables que están programados para despois da saída do xogo, acceso anticipado a 6 especializacións (que permitirá personalizar os personaxes e desbloquear novas opcións), peles para a armadura do Spartan-IV e o rifle de asalto, o UNSC Infinity Briefing Packet, accesorios para o avatar de Xbox LIVE e unha versión estendida de 90 minutos da serie de acción real Forward Unto Dawn, que estrearase en liña en outubro.

Novo vídeo no que presentan a portada oficial do xogo

Ata o domingo será posible xogar de balde a Star Wars: The Old Republic

Marcus Fernández — 2012-05-16T20:29:00Z

Dende este xoves, e ata o vindeiro domingo celebrarase unha longa fin de semana no xogo Star Wars: The Old Republic, na que será posible xogar de balde a este título masivo en liña para todos os que non probaron este xogo anteriormente, de xeito que os usuarios que gocen da experiencia poderán adquirir o xogo despois da proba conservando os personaxes que creen nos vindeiros días.
Para acceder a esta fin de semana de proba non é preciso introducir datos de tarxeta de crédito, poderá xogarse de xeito ilimitado durante 4 días, será posible chegar ata o nivel 15 dentro do xogo e explorar os mundos de orixe de cada clase de personaxe (así como o mundo capital da facción elixida) e tamén será posible acceder a algunhas das zonas de combate nas que enfrontarse a outros xogadores.


Durante a vindeira fin de semana poderá xogarse de balde a este interesante xogo en liña que é o único competidor de peso do World of Warcraft

Toshiba presenta un tablet con pantalla de 13,3 polgadas

Marcus Fernández — 2012-05-16T20:01:00Z

Toshiba anunciou estes días unha nova gama de tablets co sistema operativo Android 4.0 e pantallas de distintos tamaños entre os que destaca especialmente o Rezga AT830, que presenta unha pantalla IPS de 13,3 polgadas cunha resolución de 1.600 x 900 píxeles, procesador nVIDIA Tegra 3 a 1,4 GHz, 1 Gb de RAM, 64 Gb de almacenamento interno (ampliable mediante tarxetas SD), cámaras de 5 e 2 Mpíxeles, Bluetooth 3.0, Wi-Fi N, saída microHDMI, USB 2.0, unhas medidas de 343,8 x 211,3 x 9,9 milímetros e un peso de 1 quilogramo, que se ben podería ter certo atractivo para os usuarios que queiran unha pantalla de grande tamaño, a súa resolución pode decepcionar (xa hai tablets con Android con pantallas Full HD) e o seu prezo de 80.000 iens (782,18 euros) parece excesivo. Do que si pode presumir é de ser capaz de reproducir vídeo durante 13 horas seguidas, o que é todo un logro para unha pantalla de grande tamaño.


O Toshiba Rezga AT830 ten unha cámara traseira de 5 Mpíxeles

Un proxecto propón unha solución discreta para conectar dispositivos electrónicos á corrente

Marcus Fernández — 2012-05-16T19:09:00Z

Os múltiples que facilitan a conexión de distintos dispositivos electrónicos non destacan pola súa estética e versatilidade, ao que responden cun orixinal proxecto que busca financiamento a través de Kickstarter e que pretende facer realidade un concepto chamado Plugbook, que sería un prolongador de corrente que incluiría 2 enchufes ordinarios, 2 portos de carga USB de 1 amperio, protección contra o sobrecalentamento e un cable de corrente de 3 metros que pode enrolarse no interior da súa carcasa de 243 x 153 x 55 milímetros que presenta unha forma semellante á dun libro, o que facilita a súa ocultación cando non está en uso. Deste xeito, o Plugbook podería gardarse no estante do salón entre libros de xeito discreto, de xeito que estaría accesible para cando precisásemos conectar a corrente algún dispositivo electrónico ou cargar por USB móbiles e tablets.
O produto pretende venderse a usuarios finais por 29,95 dólares, pero os que apoien o proxecto poderán facerse con algún dos primeiros plugbooks de cor branca por só 20 dólares (gastos de envío incluídos), mentres que de non estar entre os 200 primeiros mecenas será posible adquirir un Plugbook branco, negro ou dunha terceira cor (que decidirán os usuarios por votación) por 25 dólares (19,63 euros). Tamén estará dispoñible unha edición especial en cor vermella por 10 dólares máis, e quen desexe adquirir lotes destes accesorios poderá beneficiarse de descontos.


O Plugbook pode camuflarse entre libros dun xeito discreto


O Plugbook agocha no seu interior un cable de 3 metros


O Plugbook conta con 2 tomas de corrente e 2 conectores USB de 1 A

Máis da metade dos fogares galegos teñen contratada unha liña de banda larga

Redacción — 2012-05-16T18:22:01Z

Máis da metade dos fogares de Galicia (51,6%) teñen contratada a conexión a Internet mediante banda larga, un 11% máis que no ano 2010, segundo os últimos datos do INE 2011. As principais formas de conexión a Internet a través de banda larga na Comunidade son o ADSL (o 55,6% dos fogares con conexión a Internet) e o cable/fibra óptica (28,4%). Entre as vivendas que dispoñen de acceso a Internet en Galicia, un 18,7% accede mediante conexión móbil de banda larga, o que supón o 5,6% máis que a media estatal.
Por outra banda, a porcentaxe de galegos con posibilidade de contratar o servizo de Internet sitúase hoxe no 90% fronte ao 70% de 2009. Este incremento do 20% na accesibilidade á rede nos últimos dous anos foi posible grazas ás actuacións desenvolvidas no marco do Plan de Banda Larga da Xunta de Galicia.
O ritmo de crecemento de Galicia é superior á media estatal en varios indicadores sobre equipamento e uso das TIC pero non se acada a converxencia coa media estatal debido, principalmente, ao envellecemento e dispersión poboacional xunto coa súa singular orografía.
Así, en Galicia, o 34,5% da poboación ten máis de 55 anos fronte ao 27,7% de España e as 7 grandes cidades de Galicia só concentran o 35,7% da poboación. Isto unido a unha retrasada posición de partida en 2009 con preto de 800.000 galegos sen posibilidade de acceso á Rede fan que Galicia sega ocupando as últimas posicións no conxunto do Estado. Esta situación estase a reverter paulatinamente grazas ao Plan de Banda Larga que a día de reduciu en máis de 460.000 os galegos sen cobertura.

A empresa galega Ayco Internet acudiu ao BlackBerry World 2012 invitada por RIM

2012-05-16T18:01:00Z

Ayco Internet, empresa tecnolóxica especializada en desenvolvemento de solucións de mobilidade, foi unha das poucas galegas que puido acudir a un dos principais eventos de tecnoloxía móbil deste ano, o BlackBerry World Congress (BBW). Este congreso, celebrado entre o 1 e o 3 de maio en Orlando, converteuse no centro mundial das ideas e dos avances relacionados con BlackBerry e coa mobilidade en xeral, reunindo a empresas, provedores de servizos, operadores, desenvolvedores e todos aqueles elementos relacionados co ecosistema BlackBerry a nivel mundial.
Unha das principais novidades do congreso foi o avance da tecnoloxía NFC, que xa se incorpora a todos os novos terminais de BlackBerry para lograr que o seu uso sexa cotián, superando incluso ao Bluetooth. Deste xeito, vincularíase definitivamente mundo físico e o virtual e transformaríanse os smartphones en plataformas de comunicación máis intelixentes.

Novo sistema operativo

Durante o BBW tamén se presentou BlackBerry OS 10, o seu novo sistema operativo para terminais que se presentou como o máis avanzado dos existentes actualmente grazas ao nivel de prestacións que ofrece. Durante as sesións organizadas durante o congreso, analizáronse os beneficios e vantaxes de crear aplicacións e xogos para a nova plataforma, revisando puntos como a monetización, diferenciación e futuros desenvolvementos e melloras. Este sistema operativo está moi enfocado ao mundo dos desenvolvedores, xa que durante todo o congreso puidéronse probar xogos, demos e aplicacións creadas con BlackBerry OS 10. Concretamente, RIM deu acceso ás betas a diferentes desenvolvedores para que no prazo de 2 ou 3 semanas presentaran no BBW aS súas realizacións e, realmente, comprobouse que o acabado das mesmas era máis que satisfactorio.
Entre a multitude de conferencias que se desenvolveron ao longo destes tres días, tamén houbo tempo para debater sobre redes sociais. Así, incidiuse na idea de que, na actualidade, a porcentaxe de persoas que interactúan en redes sociais a través do móbil supera amplamente aos que acceden desde PC ou portátil, o que dá aínda máis relevancia ao concepto de real time is not faster enough, que debe ser unha prioridade á hora de xestionar a túa imaxe dixital.

Ayco Internet e as solucións móbiles empresariais

Ayco leva máis dunha década dedicada a desenvolver solucións tecnolóxicas que faciliten o traballo dos seus clientes, o seu capital é 100% galego, é Best Partner de Vodafone para solucións móbiles e o vindeiro sábado poderemos escoitar ao seu xerente, Fernando Campos, no programa Banda Ancha da Radio Galega, dando algúns detalles sobre o que puido verse na pasada edición do BlackBerry World.

LG personalizará os seus móbiles con Android 4.0

Marcus Fernández — 2012-05-16T17:49:00Z

LG Electronics presentou hoxe a nova interface de usuario que vai introducir nos seus novos móbiles con Android 4.0 e que chamarase Optimus UI 3.0, integrando en terminais como o LG Optimus LTE II e o LG Optimus 4X HD novas funcionalidades personalizadas polo fabricante, como xeito de diferenciarse dos seus competidores (Samsung e HTC tamén engaden unha capa de personalización os seus dispositivos con Android).
O Optimus UI 3.0 está deseñado buscando a simplicidade e a comodidade e entre as súas novidades estarán a posibilidade de desbloquear o móbil cun desprazamento en calquera lugar da pantalla, poderanse colocar as funcións máis utilizadas (como a cámara) unha vez que se desbloquea o terminal, poderanse disparar fotografías mediante ordes orais, a cámara pode disparar a refoladas para elixir a mellor toma, será posible empregar fotografías propias como iconas e imaxes de atallo, contarase cunha categoría no menú para organizar de xeito doado as descargas, como prestación estrela, teremos unha ferramenta chamada Quick Memo, que permitirá tomar notas na pantalla empregando o dedo.

As empresas da Tecnópole aumentaron a facturación en 44,1 millóns de euros

Redacción — 2012-05-16T17:07:01Z


Os empresarios da Tecnópole reunidos esta semana coa directora do complexo, Luisa Pena

A Tecnópole de Ourense (o Parque Tecnolóxico de Galicia) vén de facer recontos dos éxitos acadados polas súas empresas ao longo de 2011, uns éxitos que se sitúan a contrapelo da tónica crítica que afecta a unha boa parte dos sectores produtivos e que confirma, unha vez máis, que a clave está na innovación e no coñecemento. Así, segundo informan fontes da Tecnópole, as súas empresas incrementaron o seu volume de negocio en 44,1 millóns de euros durante 2011 con respecto ao exercicio anterior. “A facturación total pasou dos 170,8 millóns contabilizados ao peche de 2010 aos 214,9 millóns rexistrados en 2011, o que supón un aumento do 25,7%”, engádese.
No que atinxe ao emprego, o ano pasado creáronse 139 empregos sobre os 1539 cos que se pechaba o exercicio anterior.
A directora da Tecnópole, Luisa Pena, parabenizou aos empresarios por estes logros, “especialmente meritorios tendo en conta o contexto de crise, o que demostra que a aposta pola innovación que caracteriza a actividade que aquí se desenvolve é unha aposta sólida e segura”, sinalou.
Pena apuntou tamén que, sumando a facturación da sociedade xestora á das empresas, o volume de negocio total da Tecnópole en 2011 acadou os 216,9 millóns de euros. Ademais, lembrou (na súa cita cos empresarios) que a sociedade xestora logrou incrementar nun 21,4% os seus ingresos durante o pasado exercicio, mantendo a facturación por servizos e alugueres e incrementando o financiamento para a realización de proxectos, ademais da súa actividade como entidade colaboradora do Ministerio de Economía e Competitividade para tramitar as axudas a empresas instaladas en parques científicos e tecnolóxicos.

Queremos Galego defende a lingua nas redes sociais con motivo do Día das Letras

Fernando Sarasqueta — 2012-05-16T17:06:44Z

A plataforma Queremos Galego pecha fileiras esta semana para a celebración do Día das Letras Galegas, este xoves 17 de maio, e para toda a serie de actividades que se desenvolven horas antes e que se seguirán a desenvolver unha vez que pase a xornada. Entre as accións máis salientábeis dende o punto de vista dixital (a cuestión central en Código Cero, onde amais das letras tamén conmemoramos o Día da Internet, tamén o 17 de maio) figura unha mobilización nas redes sociais: no Facebook e máis no Twitter coa etiqueta #17Mqueremosgalego.
A idea, informa a plataforma para a defensa do idioma, é amosar a meirande influencia posíbel da manifestación e botar unha man complementaria (virtual) “á marea humana que vai asolagar Compostela o día 17 co obxectivo de defender a lingua”.
Queremos Galego é unha plataforma cidadá conformada por entidades de diversos ámbitos e por persoas a título individual. Nace da vontade colectiva de articular unha gran resposta social a prol da lingua propia do noso pobo, o galego.

Un novo vídeo amosa máis detalles de The Last of Us

Marcus Fernández — 2012-05-16T17:05:00Z

Tras o grande éxito da franquía Uncharted os mozos de Naughty Dog anunciaron hai medio ano un novo título moi prometedor, The Last of Us, que conta a historia de supervivencia de Joel e Ellie nunha viaxe cara o oeste dos duns EE.UU. devastados nos que deberán atopar recursos para seguir con vida e protexerse das ameazas que xorden no seu paso.
O mundo de The Last of Us estará abandonado e desamparado, un lugar brutal e letal, do que cada vez dan máis detalles para captar a atención sobre este xogo exclusivo para PlayStation 3 que, aparte de presentar uns gráficos moi coidados, realizará unha grande aposta pola narración, intentando captar a atención do usuario mediante as sensacións que transmite.
Como novo petisco do xogo veñen de publicar un vídeo no que amosan unha emboscada que tenden aos protagonistas outros superviventes pouco amigables:

No vídeo tamén percibimos un cambio no deseño do personaxe de Ellie, pois os responsables do xogo consideraron oportuno facer que o modelo virtual fose máis semellante á actriz que lle pon voz (Ashley Johnson).


The Last of Us presenta un mundo totalmente desamparado


Joel e Ellie deberán sobrevivir nunha viaxe a través dos EE.UU. en The Last of Us

INEO organiza un curso sobre Xeración de novos modelos de negocio no sector TIC

Raquel Noya — 2012-05-16T12:29:02Z


A directora xeral de INEO, Lucía Gregorio, vai ser a encargada de impartir este curso, que consta de 5 sesións

Dende a asociación de empresas do sector TIC galego, INEO, afirman (con coñecemento de causa) que a actualidade demanda que as firmas do sector tecnolóxico estean preparadas para asumir cambios con rapidez, e coñezan as ferramentas e metodoloxías que lle permitan avaliar cando é o momento de levar a cabo modificacións, ou se o modelo de negocio que aplican é o máis correcto e axeitado a cada circunstancia.
Esta asociación, que dende a súa formación velou sempre por mellorar o rendemento das empresas TIC do país, sabe que este labor pasa por mellorar primeiro a capacitación de traballadores e empresarios tanto dende o punto de vista técnico como metodolóxico, algo que ten pensado levar a cabo no vindeiro curso formativo que vai celebrar en Vigo, e que impartirá a directora xeral de INEO, Lucía Gregorio.
Trátase dun Curso sobre Xeración de novos modelos de negocio para empresarios e traballadores do sector TIC, que se impartirá na sede de Ineo tódolos xoves do mes, entre as 18.00 e as 20:00 horas, e que dará comezo a partir do 24 de maio ata o 21 de xuño.
Tomando como referencia a metodoloxía do libro Xeración de modelos de negocio, de Alexander Osterwalder & Yves Pigneur, Lucía Gregorio achegará exemplos de metodoloxías que poden servirlle ás empresas “como base para analizar as súas estratexias de negocio actuais”, afirma, “o que lles permitirá crear novas maneiras de facer empresa para alcanzar e consolidar unha posición competitiva no mercado actual”, engade.
As sesións de formación están orientadas, sobre todo, a directores xerais e empresarios do sector TIC, así como a directivos de estratexia e CEOs.
O curso é de asistencia gratuíta para empresas socias de INEO e ten un custo de 120 €+ IVE para empresas non asociadas. As prazas son limitadas e a inscrición pode realizarse no teléfono 986 112 570 e a través do correo electrónico ineo@ineo.org.

Un buscador intelixente destapa as comisións e recargos ocultos dos voos

Raquel Noya — 2012-05-16T11:47:40Z

A firma catalá Trabber.com, con sede en Cornellà de Llobregat (Barcelona), vén de crear unha ferramenta de busca de voos na Rede, que ademais de dar co voo máis barato de entre todas as compañías operantes, trata de ofrecer o prezo final sen cargos de última hora nin comisións ocultas, é dicir, o prezo real dende o primeiro momento.
Sobra explicar os motivos que levaron a esta empresa a desenvolver tal buscador, pero o certo é que o usuario potencial atopará unha aplicación doada de usar, moi funcional e intuitiva, e sen contidos adicionais que despistan a súa atención da información que precisa.
Trabber.com fai rastrexos nun total de 86 webs entre aeroliñas, axencias de aluguer de coches e centrais hoteleiras, coa finalidade de dar coa mellor oferta, e co beneficio engadido de que dende o primeiro paso súmalle ao prezo total o prezo por maleta, os recargos por tarxeta de crédito, os gastos de xestión... de maneira que o usuario non perde o tempo con ofertas supostamente interesantes que logo resultan ser un timo, nin se fai ilusións con prezos moi reducidos e mesmo irrisorios as máis das veces.
Esta ferramenta virtual tamén permite que os usuarios creen as súas propias carpetas de prezos e ofertas, e mesmo que compartan opinións con outros usuarios da web; a maiores, como buscador intelixente que é, “aprende” das buscas que fai o usuario e optimiza os resultados en función das súas costumes e necesidades.
Por certo, que Trabber.com xa afirma ser “o primeiro buscar en incorporar a compañía Iberia Express”, que despois de tanta polémica comezou a operar o pasado 25 de marzo.
Trabber.com tamén lle permite ao internauta interactuar coa compañía a través de Twitter, pedindo ofertas para un voo concreto que o persoal contesta de xeito automatizado e ao instante. Para usar esta plataforma é necesario enviar un tweet a @trabber_ofertas.

Os enxeñeiros galegos en Informática celebran o Día de Internet cunha declaración institucional

Redacción — 2012-05-16T09:36:46Z


Fernando Suárez, presidente do CPEIG

O Colexio Profesional de Enxeñaría en Informática de Galicia, CPEIG, quere celebrar a coincidencia festiva do 17 de maio, especialmente relevante para a cidadanía galega (xa que se celebra o Día das Letras Galegas, o Día de Internet e o Día das Telecomunicacións), cunha declaración institucional na que se nos convida, colectivamente, a festexar o coñecemento e tódalas innovación tecnolóxicas que xurdiron arredor del, en boa medida representativas das mellores creacións do ser humano ao longo da historia.
Precisamente a historia e a información achegada polo home dende que se comezaron a rexistrar datos, na orixe das civilizacións, constitúe o eixe temático principal da declaración. Reproducímola aquí na súa integridade.
O ser humano xerou, desde o principio da súa historia ata o ano 2003, uns cinco exabytes de información, é dicir, cinco mil millóns de xigabytes, segundo os cálculos de IBM. O ano pasado, 2011, xeramos aproximadamente ese mesmo volume de información cada dous días; o vindeiro ano 2013 xeraremos esas mesmas cantidades cada dez minutos.
Sen dúbida, a proliferación de dispositivos móbiles, dentro da que o noso país figura nas primeiras posicións a nivel mundial, xunto coa propia natureza relacional do ser humano, fai que a ubicuidade do acceso á Rede sexa unha realidade que contribúe a esa inxente xeración de información. Dita realidade fomenta o auxe de novas disciplinas que xerarán innovación e emprego nos vindeiros anos, como son o caso de Big Data, Open Data ou a Internet das Cousas, da que oiremos falar decote nos vindeiros meses.
Desde o CPEIG consideramos necesarias unha educación e concienciación a todos os niveis para evitar aumentar -e mesmo atallar- a fenda existente non só entre xeracións, senón tamén entre distintos colectivos sociais por razóns de ingresos, situación xeográfica ou xénero en canto ás TIC se refire.
Polo tanto, é fundamental a participación feminina en todos os niveis da tecnoloxía: como usuarias, como emprendedoras, como xeradoras de innovación e como líderes dun sector que ten a responsabilidade e o compromiso de ir á cabeza da saída da actual crise.
A igualdade de xénero é un dereito humano básico consagrado na Carta das Nacións Unidas e unha das principais metas dos Obxectivos de Desenvolvemento do Milenio (ODM) das Nacións Unidas. Debemos ser conscientes de que as TIC son ferramentas que poden acelerar o progreso cara ao logro deses obxectivos.
O enfoque deste ano do Día Mundial da Internet, “As mulleres e as nenas nas TIC”, vai dirixido a garantir que esa importante metade feminina da poboación mundial avance cara á igualdade real.
O CPEIG únese a ese enfoque subliñando que a muller debe ocupar un lugar central na Sociedade da Información e do Coñecemento; só así se poderá garantir unha tecnoloxía e unha sociedade verdadeiramente igualitarias.

Preto do 70% dos habitantes da Terra Chá teñen cobertura de Internet de banda larga

Redacción — 2012-05-15T21:32:26Z

O Plan de Banda Larga de Galicia permitiu que preto do 70% dos habitantes da comarca da Terra Chá conten xa con acceso á internet de calidade, de cando menos 2 Mbps de velocidade, segundo datos que deron a coñecer no día de hoxe en Vilalba, co gallo da visita ao municipio chairego do Roadshow Movistar Galicia, que está a achegar as vantaxes e utilidades do emprego de internet entre a poboación rural.
A xefa territorial de Presidencia da Delegación Territorial de Lugo, Marta Barreiro, acompañada polo concelleiro de Deportes de Vilalba, Jesús Bermúdez, visitou as instalacións da devandita aula móbil e indicou que se están a “cumprir os obxectivos no desenvolvemento do Plan de Banda Larga” e subliñou que a incidencia deste plan nótase na cobertura que permitiu en zonas de dispersión xeográfica como algúns concellos desta comarca, nos que grazas as actuacións incluídas neste plan se multiplicou a porcentaxe de poboación con acceso de calidade a rede de redes.
O Plan de Banda Larga está a ser un piar fundamental para facilitar a superación do illamento xeográfico, segundo expuxo Barreiro, que resaltou os froitos da aposta tecnolóxica da Xunta, que xa ten permitido garantir Internet a preto do 30% dos veciños da Terra Chá que non tiñan acceso á rede.
No caso de Vilalba, indicou a xefa territorial, o Plan de Banda Larga proporcionou cobertura a preto de 2.100 habitantes que carecían de conexión a Internet, o que supón que preto do 91,5% dos vilalbeses dispoña xa de cobertura de calidade. As previsións do departamento autonómico é que esta chegue á práctica totalidade do concello a finais de 2013, empregando conexión vía satélite nos lugares de máis difícil acceso.
Para o caso en xeral da comarca chairega a mellora de cobertura débese aos despregamentos de redes fixas (ADSL) e redes sen fíos (3G) do Plan levados a cabo por Telefónica. Cómpre salientar que se trata dun plan a catro anos, así estímase que ao remate do ano 2013 a práctica totalidade da poboación da Terra Chá disporá de acceso ao servizo de banda larga de calidade.

Lenovo presenta un Ultrabook de 14 polgadas de fibra de carbono

Marcus Fernández — 2012-05-15T20:36:00Z

Aos fabricantes de ordenadores está a custarlles colocar no mercado os seus portátiles de deseño delgado coñecidos como Ultrabooks, que buscan competir directamente co MacBook Air de Apple, por resultarlles complicado diferenciarse, o que parece que está a conseguir Lenovo co seu X1 Carbon, que presume de ser o Ultrabook con pantalla de 14 polgadas máis lixeiro do mundo grazas a que emprega fibra de carbono no seu deseño (o que deixa claro no seu nome).
Estamos ante un portátil cunha pantalla de 14 polgadas cunha resolución de 1.600 x 900 píxeles, un grosor de 18 milímetros e un peso de só 1,36 quilogramos que incluso presume dunha autonomía de ata 10 horas de duración que podería cargar o 80% da súa batería en só 30 minutos, e ao que non lle falta a última xeración de procesadores de Intel, a posibilidade de albergar ata 8 Gb de RAM, portos USB 3.0 e miniDisplay Port e lector de tarxetas de memoria. Tamén conta cun curioso teclado retroiluminado resistente ao vertido de líquidos e conectividade 3G, pero polo momento non coñecemos nin a súa data de lanzamento nin o prezo que vai ter, factores que sen dúbida serán cruciais para o seu éxito.

O Kyocera Urbano Progresso chega como un móbil sen altofalantes

Marcus Fernández — 2012-05-15T19:04:00Z

Kyocera anunciou hoxe no Xapón o seu móbil Urbano Progresso, que destaca por aproveitar a transmisión do son a través dos osos (Smart Sonic Receiver) como alternativa aos altofalantes tradicionais, o que facilitaría o seu uso por parte de persoas con problemas auditivos e en ambientes ruidosos. Este curioso móbil non se limita a contar con ese revolucionario sistema, senón que tamén vén bastante ben equipado, cun procesador de dobre núcleo Snapdragon MSM8655 a 1,4 GHz, pantalla OLED de 4 polgadas cunha resolución de 800 x 480 píxeles, 4 Gb de almacenamento interno (ampliable mediante tarxetas microSD de ata 32 Gb), cámaras de 8,1 Mpíxeles e VGA, NFC, batería de 1.500 mAh, unhas medidas de 64 x 125 x 10,8-11,3 milímetros, un peso de 139 gramos e o sistema operativo Android 4.0, polo que pode enfrontarse cara a cara coa meirande parte dos terminais de gama media-alta, contando tamén coa posibilidade de operar baixo redes WiMAX.
O smartphone Kyocera Urbano Progresso estará dispoñible con carcasas de cor laranxa, prata e rosa a través do operador de telefonía KDDI, descoñecéndose polo momento se chegará a saír do mercado asiático.


O Kyocera Urbano Progresso estará dispoñible en 3 cores

Sonic 4 estrea o seu segundo episodio descargable

Marcus Fernández — 2012-05-15T18:06:00Z

SEGA está a comezar a distribución dixital do xogo Sonic the Hedgehog 4 Episode II, que continúa a historia de retorno do ourizo Sonic clásico que se enfronta a varios dos seus inimigos lendarios contando desta volta coa axuda do seu vello amigo Tails. Dende hoxe o xogo pode adquirirse por 12,99 euros a través da PlayStation Network e Steam, mañá chegará a Xbox LIVE Arcade por 1.200 puntos Microsoft e para dispositivos Android con procesador nVIDIA Tegra 3 por 5,49 euros, e para o xoves tamén estreará versión para iPhone e iPad polo mesmo prezo. En xuño teremos versión de Sonic the Hedgehog 4 Episode II para dispositivos con Android en xeral, para estrear tamén versión para Windows Phone no mes de xullo.
Este xogo é unha secuela bastante demorada para atender á resposta dos usuarios do xogo anterior, que resultou un tanto decepcionante, o que explicaría por qué a aposta polo formato descargable continúe a ser moderada por parte da súa editora, e segundo comentarios dos responsables do xogo poderiamos estar ante o derradeiro episodio de Sonic 4.

Trailer de lanzamento do xogo


O xogo supón un cambio profundo con respecto da súa entrega anterior

Minecraft supera o millón de copias vendidas para Xbox 360

Marcus Fernández — 2012-05-15T17:22:00Z

Os xogos descargables non deixan de superar marcas, e tras a excelente acollida de Trials Evolution, agora chega a xente do estudo Mojang encabezada por Markus Notch Persson e consegue converter a Minecraft: Xbox 360 Edition no xogo máis vendido nas primeiras 24 horas en Xbox LIVE Arcade e, para rematar a faena, conseguen superar o millón de unidades vendidas en todo o mundo en menos dunha semana.
O pasado luns o título rexistrara máis de 5,2 millóns de horas de xogo en liña, máis de 4 millóns de sesións multi-xogador e máis de 2,4 millóns de horas muiti-xogador, dando a entender que este xogo que permite construír mundos sen moverse do sofá está a captar tanta atención na Xbox 360 como fixo no seu día na súa versión para PC, onde destacou polos usos imaxinativos que facían os usuarios desta ferramenta tan curiosa.


Cos seus curiosos gráficos e a posibilidade de construír mundos enteiros Minecraft conseguiu labrarse unha sona que parece ser a chave do seu éxito

O HTC Desire C aspira a ser un móbil asumible con Android 4.0

Marcus Fernández — 2012-05-15T16:24:00Z

A familia de móbiles HTC One, pensados como dispositivos de entrada, acolle a un novo integrante, o HTC Desire C, que incluíndo Android 4.0 e a tecnoloxía Beats Audio pretende manterse nunha gama de móbiles a un prezo asumible. A este interesante móbil tampouco lle faltará a personalización de interface HTC Sense 4.0 e 25 GB de almacenamento na nube a través de Dropbox, redondeando un produto con pantalla e 3,5 polgadas cunha resolución de 320 x 480 píxeles, 512 Mb de RAM, 4 Gb de almacenamento interno, cámara de 5 Mpíxeles e incluso un modelo con NFC.
Este interesante novo móbil terá unhas medidas de 107,2 x 60,6 x 11,95 milímetros, un peso de 98 gramos e chegará en 3 cores distintas (vermello, branco e negro). Para facernos unha idea do que ofrecerá, velaquí temos o seu vídeo de presentación:


O móbil estará dispoñible en varias cores entre as que figura o branco

O COETG conmemora o Día das Telecomunicacións reivindicando o papel da muller nas TIC

Fernando Sarasqueta — 2012-05-15T14:35:23Z


Pilar Villaverde, Edita de Lorenzo, Mar Pereira e Ramón Bermúdez de Castro, no acto de divulgación celebrado no CESGA, en Santiago

Para quen non o saiba, o Día das Letras Galegas (17 de maio) é algo máis que unha xornada de festexo da nosa cultura e lingua. É un día para festexar a comunicación, o coñecemento e a igualdade de oportunidades que se xera arredor disto. Para celebrar estas temáticas tan complementarias (letras, Rede, telecomunicacións, igualdade), o COETG/AETG organizou este martes 15 o Foro Dixital As Mulleres e as Rapazas nas TIC, un evento que foi en si unha proba das potencialidades da nova comunicación. Así, malia ter emprazamento físico concreto, a sede do CESGA, estableceu conexión directa con centros escolares (colexios, institutos) da nosa terra, desenvolvéndose nun trasfego de preguntas (das rapazas e dos rapaces) e respostas. Unha das grandes conclusións ás que se chegou foi esta: as TIC, ben usadas, teñen capacidade para tirar abaixo barreiras de xénero.
As propias relatoras presentes no foro foron unha proba disto, ao seren mulleres á par que representantes da primeira liña das TIC galegas. Convocadas polo Colexio Oficial e a Asociación de Enxeñeiros de Telecomunicación de Galicia (COETG/AETG) e coa arela de celebrar o Día Mundial das Telecomunicacións e da Sociedade da Información 2012 (este 17 de maio), participaron no encontro coa mocidade Mar Pereira (directora da Axencia para a Modernización de Galicia, AMTEGA), Edita de Lorenzo (directora da Escola de Enxeñaría de Telecomunicación) e Pilar Villaverde (voceira do COETG). Como dixemos, o acto (que tamén contou coa presenza de Ramón Bermúdez de Castro, decano do COETG), foi retransmitido en streaming e complementado cun chat a través do cal chegou unha chuvia de preguntas sobre o presente e o futuro das TIC, propostas polo alumnado dos centros en conexión, que non quixeron deixar pasar a oportunidade de saber, de primeira man, como se vive unha vez que as novas tecnoloxías deixan de ser só ferramentas do lecer e do estudo para ser, tamén, ferramentas de e para o traballo. De feito, o evento foi un fluxo de dúbidas e resolucións desas dúbidas máis que unha xornada de relatorios propiamente dita. O obxectivo era chamar a atención da mozas/os a través de recursos e modelos de comunicación que elas/es coñecen ben.
A xeira comezou coa lectura dun manifesto, a cargo de Pilar Villaverde, a través do cal o COETG fixo un chamamento á sociedade civil para convidala a tirar partido das TIC a prol da igualdade de oportunidades e, máis polo miúdo, a prol das mulleres e rapazas da nosa terra contra a diferenza de xénero. Ademais, segundo dixo o colexio, “as novas tecnoloxías son unha oportunidade para sermos máis competitivos e para superarmos a crise na que estamos mergullados”. Logo interviñeron Edita de Lorenzo e Mar Pereira, que fixeron fincapé nas moitas posibilidades de traballo que ofrecen os estudos ligados ás novas tecnoloxías da comunicación e da información. Ao tempo, todas salientaron a circunstancia positiva de presidir un foro de maioría feminina, cousa que, dixeron, non é habitual pero que ben pode ser un indicio da materialización definitiva da capacidade igualitaria das novas ferramentas dixitais.
Na rolda de preguntas que serviu de colofón, as temáticas a tratar foron variadas, pero todas xiraron arredor do que lles pode agardar, aos estudantes, en canto deixen de selo e traballen en maior ou menor medida na Sociedade da Información. Houbo preguntas sobre Abalar (o programa para a dixitalización das aulas, que a comunidade escolar semella que desexa estender a tódolos cursos), sobre as orixes das telecomunicacións e do papel da muller no seu seo (que De Lorenzo situou no principio da humanidade), sobre se o sector das TIC é máis machista ca outros (coincidiuse en que é menos, en boa medida porque está nutrido de xente nova que rompe con estereotipos tradicionais que cómpre superar), sobre onde pode atopar traballo un enxeñeiro de Telecomunicacións (a xuízo dos presentes en tódolos sectores, xa que se trata dunha titulación moi transversal), sobre o soldo medio dun enxeñeiro (en liñas xerais ben pagados), sobre a cantidade de computadores que hai nas aulas galegas (agárdase chegar o ano que vén a máis de 44.000), sobre o papel das redes sociais na educación (que poden ser positivas, ben usadas, e así o certifican os proxectos da Universidade de Vigo para procurarlle a vertente máis eficaz e rendíbel).
Asemade, a comunidade escolar tamén amosou o seu interese sobre a porcentaxe que hai na nosa terra de mulleres traballando en postos de dirección ao abeiro das TIC, unha taxa que, coincidiuse, aínda deixa moito que desexar: do 15%. Houbo unanimidade á hora de traballar xuntas/os para amañar esta eiva, empresas, institucións, profesionais e centros escolares e de investigación.
Accións do COETG
Esta celebración enmárcase na axenda de actividades do COETG programadas con motivo do Día Mundial das Telecomunicacións e da Sociedade da Información. Accións entre as que cómpre mencionar a publicación do xa tradicional Manifesto do Colexio Profesional, a conferencia que imparte o día 16 na Escola de Enxeñería de Telecomunicación (EET) de Vigo o profesor da universidade de North Carolina, Michael Devetsikiotis sobre o deseño de redes intelixentes o a publicación da primeira edición en liña da revista do COETG A Nosa Rede o xoves 17.
Os actos de celebración conclúen cunha visita ao aeroporto de Santiago para coñecer as súas infraestruturas de telecomunicacións o xoves día 24 e co xa tradicional V Concerto das Telecomunicacións que terá lugar o venres 1 de xuño no Museo de Belas Artes de A Coruña.

A web da CRTVG achega un percorrido audiovisual pola vida de Paz Andrade

Fernando Sarasqueta — 2012-05-15T13:32:00Z

A CRTVG ten estes días na súa web, dispoñíbel, unha escolma de pezas audiovisuais de valor documental sobre a figura do poeta-empresario homenaxeado este 17 de maio, con motivo do Día das Letras Galegas: Valentín Paz Andrade. A achega da CRTVG, que vén encabezada por un resumo biográfico e polos premios e recoñecementos de índole moi diversa que recibiu o autor galego, inclúe anacos de entrevistas e percorridos audiovisuais pola vida e obra do escritor, como o ofrecido no espazo Eirado o pasado 12 de xaneiro ou a achega especial de Galegos de Honra (do 2002), na súa totalidade dedicado a Paz Andrade.
Tamén se fornece á comunidade internauta do programa da TVG Lembrando na súa voz (1990), que fai un repaso pola biografía do escritor coa súa voz de fondo, ou, aínda nos comezos da CRTVG, o 4 de setembro de 1985, o capítulo específico sobre Paz Andrade do programa divulgativo Galegos. En total, a compañía autonómica mantén estes días na súa páxina web, a disposición dos internautas, oito vídeos relativamente recentes sobre o autor agás un achegamento á súa intervención pública no 1957, en Bos Aires, con motivo do 50 aniversario do Centro Galego da capital arxentina.

O CESGA traballa no desenvolvemento de aulas de informática na nube

Raquel Noya — 2012-05-15T12:26:39Z

O CESGA, en colaboración cos departamentos de Electrónica e Computación, e Física de Partículas da USC, está a desenvolver un proxecto pioneiro para a reciclaxe de recursos computacionais que leva por nome Formiga Cloud, e que permite sacarlle máis partido aos ordenadores das aulas de informática, usándoos de xeito compartido por varios usuarios.
Para o desenvolvemento desta solución, baseada en tecnoloxía na nube, foi preciso empregar algoritmos de planificación avanzados que inclúen técnicas de intelixencia artificial, polo que a entidade máis preparada para facelo non podía ser outra que o Centro de Supercomputación de Galicia (CESGA), que conta coa máis avanzada tecnoloxía para o cálculo integral.
O director do proxecto Formiga Cloud, Javier Cacheiro López, xustifica o desenvolvemento do mesmo pola necesidade do “reaproveitamento” de recursos computacionais existentes en moitas institucións como universidades, institutos, colexios, academias e diversos organismos públicos, “que dispoñen de aulas informáticas nas que se acumulan unha gran cantidade de computadores” e que, “dada a situación economica presente, atopan difícil adquirir novas plataformas de computación”, asegura.
Formiga Cloud permite utilizar mellor recursos computacionais existentes nas aulas de informática, facilitando tanto a realización de probas como a realización de simulacións científicas, empregando equipos remotos.
O proxecto, que inicialmente só buscaba aproveitar os recursos infrautilizados para darlle aos investigadores máis capacidade de cálculo, permitirá ademáis o aproveitamento da infraestrutura cloud para a realización de cursos e outros menesteres.
Con esta plataforma, o profesor ten moita máis flexibilidade á hora de configurar os equipos e crear a contorna axeitada para impartir unha asignatura calquera. O sistema permite despregar ordenadores virtuais no que os e as estudantes poderán modificar a interfaz na que están a realizar o curso, “sen medo a afectar á configuración da aula”, aseguran.
A este ordenador virtual, previamente creado polo profesor, será posible conectarse remotamente, non só dende as aulas de informática ou onde se teñan os equipos, senón tamén dende os ordenadores personais do alumnado.
Do mesmo xeito, o alumnado pode levar nos seus dispositivos de almacenamento unha copia do ordenador virtual e traballar con el no seu propio equipo.
Formiga Cloud permitirá ademais que alumnos situados en aulas que contan con equipos modestos, poidan realizar as súas prácticas de xeito doado sobre máquinas remotas máis potentes, sen necesidade de ter que cambiarse fisicamente de aula, aumentando deste xeito a reutilización dos recursos.
Desta maneira, en palabras de Cacheiro López, “tratamos de acadar o máximo retorno dos investimentos feitos nas aulas de informática”.

Cálculo científico nas aulas de informática
Os investigadores tamén poderán empregar o Formiga Cloud para acelerar a realización de simulacións científicas na nube. Como exemplo deste uso apuntan o caso da USC que só ela dispón de máis de 1.800 ordenadores, os cales poderán usarse de modo compartido para cursos e para realizar simulacións.
O primeiro prototipo do proxecto Formiga Cloud xa está dispoñible na Rede.

Os Premios de Internet 2012 xa teñen finalistas

Raquel Noya — 2012-05-15T12:26:12Z


O senado español acollerá os actos centrais do Día Mundial de Internet

O xurado dos Premios de Internet 2012 vén de facer públicos os finalistas da XIV edición deste prestixioso galardón, que establece categorías de Mellor web, Mellor empresa, Mellor iniciativa e Mellor comunicador, así como un premio á Traxectoria persoal, un premio proposto pola Asociación de Usuarios de Internet, que este ano recaeu en Francisco de la Torre, pola súa contribución a “posicionar a Málaga como a cidade intelixente número un de España, a través da iniciativa Malaga Valley”, afirman.
De entre as 680 candidaturas presentadas, os internautas cos seus votos (máis de 45.790) e os votos do xurado, fixeron finalistas a Eroski Consumer, RTVE á carta e TripAdvisor, na categoría de Mellor Web; a eDreams, Groupalia e SociosInversores, na categoría de Mellor Empresa; a Alberto Burguillo, Enrique Rodal e Manuel Moreno como finalistas de Mellor Comunicador e á Mellor Iniciativa sen ánimo de lucro optan a Fundación Alzheimer, Masdestacados 060 e Saregune.
O Xurado está formado por un elenco de profesionais do mundo das TIC, membros do Comité de Impulso da Oficina Técnica do Día de Internet, que decidirán os gañadores de cada categoría e que o farán público o vindeiro xoves ás 12:30 horas, nun acto que será retransmitido vía streaming a través da canle do Senado, sede central dos actos de celebración deste Día.
Previamente ao acto de entrega destes Galardóns terá lugar o xa tradicional Debate Plenario, Internet para o emprego e o emprendemento, que versará sobre como utilizar a Rede para innovar, xerar emprego e facilitar o emprendemento; e no que a cidadanía poderá aportar as súas reflexións ou propostas, valorar as publicadas por outros e animar o debate nas redes sociais a través do Muro da #innovacion e de Twitter.

Creada unha práctica guía virtual para non perder ningún acto do Día de Internet

Raquel Noya — 2012-05-15T10:48:59Z


Mapa de eventos que achega a web Diadeinternet.org para ollar os actos que se celebran en todo o mundo nesta data

Con motivo do Día Mundial de Internet, que terá lugar dentro de dous días, estanse a organizar centos de eventos en todo o mundo, que van dende accións solidarias, ata cursos formativos, pasando por conferencias, concertos ou mesmo concursos, dos que a web oficial en España, DíadeInternet.org, da detallada conta a través dunha orixinal guía en liña.
A ferramenta é realmente práctica e permítenos aos internautas atopar de xeito doado os eventos ou actividades que mellor se adaptan ás nosas necesidades, ben por proximidade xeográfica, pola entidade que os organiza, por temática, ou polo tipo de público ao que van dirixidos os actos a celebrar en todo o mundo.
Porén hai que recoñecer que, aínda que sería ideal poder desprazarnos ata o punto do planeta no que se celebre un evento interesante para nos, non é algo que estea a altura de tódolos petos (e menos nos tempos que corren) polo que tamén nisto pensaron os creadores da guía en liña e dedicáronlle un apartado especial ás actividades que se retransmiten en directo pola Rede, indicando unha breve descrición, a entidade que a organiza e a ligazón á que hai que acceder para participar.
Países de fala hispana como Arxentina, Bolivia, Colombia, Chile, Ecuador, México, Venezuela, Uruguai, Perú ou, como non, España, decidiron retransmitir algúns dos seus eventos por Internet (un total de 63), para facer partícipes a tódolos internautas que desexen conectarse dende os seus ordenadores en calquera punto do planeta.
Aquí en España destaca a apertura das portas do Centro Demostrador de Fontes Abertas de Albacete, BILIB, a todo o público, para que poidamos gozar das máis modernas infraestruturas tecnolóxicas destinadas á demostración de produtos, contidos e servizos TIC sobre plataformas de software libre.
Tamén destaca a celebración dunha feira-taller sobre ferramentas de utilidade para mellorar as vendas por Internet, que vai dirixido a comerciantes e persoal de servizos e que retransmite a vasca Inguralde dende a súa web.
Pola súa banda, dende Gaudalinfo.es, Innycia Granada vai transmitir en directo a xornada Innovación social e Internet, coa que pecha dúas semanas de intenso traballo, conversa e aprendizaxe conectado entre os proxectos de innovación social activos na Rede.
Outro evento que se retransmitirá en directo pola Rede o vindeiro 17 de maio é o Debate Plenario: #innovacion en Internet para o emprego e o emprendemento, que se celebra no Senado español, sede dos actos centrais do Día Mundial de Internet.
A participación cidadá canalizouse a través do Muro da #innovacion e de Twitter, canles nas que calquera persoa pode aportar unha reflexión ou proposta concreta, valorar as publicadas e animar o debater nas redes sociais. Ademais, todo isto dende calquera dispostivo e en calquera formato.
Xa no noso país, a única proposta achegada para participar en liña é a que vén da man de Peruchela, que a partir das 00:00 do 17 de maio, vai promover e difundir públicamente o baile tradicional galego, que non ten moito que ver co Día de Internet ou co Día da Sociedade da Información e as Comunicacións, pero certo é que cada un coa súa conexión fai o que lle pete.
Aos devanditos actos hai que engadirlle concursos de videoxogos, de deseño, de fotografía, de blogs, de trivial… así como descontos que distintas entidades ofrecen nesta web para que nos aproveitemos deles con motivo deste día tan sinalado no noso país.

Windows 8 permitirá monitorizar o uso do ordenador que fagan os cativos

Marcus Fernández — 2012-05-15T10:29:10Z


Windows 8 mandará por e-mail un resumo da actividade dos menores

Que os nenos medran utilizando ordenadores non é unha sorpresa, pois empregan este tipo de dispositivos para facer os deberes, xogar, comunicarse cos amigos e consultar a web, pero para os pais resulta moi complicado saber se están a facer un bo uso da tecnoloxía, de aí que Microsoft decidise incorporar no futuro Windows 8 unha serie de medidas que permitirán tanto establecer limitacións para o uso do ordenador por parte dos cativos como para supervisar o seu uso.
En Windows 8, ao crear contas de usuario, será posible indicar que un perfil en concreto corresponde a un menor, para activar o filtro de seguridade familiar para tal usuario, o que inicialmente servirá para crear un informe semanal que chegará aos pais por correo electrónico e que resume a actividade do pícaro no ordenador, coñecéndose así informacións como os tempos de uso ou as páxinas web máis visitadas. Estas serían as medidas de seguridade básicas, pois tamén poderían activarse filtros de navegación web (podendo definirse distintos criterios que poden chegar ata permitir só o acceso a unha listaxe branca de páxinas web), activando as buscas seguras (para non atopar contidos adultos nas buscas de textos, imaxes e vídeos), establecendo tempos máximos de uso e bloqueando aplicacións e xogos (incluso facendo que as aplicacións para adultos sexan invisibles na Windows Store).
Dende Microsoft tamén destacan o feito de que os cativos empreguen contas de usuario separadas evita que poidan acceder aos datos persoais dos seus pais (e-mail, documentos...), permiten personalizar a súa configuración sen afectar á do resto de usuarios e impide a descarga de malware (pois non poderán autorizar a súa instalación).
En definitiva, que Microsoft parece estar a tomar moi en serio o uso familiar de Windows 8, o que agradecerán especialmente os proxenitores que queiran certas garantías tanto para o seu equipo como para a súa prole.

Explicación en vídeo das funcións de seguridade familiar de Windows 8


O acceso web tamén pode limitarse mediante distintos filtros

LinkedIn estrea aplicación para Windows Phone

Marcus Fernández — 2012-05-15T10:13:09Z

O número de aplicacións para Windows Phone 7.5 segue en aumento, de xeito que as apps de referencia para dispositivos móbiles están case todas dispoñibles, chegando onte mesmo unha delas: a aplicación oficial de LinkedIn. Estamos ante unha ferramenta que facilita a comunicación con máis de 150 millóns de usuarios de todo o mundo que participan nesta plataforma profesional.
Con LinkedIn para Windows Phone é doado acceder á nosa rede social profesional en mobilidade, consultar as actualizacións en tempo real con novas e información das nosas conexións, ler novas de interese do noso sector, estar ao día dos nosos grupos profesionais, buscar empregos e seguir novas das nosas empresas favoritas.
Dende LinkedIn aseguran que quixeron desenvolver unha das mellores aplicacións para Windows Phone, aproveitando as posibilidades deste sistema operativo móbil e incluso ofrecendo algunhas funcionalidades superiores ás das aplicacións da compañía para iOS e Android.


A aplicación está adaptada á interface Metro de Windows Phone

Os enxeñeiros informáticos, entre os menos afectados polo paro xuvenil, segundo un estudo

Raquel Noya — 2012-05-15T09:12:22Z


Enxeñeiro informático traballando a reo, visto na web trabajadorespublicos.es

O perfil do enxeñeiro en Tecnoloxías da Información e a Comunicación (TIC) “resiste mellor á crise en comparación con outros sectores”. Esta mensaxe esperanzadora para os milleiros de estudantes que se forman nas universidades españolas, é unha das conclusións ás que chegaron na Escola Universitaria Informática Tomás Cerdá, onde, baseándose na análise das saídas laborais do seu alumnado de Grao de Informática e Servizos, aseguran que “o 84% dos alumnos atopan traballo antes de rematar os seus estudos”.
Nesta EU Informática Tomás Cerdá, 8 de cada 10 mozos e mozas colócanse xa nas empresas onde realizaron as súas prácticas, e o resto, segundo indican, atopan emprego nun prazo aproximado de 30 días despois de graduarse; ben a través da súa bolsa de traballo ou ben a través doutras canles de acceso ao mercado laboral.
E é que segundo os últimos datos do Eurostat, os enxeñeiros informáticos están nunha situación privilexiada, cunha taxa de paro dun 7,65%, que contrasta chamativamente coa media estatal, situada no 50,5%.
En palabras de Manel Taboada, coordinador de formación de posgrao da EU Tomàs Cerdà, “o perfil dos enxeñeiros informáticos é un dos máis demandados polas empresas” e mesmo se estima que en 2020 “haberá un déficit de 12.000 enxeñeiros”.
A explicación vén dada porque os enxeñeiros informáticos lideran actualmente os negocios máis innovadores e caracterízanse, segundo Taboada, “por ser persoas con facilidade para a lóxica, a creatividade, o sentido da curiosidade, constancia e capacidada para atopar solucións prácticas”, o que lle facilita moito o labor de atopar traballo ou emprender un negocio.
Asemade, segundo o último estudo da Axencia para a Calidade do Sistema Universitario (ACU), os graduados universitarios en áreas técnicas son os que teñen unha maior correspondencia entre formaión e emprego desempeñado; son tamén os que contan con máis contratos fixos e a xornada completa; e son os que perciben maior soldo; de feito, “entre os exeñeiros hai máis dousmileuristas que mileuristas”, afirman orgullosos.

As persoas inscritas nas listaxes de técnicos sanitarios poden consultar a nota no seu expediente en liña

Raquel Noya — 2012-05-15T08:35:42Z


A directora de Recursos Humanos do SERGAS, Esperanza Fernández Lago, anunciaba a posta en marcha do Expediente-e único do profesional en xullo do pasado ano

O Diario Oficial de Galicia publica hoxe o anuncio polo que se da publicidade ás puntuacións e número de orde das listas de admitidos e excluídos en varias categorías profesionais do SERGAS.
Do mesmo xeito, as persoas que figuren nestas listas e desexen consultar o detalle da súa puntuación ou, de ser o caso, as causas de rexeitamento dalgún mérito, poden facelo a través da consulta en liña do seu expediente electrónico, posto a disposición dos interesados na Rede de xeito totalmente transparente.
Estas son, segundo afirman dende o organismo público, “as primeiras listas con baremación automática que se poden consultar en soporte electrónico” o que permitiu, por outra banda, reducir os prazos de publicación de listas nun 50%.
Dende o inicio do Expediente-e no mes de xullo de 2011 máis de 2 millóns de usuarios accederon a este sistema, creáronse 120.000 expedientes e rexistráronse cerca de 900.000 méritos relativos a experiencia, formación, actividade científica e investigadora, idiomas, etc. Tamén se realizaron 30.000 inscricións nos procesos de recursos humanos abertos.
O SERGAS anunciou que publicará en breve, mediante o mesmo sistema virtual, a listaxe de admitidos e admitidas de PSX, celadores e auxiliares administrativos, cuxo prazo de inscrición rematou o pasado 31 de xaneiro de 2012.

Próxima convocatoria
Asemade, as próximas listas a convocar serán médicos de familia e pediatras, coincidindo, segundo afirman, coa finalización dos MIR.
Xa no mes de maio, a entidade anuncia que publicará, a través da ferramenta electrónica, o concurso de traslados de facultativos especialistas.
A través deste expediente profesional único, todo o persoal que traballa no sistema sanitario público galego poderá ver a súa vida profesional, participar nos procesos e consultar os resultados.

Diablo III estréase esta noite a nivel mundial

Marcus Fernández — 2012-05-14T19:31:46Z

Tras unha longa espera, ao pasar as 12 da noite chegará oficialmente o xogo Diablo III, lanzamento que celebrarase de xeito moi especial en numerosas localidades entre as que se atopa Santiago de Compostela, onde abrirá a tenda de GameStop sita na rúa San Pedro de Mezonzo para atender aos máis impacientes que non queiran agardar á mañá para levar unha copia física deste xogo a casa e pode comezar a batalla por Santuario.
Pero como aínda quedan moitos xogadores habituais que non viviron no seu día o fenómeno de Diablo (a anterior entrega chegou ao mercado hai 12 anos), dende Blizzard van permitir gozar deste título de balde con certas limitacións. Falamos da Starter Edition, que permitirá introducirse no primeiro acto de Diablo III ata acadar o nivel 13, podendo competir só con usuarios da mesma edición e sen poder acceder á casa de poxas con cartos reais. Amais, a Starter Edition terá o seu acceso limitado durante os vindeiros 30 días aos usuarios convidados (os códigos de invitación veñen nas edicións físicas de Diablo III, como xeito de animar aos amigos a competir neste xogo de rol de acción), o que minimiza os problemas de conexión aos servidores do xogo, algo habitual tras lanzamentos desta dimensión, que poden xuntar a centos de milleiros de usuarios simultáneos de todo o mundo.
Para dar a coñecer o que ofrece Diablo III tamén podemos ver o seguinte vídeo en español:


O xogo vai ofrecer unha Starter Edition para que os xogadores poidan iniciarse no mesmo de balde


No xogo poderemos elixir entre 5 clases diferentes

Novo tablet con Android 4.0 e pantalla de 9,7 polgadas

Marcus Fernández — 2012-05-14T19:03:00Z

Continúan a chegar ao mercado tablets co sistema operativo Android que suman boas prestacións para poder alzarse como unha alternativa ao iPad a un prezo máis económico, e o último do que sabemos é o MarquisPad MP977 de Matsunichi, que cunha pantalla de 9,7 polgadas cunha resolución de 1.024 x 768 píxeles (formato popularizado polo iPad) conta tamén cun procesador de dobre núcleo a 1, 2 GHz, 4 Gb de almacenamento interno (ampliable mediante tarxetas microSD), unha autonomía de 5 horas e sistema operativo Android 4.0 quere chegar ao mercado este mesmo mes a un prezo de 249 dólares (194,18 euros).
Pero Matsunichi non quere quedar aí, e xa prepara o seu modelo MP1010 (que contará con pantalla de 10,1 polgadas, procesador a 1,5 GHz e 10 Gb de almacenamento interno) para finais do verán.

Virtua Fighter 5 Final Showdown chegará o mes que vén como título descargable

Marcus Fernández — 2012-05-14T18:48:00Z

SEGA anuncia que dende o vindeiro 6 de xuño estará dispoñible para a súa descarga o xogo Virtua Fighter 5 Final Showdown a un prezo de 12,99 euros na PlayStation Store e a 1.200 puntos Microsoft no Bazar de Xbox LIVE Arcade. Este título descargable achega ás consolas de videoxogos a última versión de máquinas recreativas de Virtua Fighter 5, engadindo 2 novos personaxes (Tara-Arashi de Virtua Fighter 3 e o novo Jean Kujo) e areas de combate dinámicas e interactivas (sinal de identidade da saga).
O xogo contará cun modo de adestramento, un modo de xogo en liña para 8 xogadores e a posibilidade de gravar combates para a súa repetición, gravación e posterior subida.
Para enriquecer esteticamente o xogo, inmediatamente co seu lanzamento estará dispoñible un contido descargable (a un prezo de 4,49 euros/400 puntos Microsoft) que inclúe entre 600 e 950 elementos de personalización para os 19 loitadores do xogo. Tamén lanzarán outros 2 paquetes de personalización de personaxes (para 9 e 10 loitadores respectivamente) que custarán 12,99 euros/1.200 puntos Microsoft cada un.

Trailer do xogo


O xogo contará dende o seu lanzamento con contidos descargables para personalizar os loitadores

O director xeral de Yahoo deixa o seu cargo tras descubrirse que non está titulado en Informática

Marcus Fernández — 2012-05-14T17:32:00Z

O cadro de dirección de Yahoo está a experimentar unha reestruturación debida ao cesamento no seu cargo por parte do seu director xeral, Scott Thompson, posto que ocupará provisoriamente Ross Levinsohn, á vez que colocan a Fred Amoroso para encabezar o consello de dirección da compañía en substitución de Roy Bostock (quen tamén deixa a directiva para acelerar a entrada de Levinsohn).
Este tipo de movementos poderían responder as estratexia errática que está a seguir a compañía nos últimos anos, pero podería tratarse dunha situación ben diferente, pois atendería a un escándalo provocado polo currículo de Scott Thompson, no que aparecía unha titulación en Informática en 1978 no Stonehill College, información negada pola institución académica, que non ofreceu tal disciplina ata 1983.
Aínda que dende Yahoo aseguren que o cesamento de Thompson responde a “motivos persoais”, resulta evidente que a súa credibilidade quedou totalmente en cuestión ao descubrirse que inventara ter unha titulación académica para reforzar a súa posición como directivo no sector, o que recoñeceu como “un erro inadvertido”.

Buffalo pon á venda o primeiro router Wi-Fi que acada velocidades de ata 1,3 Gbps

Marcus Fernández — 2012-05-14T16:42:19Z

Este mes vai chegar ás tendas o router Netgear R6300 que grazas a conectar con conectividade sen fíos baixo o estándar IEEE 802.11ac pode establecer comunicacións de datos sen fíos de ata 1,3 Gbps, presumindo de ser o primeiro dispositivo comercial deste tipo en pórse no mercado, pero non é bo consello vender a pel do oso antes de cazalo, e Buffalo Technology adiantouse co router AirStation WZR-D1800H, que xa está á venda, converténdose así no primeiro á venda a un prezo de 179,99 dólares (140,13 euros).
O novo router integra un chip 5G Wi-Fi de Broadcom, que permite triplicar a velocidade das actuais comunicacións por Wi-Fi N mantendo a retrocompatibilidade; cando opera na banda dos 5 GHz é capaz de realizar transferencias ata a 1,3 Gbps, o que resulta ideal para mover vídeo en alta definición ou a varios equipos conectándose á Internet de banda ancha. Paralelamente á conexión na banda de 5 GHz, tamén pode establecer comunicacións na dos 2,4 GHz a unha velocidade de ata 450 Mbps. Completan estas especificacións 4 portos LAN e 1 porto WAN (os cinco a 1 Gbps) e 1 porto USB para poder funcionar como almacenamento ou impresora en rede.
Para completar a este produto, Buffalo tamén estrea o bridge AirStation WLI-H4-D1300, que ten o mesmo prezo que o anterior, pero que ten a utilidade oposta (ou complementaria), ou sexa, que serve para conectar a 4 dispositivos por cable, tomando o seu acceso á Rede a través de Wi-Fi.

O COETG celebra mañá un Foro Dixital sobre o papel das mulleres e as rapazas nas TIC

Raquel Noya — 2012-05-14T14:07:15Z

Atendendo ás premisas marcadas este ano pola UIT (Unión Internacional de Telecomunicacións) para celebrar o Día Mundial das Telecomunicacións e da Sociedade da Información 2012, o Colexio Oficial e a Asociación de Enxeñeiros de Telecomunicación de Galicia van celebrar, mañá martes 15 de maio, un Foro Dixital no Centro de Supercomputación de Galicia (CESGA), dedicado ao papel das mulleres e das rapazas nas TIC.
O acto, no que participa tamén a Escola de Enxeñería de Telecomunicación de Vigo, a Axencia para a Modernización Tecnolóxica de Galicia e a Consellería de Educación, será transmitido por Internet vía streaming para que poida ser seguido en directo por alumnas e alumnos de varios colexios galegos,
O programa deseñado polo COETG inclúe as palabras de benvida e agradecementos do decano da entidade, Ramón Bermúdez de Castro, así como a intervención da representante e vogal da Xunta Directiva do COETG/AETG Pilar Villaverde, que dará lectura ao Manifesto do COETG con motivo do Día Mundial.
A esta intervención súmase a da directora da EET, Edita de Lorenzo, a da directora da Axencia para a Modernización Tecnolóxica de Galicia, Mar Pereira, e a dun representante da Consellaría de Cultura, Educación e Ordenación Universitaria, que contestarán ás dúbidas que sobre o eido lle xurdan aos alumnos presentes por videoconferencia.
O evento ten previsto rematar ás 12:45 horas.

O Goberno pídelle ao sector TIC o envío de achegas para dar forma á Axenda Dixital española

Fernando Sarasqueta — 2012-05-14T13:35:00Z

A Axenda Dixital Española está aberta á participación do sector das novas tecnoloxías da información. Así o informan os departamentos do Goberno central encargados de darlle forma (Ministerios de Industria e Facenda), que nun comunicado conxunto, fan un chamamento ás empresas para que contribúan con cadansúa achega na elaboración desta folla de ruta en materia TIC. A finalidade da Axenda, sinalan, é a de ter un impacto real na vida dos cidadáns e na mellora da competitividade das empresas.
Xa nun eido máis específico, contémplanse liñas de actividade como o despregue de redes e servizos “que garantan a conectividade dixital”, o desenvolvemento da economía en liña para o medre do sector (dentro e fóra de España), a mellora da Administración Electrónica no camiño da eficacia nos servizos públicos ou o pulo ao sistema de investigación e desenvolvemento en materia TIC. Por certo que co fin de canalizar a devandita colaboración do sector produtivo tecnolóxico-dixital (e máis da cidadanía) na elaboración da Axenda, o Goberno puxo en marcha unha enquisa dixital e máis unha Oficina Técnica que serve de punto de envío e recepción de aquela. A enquisa baséase nos obxectivos principais da Axenda e poderanse facer achegas a un ou varios dos puntos estratéxicos. O prazo de recepción de contribucións remata o 31 de maio. Deberán ser enviadas á conta de correo electrónico adpe@minetur.es.

O simulador de compras do IGC, a disposición de consumidores, comerciantes e profesorado

Raquel Noya — 2012-05-14T12:54:00Z

A Escola Galega de Consumo, encargada de dar resposta ás demandas educativas da cidadanía e de informar aos profesionais das esixencias dos consumidores perante os novos mercados, deseñou recentemente un simulador de compras virtual que permite acceder de forma doada ás ferramentas para a compra por Internet, para comprender o seu funcionamento e adiviñar os usos e vantaxes que o comercio electrónico pode ter para a cidadanía.
Este simulador permite ademais traballar distintos aspectos de consumo, como o pagamento por Internet e outros relacionados cos dereitos dos consumidores, entre os que se atopan o etiquetado dos produtos, as vendas a distancia, a publicidade, a protección de datos e a realización de reclamacións.
Pois ben, grazas á colaboración do Instituto Galego de Consumo coa Rede de Centros para a Modernización e Inclusión Tecnolóxica de Galicia, os usuarios e usuarias das 98 aulas que hai espalladas pola Comunidade, van poder utilizar este simulador de compras e comprobar de primeira man as súas vantaxes.
Farano a través dun curso formativo sobre consumo e comercio electrónico que se celebrará nas distintas aulas CeMIT, e que vai dirixido de xeito especial a consumidores, comerciantes e profesorado.
Este simulador, único en toda España, xa foi demandado por moitas Comunidades Autónomas e entidades o que, en palabras dos seus responsables, “sitúa de novo a Galicia na vangarda no que se refire a formación e educación dos consumidores”.
A Escola de Consumo atendeu o ano pasado a mais de 1000 alumnos e con este programa pretende ampliar a súa oferta e achegarse de maneira importante á poboación galega.

Colaboración co voluntariado dixital
O protocolo de colaboración asinado hoxe entre a presidenta do Instituto Galego de Consumo, Nava Castro, e a directora da Axencia para a Modernización Tecnolóxica de Galicia, Mar Pereira, recolle tamén a integración do simulador de compras na carteira de servizos do programa de Voluntariado Dixital, que está a desenvolver a AMTEGA “para favorecer o uso das novas tecnoloxías por parte persoas maiores e persoas con discapacidade”, afirmaron.
O Instituto Galego de Consumo ofrecerá formación específica aos voluntarios do programa sobre os dereitos dos consumidores especialmente no eido do comercio electrónico para que poidan prestar o seu apoio nesta materia ao colectivos de maiores e persoas en risco de exclusión dixital.

A mostra interactiva sobre Celso Emilio chega á Biblioteca Nodal da Coruña

Redacción — 2012-05-14T11:47:16Z


A exposición na súa estadía na biblioteca de Santiago de Compostela

A mostra interactiva sobre Celso Emilio Ferreiro, que conmemora os cen anos do nacemento do autor de Longa noite de pedra, chegou este luns á Biblioteca Nodal da Coruña Miguel González Garcés. A exposición, da que temos falado en Código Cero en boa medida pola súa vertente tecnolóxica, estará no devandito centro até o 25 de maio, logo das súas estadías en Santiago e Pontevedra. Logo da súa permanencia na Coruña, chegará ás bibliotecas nodais de Ourense, Lugo e Vigo.
O Punto de información Multimedia Celso Emilio Ferreiro, así se chama a mostra, é unha exposición a cabalo entre dous mundos: o físico, o palpábel, e máis o dos tempos 2.0 cos que están xa máis que familiarizadas as novas xeracións.
A mostra foi desenvolvida por Ouvirmos e está inserida nas actividades da Consellería de Cultura para celebrar o centenario do poeta.
Tamén colaborou nela, arreo, a Fundación Celso Emilio Ferreiro.
O Punto multimedia consta dunha pantalla de 46 polgadas cun interactivo dinámico baseado no concepto de liña de tempo, que permite coñecer e navegar polo universo literario e persoal do poeta a través de diferentes apartados referidos á súa traxectoria vital, obra, fotografías ou ao son da súa voz.
Xunto a esta pantalla interactiva, hai instalada unha Mesa de luz na que se amosan obxectos persoais de Celso Emilio Ferreiro como os seus lentes, as súas cartas ou a súa máquina de escribir.
Sinalar que en outubro a exposición multimedia arribará aos centros educativos para achegarlles aos estudantes de secundaria a obra e a figura do poeta da vila de Celanova. Acollerán a mostra o IES Francisco Daviña Rei (Monforte), o IES de Foz (Foz), o CIFP Rodolfo Ucha Piñeiro (Ferrol), o IES Maruxa Mallo (Ordes), o IES Illa de Tambo (Marín), o IES Aquis Celenis (Caldas de Reis), o IES Xesús Taboada Chivite (Verín), o IES Lauro Olmo (O Barco de Valdeorras) e, finalmente, o IES de Celanova (Celanova).

GalegoLab celebra o 17 de maio con concursos en liña e mensaxes na nosa lingua para o mundo

Fernando Sarasqueta — 2012-05-14T11:29:57Z

GalegoLab, a plataforma para o deseño e lanzamento colectivo de iniciativas de promoción do galego onde por desgraza xa non se le nin se escoita falar, rebule estes días de actividade arredor dunha festa que lle toca de cheo: o Día das Letras Galegas. Quen queira achegarse a galegolab.org verá, polo tanto, un bo número de propostas que lle poderán acaer mellor ou peor, pero que teñen en común a promoción da lingua e dun xeito máis específico a da 50ª convocatoria da festividade. Por exemplo: a posta en marcha dun concurso organizado en colaboración coa rede social latri.ca para fortalecer dúas cousas fundamentais: o uso do galego nas redes 2.0 e o coñecemento arredor dos nosos autores homenaxeados.
O certame en liña mantense activo até o día 17, incluído, e require que publiquemos no noso perfil de latri.ca unha cita de autores e autoras conmemorados/as. A primeira persoa que acerte a quen pertence cada cita levará como premio un libro de Rinoceronte Editora. Para participar, como dixemos, só temos que rexistrarnos en latri.ca/signup.
Asemade, están e marcha o proxecto Lectura global en YouTube, aberto á comunidade internauta galega por enteiro. Consiste na achega dunha peza audiovisual de gravación propia na que recitaremos un poema, o extracto dunha obra dalgún dos nosos escritores festexados nas Letras Galegas. Por certo que na canle de GalegoLab en YouTube xa se poden ir vendo algunhas das pezas presentadas.
A maiores, GalegoLab quere celebrar a festa do 17 retomando unha proposta que xa nos chamou a atención o ano pasado: Agasallo sincronizado para o mundo. Do que se trata é de darlle unha reviravolta á iniciativa logo do éxito da primeira xeira, a de 2011, sendo a idea básica a de facer cada quen unha versión musical do tema Ti es dos meus. Todas as achegas persoais recibidas penduraranse na canle de YouTube do proxecto Agasallo para o mundo. O obxectivo: que o día das Letras Galegas felicitemos a nosa lingua coa versión que máis nos guste, facendo así que se escoite galego no meirande número de recantos do mundo.

A Rede CeMIT estrea unha actividade sobre televisión por Internet

Raquel Noya — 2012-05-14T11:21:27Z

As aulas CeMIT de vinte localidades galegas iniciaron hoxe unha actividade formativa sobre televisión en Internet, na que se darán a coñecer as ferramentas e técnicas máis empregadas na distribución de contidos audiovisuais na Rede e se analizarán os seus usos e vantaxes.
Esta actividade, de 15 horas de duración, xa ten rexistradas 156 persoas, que se reparten entre os Centros para a Modernización e Inclusión Tecnolóxica de Arzúa, Fisterra, Tui, Pontedeume, Vimianzo, Sarria, Ponteareas, A Cañiza, Carballiño, Celanova, A Estrada, Vilagarcía de Arousa, Santiago, Allariz, O Barco de Valdeorras, Ribeira, Narón, Ames, Cerdeda e As Pontes.
Os responsables da iniciativa explican que nalgunhas das aulas CeMIT empregarase o sistema de videocolaboración para o desenvolvemento desta actividade, unha tecnoloxía que, ademais de permitir a comunicación entre tódolos participantes en tempo real a través de imaxe e chat, permite compartir e controlar as aplicacións remotas.
Por outra banda, nas aulas tecnoloxicamente máis avanzadas (que conten con equipos audiovisuais e multimedia) empregarase o sistema de videoconferencia, que lle permitirá ás persoas usuarias asistir ás actividades en formato presencial e telepresencial.

Novos cursos formativos

O Programa de Dinamización desta última edición conta ademais con outras catro actividades de 15 horas de duración a desenvolver nos distintos Centros, que versan sobre deseño gráfico, retoque fotográfico, community manager e streaming de audio e vídeo; así como doutras dúas máis amplas, de máis de 40 horas cada unha, sobre produción audiovisual e creación multimedia.
As persoas interesadas poden informarse das datas de comezo de cada unha das actividades e reservar praza na aula CeMIT da súa localidade a través do 981 552 568 ou a da web da Rede CeMIT da Xunta de Galicia.

O novo Tomb Raider non chegará ata o ano que vén

Marcus Fernández — 2012-05-14T11:12:27Z

Crystal Dynamics estaba a prepar unha renovación da saga de Tomb Raider para o vindeiro outono, cun xogo con versións para Xbox 360, PlayStation 3 e PC, pero esta fin de semana anunciaron que este agardado xogo adiarase preto de 6 meses, para chegar no primeiro trimestre de 2013 para poder pulir axeitadamente o xogo.
O máximo responsable do estudo, Darrell Gallagher asegura que a súa compañía marcárase 2 grandes obxectivos: crear un Tomb Raider moderno e desenvolver o mellor xogo das súas carreiras, e para poder entregar un xogo co maior nivel de calidade é polo que optaron por demorar o seu lanzamento uns poucos meses.
Non é o único xogo que está a mudar a súa data de lanzamento, senón que nos últimos días tamén se confirmou que Bioshock Infinite non chegará ata 2013, polo que está a darse a entender que 2013 será un ano bastante forte en estreas de grandes títulos, o que podería responder a unha estratexia comercial para espallar os lanzamentos da actual xeración de consolas de videoxogos, para que o salto á vindeira xeración non sexa moi brusco.


Nova imaxe do xogo que está a desenvolver Crystal Dynamics


No novo xogo viviremos unha dura loita pola supervivencia


Pese á súa renovación, Tomb Raider non perderá os seus elementos de plataformas que caracterizaban a anterior saga

Galegodecine.org colle folgos con motivo do Día das Letras Galegas

Fernando Sarasqueta — 2012-05-14T10:36:56Z

A web galegodecine.org súmase estes días ás celebracións do 17 de maio. A páxina, como recordaremos, é a versión dixital (axenda, eixe de operacións virtual) dunha xira que percorre a nosa xeografía amosando e promovendo o noso audiovisual, na nosa lingua, entre as novas xeracións. A xira inclúe unha caravana-remolque que fai as funcións de sala de cinema. Unha das figuras que intervén, como mestre de cerimonias, é o revisor das palabras, encargado de introducir aos rapaces nos misterios da sétima arte. Con motivo do Día das Letras, a iniciativa colle folgos e fai especial fincapé na necesidade de promovermos a lingua.
Isto estase a facer a través do faladoiro que se inclúe coa cativada logo de cada proxección, no que se lles propón aos rapaces facer eles mesmos unha historia-argumento. A través dun videomatón, cada un deles achegará unha frase que logo transformarase nun relato en grupo. “Da súa capacidade de inventiva”, informan os organizadores, “dependerá que se convertan nos gañadores das votacións que, unha vez rematado o programa FalaRedes de Política Lingüística, levaranse a cabo a través da devandita páxina web, galegodecine.org, onde estarán ao dispor dos interesados todos os vídeos da actividade”. Quen gañe recibirá como premio un libro e DVD do Soldadiño de chumbo.
Galego de Cine é unha iniciativa de Mr Misto, a directora Eva Quintáns, Continental, e Oqo filmes. Insírese nas actividades de FalaRedes, da Secretaría Xeral de Política Lingüística. Esta sala de cinema móbil, posibelmente a máis pequena do mundo (pero tamén unha das máis xeitosas), percorrer arestora até 100 localidades da nosa xeografía, proxectando curtas en galego e facendo participar a nenas e nenos no propio proceso creativo de cada peza, convidándoos a eles mesmos a idear a súa obra particular. Segundo informan os organizadores, os rapaces son eles mesmos os encargados de facer a escolla de contidos da carteleira para, seguidamente ao visionado, valorar as súas peliculiñas favoritas. “Primeiro xestionan o seu pequeno cinema, e logo eles fan a súa propia curta para verse en pantalla, botando man da súa desbordante imaxinación espontánea, cada un eles constrúe unha pequena parte dun video-conto”, engaden.

Investigadores galegos traballan nun sistema TIC para mellorar a protección en choques laterais

Fernando Sarasqueta — 2012-05-14T09:53:52Z

O coche intelixente pode poñer en xogo o aquel de intelixencia que nos falta a moitos condutores, cousa que é de agradecer, e máis nestes tempos en que todo apunta a un vindeiro incremento dos límites de velocidade, e onde hai estradas (como, sen ir máis lonxe, a Avenida de Lugo en Santiago, en que raro é quen respecta os sinais). Dáse a circunstancia de que o ingrediente extra de intelixencia, que en casos especialmente deficitarios debera ser ben grande, provén unha vez máis do eido TIC. Na vangarda desta investigación hai mans galegas: as do Centro de Investigación en Tecnoloxías da Información da USC (CITIUS).
O centro traballa, xunto con nove espazos máis de investigación e sete empresas do sector, no proxecto CENIT ADAPTA (Tecnoloxías de Funcións de Protección Lateral, Intelixentes e Adaptativas). Segundo informa a USC, os días pasados foi presentado un reconto do acadado con esta iniciativa ao longo dos seus catro anos de vida na sede de Dalphi Metal España, que é un dos principais promotores do proxecto. O obxectivo do mesmo foi o de mellorar a protección das persoas ante colisións laterais. Unha das liñas de traballo da iniciativa é o desenvolvemento de sistemas de detección e clasificación do contorno do vehículo. Tamén cómpre salientar a inclusión de elementos estruturais no automóbil para mellorar a xestión de choques laterais e a incorporación de sistemas de retención para ofrecer un maior nivel de protección aos ocupantes. Todos os equipos de protección integrados, grazas aos sistemas de detección baseados en visión artificial, permiten a súa activación uns milisegundos antes de que teña lugar o impacto. Nesta liña de traballo, na de achegar recursos que permitan ter baixo o máximo control todo o que rodea ao noso coche, é onde traballou principalmente o CITIUS, poñendo en xogo a súa experiencia xunto coa empresa Anafocus. A detección baseada en visión artificial é unha das súas grandes contribucións, un sistema que inclúe visión exterior e que, grazas a el, posibilita a localización dos obxectos que se achegan ao automóbil e extrae datos en 3D destes elementos, “incluíndo a velocidade e a posición”, e todo en tempo real.
A maiores, a infraestrutura interior complementaria extrae un coñecemento perfecto da situación do vehículo de portas para dentro (ocupantes, posición, complexión, etc). “O sistema ADAPTA”, engade a USC, “foi probado polo consorcio en ensaios con manequíns, nos que se demostrou a súa eficacia, xa que se constata unha redución de máis do 30% nas lesións torácicas sufridas polos ocupantes do automóbil”.

Cultura dá a coñecer a súa achega de actividades para divulgar a obra de Paz Andrade

Redacción — 2012-05-14T09:24:17Z


Captura da web oficial de Valentín Paz Andrade, un dos eixes fundamentais das actividades programadas

A Consellería de Cultura presentou no complexo do monte Gaiás a súa programación de actividades para festexar a figura de Valentín Paz Andrade e dalo a coñecer entre as novas xeracións. Segundo fixo saber o departamento que dirixe Xesús Vázquez, trátase dun feixe de accións dedicado a “achegarlles a milleiros de cidadás e cidadáns de tódolos concellos galegos, e tamén doutras comunidades e países, a vida e máis a obra deste senlleiro poeta, político e empresario”. Co din de conseguir que a mensaxe teña as meirandes repercusión e alcance, farase fincapé no uso da Rede. Así, entre as accións previstas inclúese o potenciamento da web oficial do autor, valentinpazandrade.es, entre outras cousas.
Os eventos previstos déronse a coñecer da man dos secretarios xerais de Cultura e Política Lingüística, Anxo Lorenzo e Valentín García, respectivamente. Tamén participou o conselleiro de Cultura, Xesús Vázquez, quen salientou a celebración do 17 como “unha motivación para un fervedoiro social de propostas nas que se implican as máis diversas entidades sociais, desde asociacións ata cadeas de supermercados, institucións académicas e un longuísimo etcétera”. Segundo engadiu o conselleiro, as actividades en homenaxe de Paz Andrade arrincaron coa posta en marcha da devandita web do autor “como centro informativo e de documentación, un motor para as múltiples actividades que se xeran desde asociacións e entidades de todo tipo, tanto dentro como fóra de Galicia, e que permite asegurar unha chegada masiva e sen fronteiras para calquera persoa interesada”, sinalou.
Vázquez Abad salientou tamén as pezas audiovisuais construídas sobre os versos do homenaxeado e que, grazas á colaboración da Televisión de Galicia, se están a emitir ao longo deste mes de maio esparexidas pola programación diaria. Tamén se difundirá nos medios de comunicación a campaña institucional do Día das Letras que cada ano realiza a Xunta; e a canle de internet linguagalega.tv difundirá o documental Paz-Andrade. Cen chaves de luz.
As bibliotecas galegas, engadiu, están a operar tamén como centros dinamizadores das actividades programadas. En concreto, as bibliotecas nodais están a celebrar mostras dos fondos bibliográficos de Paz Andrade e diversos contacontos para a animación á lectura entre os máis novos. No ámbito escolar, a través da rede de bibliotecas escolares e do labor permanente de colaboración dos equipos de dinamización da lingua galega, póñense a disposición do conxunto da comunidade educativa materiais para a difusión da obra e da figura do homenaxeado, “desde un telexornal sobre Paz-Andrade feito por reporteiros de primaria ata unidades didácticas interactivas construídas por profesoras e profesores para axudar a indagar no autor ou cuestionarios web”, sinalou Vázquez Abad. Ademais destas achegas, a Consellería de Cultura levará ata finais de ano por centros escolares de secundaria e polas bibliotecas nodais de Galicia unha exposición con audiovisuais sobre as distintas facetas do poeta, político e empresario.

A Biblioteca Dixital da Galeguidade estréase na web con 12 obras

Redacción — 2012-05-14T09:02:54Z

A Secretaría Xeral da Emigración vén de pór enmarca a Biblioteca Dixital da Galeguidade, que permite a consulta e descarga de 12 obras que conforman un primeiro bloque dos que conta cos dereitos de autor a entidade, dirixida por Santiago Camba, e que pretende así achegar estes recursos culturais á cidadanía no Exterior. As obras dispoñibles inicialmente editáronse entre os anos 1998 e 2001, dos que algúns xa non están dispoñibles en papel, polo que esta iniciativa tamén supón a permanencia no tempo deste legado cultural, ampliando tamén o seu público potencial.
Os títulos que estrean esta biblioteca virtual son Asociacionismo galego no Exterior (dous tomos), Autoconcepto en hijos de emigrantes, Casas de indianos, Dun Finisterrae a outro: a emigración galega á Patagonia, El Tercio de Gallegos, Galegos en América e americanos en Galicia, Galleguidad en la Argentina, Justa distribución del sufragio como poder, La emigración gallega al Río de la Plata, Memorial del último Reino Santiago de Chile, e Presencia eterna de gallegos en La Habana. A esta biblioteca virtual iranse engadindo paulatinamente as obras que vaia publicando a Secretaría Xeral da Emigración.


As obras pódense descargar en formato PDF ou ler directamente en liña

Presentado o Plan de Software Libre 2012, cun presuposto de 915.000 euros

Raquel Noya — 2012-05-14T07:48:34Z


A directora da Amtega, Mar Pereira, presentou o Plan de Software 2012

O actual Goberno galego “foi o primeiro en contar cunha estratexia clara en materia de software libre poñendo en marcha en 2010 o primeiro plan realizado en colaboración cos axentes do sector”, así o explicou a directora da Axencia para a Modernización Tecnolóxica de Galicia, Mar Pereira, durante a presentación do actual Plan de Software Libre 2012, que conta cun investimento de 915.000 euros para desenvolver actividades de promoción e uso do software libre entre a cidadanía galega.
Mediante este Plan levaranse a cabo máis de 120 actuacións dirixidas a impulsar o uso do software libre e código de fontes abertas (FLOSS) no sector empresarial, na sociedade en xeral e na Administración do país, esta última, por certo, xa conta co 94% dos ordenadores con software libre instalado e prevé chegar ao 100% este ano.
De novo, o Plan desenvólvese en colaboración coas asociacións galegas de usuarios de software libre (AGUSL), coas empresas do sector (AGASOL), coa Comisión Interuniversitaria de Galicia (que integra as tres universidades) e co Colexio Profesional de Enxeñaría Informática de Galicia, todas elas entidades que durante os últimos anos traballaron a reo por integrar as ferramentas abertas no día a día da sociedade galega, en tódolos seus eidos.
No mesmo acto de presentación, a AMTEGA aproveitou para facer balance das actuacións realizadas no 2011en torno ao software libre (que entre outras cousas lle permitiu á Xunta aforrar 2,5 millóns de euros), e asinou un convenio de colaboración entre a Asociación Galega de Empresas de Software Libre e o Centro Nacional de Referencia de Aplicación das TIC baseadas en Fontes Abertas CENATIC, a cuxo padroado pertence a Xunta desde o ano pasado.

Software de fontes abertas na Administración

Mar Pereira, destacou a aposta polo uso do software libre na Administración coa elaboración dun estudio que analizará o impacto, as necesidades formativas e a viabilidade da migración exclusivamente a ferramentas ofimáticas de software libre en todos os ordenadores dos empregados públicos da Xunta.
Este estudo é o paso previo necesario antes de poder elaborar un plan de migración e un avance no camiño iniciado en 2010 ao instalar en todos os novos ordenadores ferramentas ofimáticas de software libre en convivencia co software propietario.
Ademais, este ano porase en marcha, en colaboración con CENATIC, un procedemento para analizar de xeito previo á contratación dun produto ou desenvolvemento tecnolóxico, se existe unha solución libre que cubra as necesidades requiridas.

Difusión do Software libre entre a cidadanía

Un dos aspectos clave para o éxito das tecnoloxías FLOSS, en particular na vida diaria, é a formación para comprender os beneficios do seu uso, polo que o Goberno promoveu o pasado ano a formación de diversos sectores da sociedade galega e motivou ás persoas formadas a usar as fontes abertas no seu día a día.
En 2012 o plan continúa a senda iniciada no 2011 coa formación específica dos empregados públicos a través do plan Ofimático Galego; tamén estará presente na Rede CeMIT (onde máis de 1.300 ordenadores das 98 aulas teñen instalado o sistema operativo libre); continuará formando aos profesionais do sector TIC en software libre dentro do seu plan formativo con 16 cursos e preto de 1.000 sobre este tipo de aplicativos e volverá a convocar o Premio ao mellor Proxecto universitario de Fin de Carreira en colaboración coas empresas do sector.
A todo o anterior hai que sumarlle a celebración, en outubro deste ano, da III edición da Libre Software World Conference, un dos maiores eventos e difusión do software libre celebrados en España para empresas e profesionais, que terá lugar por primeira vez no noso país; así como as actuacións de difusión de solucións tecnolóxicas do Centro Demostrador TIC, que xa leva ofrecido unhas cuantas achegas en materia de software libre o pasado ano e seguirao facendo este ano.

Convenio Cenatic e Agasol

Como apuntamos anteriormente, durante a presentación do Plan Floss, asinouse un convenio entre a Fundación CENATIC e a Asociación de Empresas Galegas de Software Libre, mediante o cal se asesorará ao sector tecnolóxico de Galicia sobre os aspectos xurídicos, tecnolóxicos e metodolóxicos máis axeitados para a liberación de software e coñecemento, así como para o desenvolvemento de negocio baseado en software libre.
Segundo afirmaron os seus responsable, este coñecemento contribuirá, xunto á calidade das propias empresas galegas, “a seguir crecendo e consolidándose como axentes fundamentais no ámbito local do cambio que se está a producir nos sistemas tecnolóxicos da Administración”.