Telefónica mellora a cobertura móbil en Galicia durante o verán

Rafael Moya, director de operacións do Territorio Norte de Telefónica nun vídeo da Escola de Telecomunicacións de Vigo

Dende finais do ano pasado Telefónica está a reforzar a capacidade das estacións de telefonía móbil en Galicia de cara a proporcionar unha boa cobertura durante o período estival. Nestas actuacións aplicáronse parámetros especiais relacionados coas maiores acumulacións de turistas, para garantir que o incremento de usuarios non afecta á calidade dos servizos de voz e datos.
Na provincia de Lugo mellorouse a cobertura móbil de Ribadeo, O Vicedo e Viveiro, para o que desenvolveron 103 actuacións en diferentes localizacións destes concellos; e a nivel galego aseguran ter realizado 215 actuacións en 23 concellos.
Na costa pontevedresa actuaron en 9 municipios (Baiona, Cambados, Cangas, Gondomar, O Grove, A Guarda, Marín, Pontevedra e Sanxenxo) con implantacións de novas bandas de frecuencias 4G/5G, sectorizacións para densificar unha determinada zona, ampliacións de equipamentos para permitir maior capacidade e/ou prestacións para dar servizo en zonas turísticas de gran aglomeración. Leváronse a cabo 89 actuacións en diferentes localizacións destes concellos.
Na provincia da Coruña mellorouse a cobertura móbil en 11 municipios (Ares, Boiro, Culleredo, Ferrol, Fisterra, Miño, Muros, Muxía, Ribeira, Sada e Valdoviño) para o que desenvolveron 103 actuacións en diferentes localizacións destes concellos.
O responsable de Operacións de Telefónica en Galicia, Rafael Moya, asegura que «os operadores reforzamos de cara ao verán as redes móbiles para que poidan facer fronte con normalidade aos incrementos de tráfico que soportan un gran número de persoas utilizando os servizos destas redes nos seus lugares de vacacións. Este ano, igual que o pasado, este mapa previsible de tráfico viuse modificado como resultado da COVID-19, que está a reflectir novos comportamentos sociais que trouxo a nova normalidade».