Telefónica On The Spot Services amplía presenza internacional e servizos

Telefónica On The Spot Services, a filial da operadora centrada no ámbito da publicidade nos puntos de venda, vén de anunciar o comezo dun importante proceso de espallamento no seu radio de acción. Máis en detalle, o obxectivo é amplificar estas ramificacións cara países como Brasil, México, Chile e Perú, onde xa foron habilitadas novas filiais da devandita división da operadora. Ademais, ábrese o abano de servizos: xúntanse na carteira de Telefónica On The Spot solucións de carteleiría e publicidade dixital en soportes exteriores e servizos audiovisuais para empresas e sedes corporativas.
Lembrar que a filial da operadora, que achega solucións para os emprazamentos físicos de distribución ao cliente desde hai máis de 40 anos baixo a denominación Fío Musical, xestiona arestora máis de 26.400 pantallas en todo o mundo. A compañía conta xa con piares en España, Portugal e Arxentina, e agora tamén en Brasil, México, Chile e Perú. En todos estes países compártese a partir de agora obxectivo: “Achegar unha oferta completa de servizos que permitan a activación de diferentes negocios, cunha plataforma propia e con acordos locais que reforzan esta operación internacional e que melloran a comunicación entre as empresas e os seus empregados, os comercios e os seus clientes, e os anunciantes e o seu público obxectivo”, sinalan fontes da operadora. E engádese: “O que busca a división de Telefónica é reinventar o punto de venda, levando e adaptando o mellor da tecnoloxía e a experiencia dixital ás necesidades dos establecementos e localizacións”. Ou sexa, trasladando as capacidades do mundo online ao mundo offline con “solucións que permiten medir as entradas e saídas do punto de venda; ambientar de xeito dinámico os espazos con música e vídeo; levar a experiencia do cliente no punto de venda ás redes sociais e coñecer os impactos das campañas”.