Redúcese a competencia entre os combinados de fibra e móbil máis económicos

venres, 25 de novembro do 2022 Marcus Fernández

Comparación entre as tarifas de O2 de hai un ano e as actuais

Nos últimos meses houbo toda unha guerra por parte dos operadores de telecomunicacións por ofrecer a fibra óptica máis económica, como un xeito de captar a un tipo de cliente que non esixía servizos que fosen máis aló de ter conexión á Rede no fogar, normalizándose unha chea de ofertas no contorno dos 30 euros/mes. Pero agora que de cara a 2023 vemos como as compañías preparan subas de prezo, atopamos outro cambio de política aínda menos agradable: a desaparición das tarifas máis económicas.
Un dos casos máis evidentes no cambio do cadro de tarifas é o de O2, que en outubro do ano pasado estreara unha tarifa de fibra e móbil por 30 euros/mes que achegaba unha conexión de fibra óptica a 100 Mbps simétricos, e agora a tarifa máis económica que teñen para novos clientes é de 300 Mbps e móbil con 35 GB de datos por 35 euros/mes, que aínda que segue a ser unha oferta bastante agresiva, eleva a barreira de entrada á banda larga fixa.
Lowi tamén ofrecía unha tarifa de fibra de 100 Mbps con móbil con 10 GB de datos por 29,95 euros/mes, que agora non pode contratarse, sendo o seu combinado máis económico o de fibra de 300 Mbps con móbil con 50 GB de datos por 34,95 euros/mes.
Na mesma liña tamén está Simyo, que xa non permite contratar fibra e móbil por 30 euros/mes, senón que agora a súa fibra de 100 Mbps con móbil con 100 GB de datos e 0 minutos en chamadas custaría 35,99 euros/mes, prezo polo que tamén poderiamos contratar fibra de 300 Mbps con móbil con chamadas ilimitadas e 40 GB de datos, o que suporía que na práctica carecese de sentido contratar unha conexión de fibra de 100 Mbps.
Temos así que a competencia de combinados de fibra e móbil no contorno dos 30 euros redúcese considerablemente, aínda que por fortuna ese espazo continúa a contar con operadores como Digi, que por 30 euros/mes ofrece fibra de 300 Mbps e móbil con chamadas ilimitadas e 10 GB de datos (mentres que na Coruña ofrecería fibra de 1 Gbps e móbil con chamadas ilimitadas e 10 GB de datos por só 25 euros/mes).

Digi sería dos poucos operadores que manteñen combinados de fibra e móbil por 30 euros/mes

PUBLICIDADE