Recomendan prudencia á hora de empregar os servizos Wi-Fi dos avións

Xa van quedando poucas compañías de voos que non acheguen servizo Wi-Fi para os pasaxeiros. A cuestión é que cada vez está máis claro que a Rede non só axuda a aturar horas e máis horas de traxecto, senón que é preciso para moitos viaxeiros comunicárense. Cómpre lembrar que a Comisión Europea aprobou o uso de computadores e dispositivos móbiles no avión, pudendo os pasaxeiros empregar Wi-Fi a bordo ou enviar e recibir SMS. Con todo, recoméndase prudencia e sentidiño no uso destes servizos. Segundo recorda a compañía Kaspersky, conectarse a unha rede Wi-Fi sempre leva algúns riscos. De feito, din, as redes dos avións ben poden ser obxecto de atención dos cibercriminais, “non se pode desbotar nunca esta probabilidade”.
Nin tampouco a posibilidade de que a persoa que vaia sentada ao noso carón tente acceder ao dispositivo, engade a compañía, que tamén sinala que as empresas de voos non adoitan actualizar decote as súas redes, “polo que é difícil que as vulnerabilidades teñan amaño nun período de tempo breve”. Polo tanto, o problema é que non é doado para as aeroliñas actualizar de xeito rápido o hardware e o software nos intres breves en que o avión fica detido, entre un voo e outro. “O máis preocupante”, sinala Kaspersky, “é a cantidade de usuarios que poderían comprometer estas redes”. Ao xuízo da empresa, se é posible intervir un coche ou un dispositivo médico, tamén será posible comprometer a rede Wi-Fi dunha firma aérea. Para a empresa de seguridade informática, non é aconsellable desbotar que os ataques poidan vir de puntos de acceso Wi-Fi falsos que se fagan pasar polo propio da compañía aérea ou por algunha das que teñamos memorizadas nos dispositivos.