Oculus prepara un casco de realidade virtual autónomo de baixo custo

Parece que a promoción deste verán a través da que Facebook rebaixa as Oculus Rift co seu mando a un prezo de 449 euros é só o comezo dunha campaña para popularizar os sistemas de realidade virtual facéndoos máis asumibles, e dende Bloomberg están a dar conta de que están ultimando unha nova xeración do casco de realidade de Oculus.
Actualmente Oculus ofrece dúas liñas de produto (os mencionados cascos que precisan para funcionar un ordenador de alto rendemento e un casco que funciona introducindo no seu interior un smartphone de Samsung), ambas con prezos relativamente altos e dependentes de produtos de alta gama, pero o seu novo produto, que polo momento ten o nome de Pacific, sería un casco máis compacto e lixeiro que os actuais que non dependería dun ordenador nin dun móbil e que tería un prezo inferior aos 200 dólares, o que podería ser a chave do éxito desta tecnoloxía.
O mercado actual dos dispositivos de realidade virtual é aínda moi cativo, estimándose que houbo uns 2,3 millóns de dispositivos vendidos durante o primeiro trimestre do ano (non só de Oculus, senón tamén de HTC, Sony e Google), pero o lanzamento dunha solución económica e sen a incomodidade dos cables podería ser o que moitos estaban a agardar para introducirse neste xeito inmersivo de consumir contidos e socializar.
Pacific funcionaría como a última versión de Gear VR, ou sexa, que aparte do casco tamén contará cun mando sen fíos para facilitar o seu control, e a fabricación deste trebello sería cousa da compañía chinesa Xiaomi, que non só se encargaría da produción dos cascos, senón que tamén prepararía unha versión para o mercado chinés cargada coas aplicacións de Xiaomi (lembremos que Facebook non está dispoñible en China).
Por desgraza o novo produto non estaría dispoñible este ano, e habería que agardar a 2018 se atendemos ás fontes consultadas por Bloomberg.