Gradiant achega in2it, a solución definitiva para o eLearning

O centro tecnolóxico Gradiant, con sede en Vigo, está estes días presentado unha nova solución moi axeitada para impulsar o ensino a distancia botando man das tecnoloxías da comunicación. Ou sexa, para afianzar a práctica do eLearning. Estamos a falar de in2it, unha achega que se dirixe, en boa medida, a impulsar a substitución do caderno que levan os mestres na aula polo seu igual electrónico. Con in2it, informa o centro, farase seguimento continuo do desempeño dos alumnos en tempo real, creando reportes automáticos. Ao rematar a clase, in2it achegará ao docente un informe de todo o acontecido ao longo do período lectivo, polo que o profesor ou profesora non terá que perder tempo en facer isto a man.
O único que terá que levar a cabo o profesional da educación “será reflexionar sobre o acontecido durante a xornada”, sinalan fontes do centro tecnolóxico vigués, engadindo que in2it é unha ferramenta “que achega a información precisa para tomar as decisións máis axeitadas sobre como mellorar o desempeño do alumnado”. E todo isto grazas ao desenvolvemento de Gradiant no eido do Learning Analytics.
De falarmos de vantaxes concretas de in2it, cumpriría sinalar que é compatible coa especificación xAPI (Tin Can API), que revisa o proceso de aprendizaxe de cada alumno e xera métricas en tempo real; dotando aos contidos da capacidade de informar sobre como son consumidos e achegando unha API para crear produtos intelixentes e con capacidade de adaptación a diferentes contornas.
A solución in2it tamén foi concibida para editoriais, pois dá información en tempo real de como os usuarios consumen os seus contidos. Ademais, ten contidos adaptativos, detecta erros de deseño e problemas comúns cos contidos; amais de ter unha sinxela integración grazas á súa compatibilidade co estándar xAPI.
En canto ao uso de in2it para docentes, é preciso sinalar que este achega información en tempo real dos problemas do alumnado, analiza a evolución dos seus estudantes e clasifica aos estudantes e alerta perante situacións de risco.