Zara Home venderá a través da Internet a partires do outono

O grupo Inditex comezará a vender produtos pola Rede, aínda que non será a roupa o primeiro que comercialice a través da web, senón que será a súa marca Zara Home a que primeiro se anime a montar unha tenda virtual para 13 países (España, Alemaña, Bélxica, Dinamarca, Francia, Grecia, Holanda, Irlanda, Italia, Luxembrugo, Portugal, Reino Unido e Suecia).
Zara Home está especializada en produtos para vestir e decorar o fogar (non se trata dunha liña de roupa masculina aínda que poida parecer tal ós galegofalantes) e agarda comezar a vender dende a súa web a partires do mes de outubro segundo anunciou o concelleiro delegado do grupo, Pablo Isla, nun encontro en New York.
No mes de xuño Inditex xa anunciara o seu desembarco en Second Life inaugurando unha tenda de Bershka neste mundo virtual, polo que a operación de Sara Home sumaríase ás apostas do grupo de Amancio Ortega para explorar novas oportunidades de negocio, aínda que queren deixar claro que o lanzamento da nova tenda en liña non será un proxecto piloto para o futuro lanzamento doutras tendas virtuais.
A nova tenda achegará un catálogo de preto de 2.000 produtos das coleccións Zara Home e Zara Home Kids, conservando os prezos das tendas físicas, aceptando pagamentos con tarxeta de crédito e dando o seu servizo de atención telefónica por correo electrónico e teléfono.