Un proxecto en Lánzanos supera os 675 mil euros recadados

Aínda que o micromecenado a través da Internet é un fenómeno que en España ten unha presenza moi inferior á de mercados como o norteamericano, comezamos a ver auténticos éxitos no noso territorio, como un proxecto en Lánzanos que vén de superar todas as marcas rexistradas, pois pese a querer xuntar unha cantidade relativamente elevada (58.000 euros) non só conseguiu xuntar tal cantidade, senón que a multiplicou por 11, cun total de 675.940 euros que servirán para facer realidade unha edición conmemorativa do 25º aniversario do xogo de mesa HeroQuest.
Os mecenas deste proxecto podían pagar 65 euros para facerse cunha edición básica do xogo ou 80 euros para unha versión con algúns contidos adicionais, pero sorprendentemente a meirande parte de usuarios (5.025 persoas) optou por achegar 110 euros para conseguir a edición máis completa do xogo, disparando a recadación e levando aos responsables desta iniciativa a ter que esforzarse para poder completar a produción duns 5.300 exemplares do xogo e 7.200 engadidos opcionais a tempo para o Nadal de 2014, procurando tamén facer máis unidades para a súa venda en tendas (os mecenas terán prioridade na distribución).
A edición do 25º aniversario de HeroQuest ten unha páxina web de seu dende a que se informará dos día a día desta iniciativa de cara á súa chegada ao público.