Un proxecto de crowdfunding busca recuperar o diario Público

Ante o proceso de concurso de acredores no que está a empresa do Diario Público, e coñecéndose o feito de que a súa edición dixital vai saír á venda, constitúese unha cooperativa de traballadores e usuarios para mercar publico.es e xerar un novo medio de comunicación, para o que empregan a plataforma de Verkami.com para captar fondos, marcándose como obxectivo inicial os 30.000 euros en 40 días (dos que no momento de escribir estas liñas xa conseguiron 4.250 euros), aínda que pensan que a cantidade pola que se venda a cabeceira sexa finalmente duns 108.000 euros. En caso de non poder facerse con publico.es, , optarían por emprender unha nova publicación co mesmo espírito e equipo de Público (esperan xuntar a un mínimo de 30 traballadores do desaparecido medio impreso), pero cun nome distinto.
O novo medio contaría con distintos tipos se socios (traballadores, subscritores, usuarios e colaboradores) e nesta fase amparada baixo o dominio MásPúblico.org están abertos ao mecenado dos futuros lectores con achegas que van dende os 10 aos 1.200 euros.
Este tipo de proxectos crowdfunding están a converterse en moi habituais para iniciativas que non acadan financiamento por canles tradicionais, apostando por desintermediar para chegar ao público final e conseguir facer viables proxectos que doutro xeito rematarían nos caixóns das compañías, aínda que a captación de fondos continúa a ser difícil, tanto na fase inicial dos proxectos como na súa supervivencia posterior.