U.nu achega os enderezos web máis curtos

Moitas páxinas web presenta enderezos realmente longos que dificultan a súa publicación por correo electrónico, en medios impresos ou en plataformas de microblogging coma Twitter, de aí que existan distintos servizos de redutores de enderezos URL na web, coma tinyURL.com e, agora, u.nu, que presume de achegar os URL máis curtos posibles.
U.nu sería o nome de dominio máis breve que podemos atopar na Internet (a meirande parte dos dominios de primeiro nivel de dous carácteres, correspondentes a códigos estatais, non permiten dominios de segundo nivel de menos de 2 letras), que instala un servizo de acortador de URL no que non fai uso de carácteres doados de confundir (coma 1,l,I,0 e O) e non é sensible a maiúsculas, de xeito que sería ideal para poder escribir un enderezo web por SMS ou mesmo ditalo a través do teléfono, sen moita complicación.
Como exemplo, podemos coller o enderezo que permite acceder ao noso artigo de onte sobre o lanzamento do HTC Magic en España e introducilo no novo servizo para rematar tendo o breve u.nu/5py como enderezo web para consultar a devandita nova.