Sen Un Peso volve á carga coa sétima edición do Laboratorio Audiovisual de Vedra, máis TIC ca nunca
xoves, 16 de xaneiro do 2014
Este ano os cursos do
Laboratorio Audiovisual de Vedra (LAV) prestarán especial atención
á formación en multimedia en novas tecnoloxías para tódolos elos
da cadea creativa (dende que se xera un proxecto até que se pon na
pantalla do espectador). A edición 2014 LAV inclúe, máis polo
miúdo, cursos de documental web, linguaxe de marcado lixeiro
(markdown, wiki) e creación e xestión de páxdinas con
Wordpress. Así no contan os responsábeis desta exemplar actividade,
exemplar non só polo emprazamento elixido para levar a cabo o
programa de accións previsto (no concello rural de Vedra, lonxe do
que se entende por grandes capitais europeas do audiovisual) senón
tamén por seguir adiante, viva, con todo o que está a caer. Unha
vez máis, a proposta vén da man da asociación Sen
Un Peso.
Segundo informan os
seus membros, xa está aberta a inscrición nos 13 cursos que oferta
o LAV014. A matrícula formalízase en liña a través da
páxina web da asociación. Os obradoiros, de 14 horas de
duración, desenvolveranse na fin de semana do 15 e 16 de febreiro:
once cursos para seareiros e profesionais cun prezo de matrícula de
50 euros e dous cursos de balde para alumnado da ESO. As xornadas,
informan os organizadores, buscan a formación en diferentes aspectos
da linguaxe audiovisual e multimedia para favorecer a autonomía
creativa dos participantes: documentais de natureza, inventos para o
audiovisual, bandas sonoras, interpretación diante da cámara, vídeo
con réflex, animación dixital, vídeo de combate... O abano de
posibilidades e potencialidades é ben amplo.
A matrícula para
inscribirnos ficará aberta até o 1 de febreiro. Haberá 195 prazas
dispoñíbeis, quince por cada curso. Como dixemos, o programa inclúe
11 cursos para público xeral e dous cursos gratuítos para alumnado
de Secundaria. O programa de formación combina as materias máis
diversas relacionadas coa linguaxe audiovisual, ao tempo que gaña
peso a formación en aspectos relacionados coa comunicación a través
de Internet. A asociación Sen Un Peso salienta entre as actividades
do programa tres obradoiros relacionados co ámbito da comunicación
multimedia e en liña: Documental web, impartido por María Yáñez; Linguaxes de
marcado lixeiro (Wiki, Markdown), con Iñaki Quenerapú; e
Creación e xestión de webs con Wordpress, guiado por Carlos
Macías.
Estes son os cursos
para o público en xeral:
· Documentais de
natureza, con Max Carun
· Vídeo de
combate, con Roi Guitián e María Lobo
· Vídeo con cámara
réflex, con Rubén Prieto
· Inventos
para o audiovisual, con Pepe Penabade
· Dirección
de fotografía, con Paco Rocha
· Interpretación
diante da cámara, con Xabier Picallo
· Bandas
sonoras, con Marcos Payno
· Animación
dixital, con Leonardo Zuklev e Bibiana Álvarez
· Documental
web, con María Yáñez
· Creación
e xestión de webs con Wordpress, con Carlos Macías
· Linguaxes
de marcado lixeiro (Wiki, Markdown), con Iñaki Quenerapú
Os cursos de balde para
estudantes de ESO son os que citamos de seguido:
· Videoclips,
con Miguel Cameselle
· Interpretación
diante da cámara, con Manolo Cortés
Segundo informan os
organizadores, tódolos os cursos teñen unha duración de 14 horas
repartidas entre o sábado 15 e o domingo 16 de febreiro. Para esta
sétima edición, a idea dos promotores foi a de facer de LAV “un
referente na formación audiovisual non regrada en Galicia, que ten
por obxectivo fomentar a creatividade entre afeccionados e
profesionais e promover o uso social das ferramentas audiovisuais e
multimedia”. Segundo engaden, facendo reconto dos froitos
recollidos, polo LAV pasaron desde 2008 máis de 1.000 afeccionados e
profesionais. “Na Asociación Sen Un Peso entendemos o audiovisual
coma un traballo ou unha afección colaborativa, onde todas as partes
son importantes”, explican, de aí que o intercambio de coñecemento
e o aproveitamento útil e colectivo do mesmo sexa un piar
fundamental do seu programa. Con esta fórmula, din, pódense facer
grandes creacións sen necesidade de contar con grandes orzamentos.