O Edificio de Novas Tecnoloxías de Lugo súmase á conciliación cun obradoiro de tarxetas dixitais

O Edificio de Novas Tecnoloxías de Lugo, unha das grandes apostas do Concello pola dinamización dixital (achegando formación e alfabetización en pleno casco vello da cidade), vai ser este Nadal un importante punto de conciliación para as familias. En concreto, o Edificio vai organizar un curso de deseño de tarxetas dixitais de felicitación dirixido á rapazada (ás nenas e nenos maiores de oito anos), co obxectivo de complementar a súa aprendizaxe tecnolóxico-dixital estas vacacións ao mesmo tempo que se lles ofrece unha actividade lúdica, divertida e participativa.
O obradoiro, que é de balde, desenvolverase en horario de 11:00 a 13:00 horas, dende o 23 de decembro ate o 3 de xaneiro. As e os participantes poderán crear e deseñar postais de Nadal, de aniversario e mesmo escribirlles unha carta aos Reis Magos.
A actividade terá lugar no Edificio de Novas Tecnoloxías do 23 de decembro ao 3 de xaneiro. E súmase, así, ao resto de propostas municipais que dende as concellerías de Benestar e Muller e Xuventude se organizan nestas datas para ofrecer alternativas de ocio e entretemento no tempo de lecer que teñen estes días as e os cativos lucenses polo parón escolar. O curso, que dispón de 15 prazas, é gratuíto e as persoas interesadas poderán apuntarse ata o vindeiro sábado, día 21, ben no propio centro ou chamando ao 982.29.73.77. Concederanse segundo rigorosa orde de inscrición, segundo informa o Concello.