Na Rede unha recreación de A vida de Brian a conto da división do nacionalismo galego

Que a ficción adianta e prefigura a realidade é cousa sabida. En A vida de Brian, na famosa secuencia das bancadas, os diferentes grupos xudaicos nacionalistas póñense verdes uns aos outros por detalles ideolóxicos tan miúdos que finalmente os que lanzan improperios e chaman disidentes aos demais xa non saben moi ben a que facción ideolóxica pertencen, tal é o ensarillado. Moitos seareiros dos Monty Python (autores do dito filme) lembraron esta secuencia ao asistir á escisión recente do nacionalismo galego, cousa que prexudicou principalmente... ao nacionalismo galego. Pois ben, retomando o fío deste paralelismo temático, vén de ser pendurada en Internet a peza A vida de Brais, unha recreación do dito filme agora emprazado no campo de fútbol de Sigüeiro e contando con cinco alumnos de Comunicación Audiovisual da USC como protagonistas (e tamén co político Rafael Cuíña).
O vídeo, que dura algo máis de dous minutos, rodouse no mes de maio e contou co apoio dos profesores Barreiro Rivas e Antón Losada. A participación de Rafael Cuíña, en clave autoparódica, está a ser saudada na Rede como un ingrediente a ter moi en conta, non só pola súa condición de político galeguista, senón por ser el, precisamente, un dos protagonistas do proceso que levou á creación dun bo número de agrupacións políticas de corte nacionalista compartindo un tronco e unha ideoloxía xeral común: a defensa do país.

O mencionado vídeo de A Vida de Brais