Idealugo.es obtén un recoñecemento orzamentario da Unión Europea

O deputado do organismo provincial lugués Pablo Rivera Capón

A Deputación de Lugo vén de informar do recoñecemento orzamentario obtido grazas a idealugo.es, o Portal da Infraestrutura de Datos Espaciais da Administración Lucense posto en marcha en 2010 e destinado a permitirlle ao organismo provincial a achega de información ao Goberno central relativa aos equipamentos dos concellos (mapas, estradas, datos de infraestruturas municipais, saneamento e abastecemento, ou comunicacións, entre outros elementos). Segundo fixo saber o deputado de Innovación e TIC Pablo Rivera Capón, o labor despregado a través do portal posibilitou a obtención de 167.000 euros do Fondo Europeo de Desenvolvemento Rexional (FEDER), da Unión Europea.
O deputado engadiu que “para a posta en marcha do portal achegamos, en solitario, 361.758 euros para financiar os custes desta páxina coa que afondamos en aspectos como a transparencia e goberno aberto”. Este ano, lembrou, tomouse no organismo provincial a decisión de concorrer a unha nova convocatoria para captar fondos FEDER e, deste xeito, “aforrar cartos”. Europa, engadiu, “recoñeceu o traballo ben feito con este iniciativa e decidiu financiar preto do 50% do custe total de www.idealugo.es”.
Como recordaremos, a través da Infraestrutura de Datos Espaciais da Administración Lucense (IDEAL) a Deputación ofrece información xeo-referenciada da provincia de Lugo a partires dos datos da Enquisa de Infraestrutura e Equipamentos Locais (EIEL), que é o instrumento básico de análise e valoración das necesidades de dotacións locais para efectos da cooperación económica local do Estado. Na devandita páxina web pódese descargar a información das edicións da EIEL para a provincia de Lugo dende o ano 1995 ata o 2012, ambas incluídas; ademais de acceder aos servizos Web Map Service e Web Feature Service que ofrecen a información da EIEL sobre abastecementos, saneamentos ou equipamentos municipais como centros de saúde ou instalacións deportivas, entre moitos outros. Tamén conta cun visor de mapas interactivo no que se pode visualizar toda a información. Outra funcionalidade que acubilla o portal é o servizo de nomenclátor que posibilita a busca de máis de 9.400 entidades de toda a provincia de Lugo, agás o municipio de Lugo.