Google acorda coa Comisión Europa medidas para non abusar da súa posición dominante

A Comisión Europa vén de acadar unha proposta de acordo con Google dentro da investigación por abuso de posición dominante por parte da compañía norteamericana nas buscas en liña e na publicidade nas buscas, aceptando Google garantir que nos seus resultados de busca non dará prioridade aos seus servizos fronte aos dos seus competidores, práctica que non se limitará aos servizos de busca actuais, senón tamén aos que desenvolva no futuro.
Esta nova concesión de Google súmase a outras suxeridas pola Comisión, como que os provedores de contido poderán pedir quedar fora dos servizos de busca especializada sen que iso os penalice no buscador xeral; eliminará o requisito de exclusividade dos seus acordos con editores para subministrar anuncios nas buscas; e eliminará a restrición de permitir que as campañas publicitarias en buscas poidan correr en plataformas deste tipo dos seus competidores.
Os compromisos de Google, anunciados hoxe polo comisario de competencia, Joaquín Almunia, estarán supervisados por unha entidade independente no territorio europeo durante 5 anos. Deste xeito, Google sortearía unha sanción da Comisión Europea por valor do 10% dos ingresos da compañía en 2012 (uns 5.000 millóns de dólares).