Google Instant estrea versión móbil

Aínda que a tecnoloxía Google Instant que pretende acelerar as nosas buscas na web non estaba inicialmente presente en teléfonos móbiles para non consumir excesivos recursos, o feito de que moitos destes terminais conten con bastante potencia de procesador e velocidades de acceso á Rede máis que aceptables, levou a Google a activar a súa posibilidade de uso dende a súa versión web móbil para usuarios de iPhone e Android en EE.UU. (aínda que dende España tamén podemos acceder a tal funcionalidade se accedemos á versión en inglés de Google).
Deste xeito, cando comezamos a escribir unha busca no buscador de Google, aparecerán en pantalla suxestións de busca á vez que figuran os seus primeiros resultados a tales consultas, axilizando a localización de contidos do noso interese.
Para evitar problemas en momentos puntuais nos que a velocidade de acceso á Rede sexa deficiente, a portada de Google.com amosa unha ligazón para poder activar ou desactivar Google Instante cun simple toque.

Vídeo de presentación de Google Instant para móbiles con Android 2.2 e iOS 4