Disney+ anuncia novas tarifas en España

O servizo de vídeo baixo demanda Disney+ está a imitar a Netflix en todo o peor, e ao igual que comentan que van establecer un mecanismo para evitar compartir contas de usuario, veñen de renovar as súas tarifas en España de xeito que os subscritores teñen que elixir entre pagar máis ou perder prestacións.
Os novos plans de Disney+ entrarán en vigor o vindeiro 1 de novembro, e o plan actual, que ofrece vídeo en calidade até 4K e até 4 pantallas simultáneas que custa 8,99 euros/mes ou 89,90 euros/ano transfórmase no plan Premium a un prezo de 11,99 euros/mes ou 119,90 euros/ano.
Polo prezo actual pasará a estar dispoñible un novo plan Estándar, que reduce a calidade máxima de vídeo a Full HD e o número de pantallas simultáneas limítase a 2, condicións que comparte co tamén novo plan Estándar con anuncios, que poderá contratarse por 5,99 euros/mes.
Este cambio de tarifas aplicarase a Reino Unido, Francia, Alemaña, Suíza, Italia, Noruega, Suecia, Dinamarca e España, e os subscritores actuais pasarán ao plan Premium se non indican o contrario, tendo que afrontar o novo prezo a partir do seu primeiro ciclo de facturación despois do 6 de decembro.
Cómpre lembrar que Disney+ chegou a España en 2020 a un prezo promocional de 59,99 euros/ano, que en 2021 subiu a 69,99 euros/ano, para pasar en 2022 a 89,99 euros/ano, de aí que o paso a 119,90 euros/ano poida percibirse por moitos consumidores como todo un abuso, por dobrar o prezo en só 4 anos.
Este modelo de oferta de servizos de streaming está a normalizarse, dando a impresión de que todas as grandes plataformas adoptarán un esquema de tarifas semellante a longo prazo, combinando así ingresos por subscrición e por publicidade, na liña de como facían tradicionalmente as canles de televisión de pagamento, para desgraza dos consumidores, que percibían o streaming como un xeito de librarse dos molestos anuncios.