Deteñen aos responsables do ataque á web da Consellería de Economía e Industria

Imaxe que podía verse durante poucos minutos na páxina web da Consellería de Economía e Industria

A Garda Civil na operación PIRULIN levada a cabo en Valencia, A Coruña, Madrid e León, procedeu á detención de tres persoas (dous deles menores de idade) e a imputación doutro menor, por delitos de danos en sistemas informáticos e descubrimento e revelación de segredos. O grupo desmantelado, que respondía ao nome de K0 Team, fora creado en xuño por catro mozos autodidactas que respondían aos alcumes de xassiz, kr0no, Ca0s e K41S3R, que se coñeceran en foros de temática hacker e que accederan a múltiples servidores de páxinas web modificándoas. Entre as webs afectadas estiveron a do Partido Popular, o Partido Socialista de Madrid, o Defensor do Menor da Comunidade de Madrid, o programa de televisión Sálvame de Telecinco e a Consellería de Economía e Industria da Xunta de Galicia, aínda que segundo as autoridades os únicos que denunciaron os ataques foron o Partido Popular e os administradores da web de Sálvame.
O K0 Team tería modificado unhas 29 páxinas web en só 15 días, demostrando así os seus coñecementos sobre o aproveitamento de fallos de seguridade de servidores web e procurando borrar logo as súas pegadas para evitar ser localizados, aínda que as actuacións contra este grupo aceleráronse ante o roubo dunha base de datos con máis de 120.000 usuarios da páxina web de Telecinco, que foi intervida a un dos detidos nesta operación.