As SMS e as descargas, principais fontes de ingresos das operadoras en 2008
mércores, 18 de febreiro do 2009
Cada vez son máis
os programas de televisión que solicitan o envío dunha SMS para participar
nalgún tipo de concurso ou para descargar a canción de moda nos nosos móbiles.
Poñer o nome da nosa parella na pantalla de inicio do teléfono, baixar un “escáner de persoas” para facerlle crer
á xente que lle estás vendo ata o esqueleto, poñer de melodía o ruído dun peido
ou descargar a un oso de peluche virtual que canta unha canción “de amor” máis farturenta que un
bocadillo de polvoróns, son algunhas das “lindezas”
que se poden comprar agora mesmo dende os nosos móbiles sen ter que movernos do
asento, e que lle fixeron incrementar nun 50 por cento os ingresos das
operadoras telefónicas no 2008.
Segundo vén de
publicar a 2008 Global Wireless Industry
Survey, unha enquisa realizada por PricewaterhouseCoopers, os ingresos por
datos “impulsan o crecemento do negocio
das principais operadoras móbiles de todo o mundo, e as SMS seguen a ser o produto
estrela do mercado, aportando a meirande porcentaxe de ingresos dos servizos de
datos”.
O estudo engade
que outra “importante aposta” das
principais operadoras de telefonía móbil son as conexións Wi-Fi, que xunto coas
tarxetas de acceso sen fíos de banda larga, “xa
se estenderon a aeroportos, hoteis, oficinas e ata cafetarías”.
Nembargantes,
segundo vén de anunciar o xornal Elmundo.es,
“non todo son boas novas” e a diminución
dos investimentos como consecuencia da crise económica, xunto coas novas fontes
de ingresos e a extensión de plataformas de nova xeración, “están incrementando os riscos de perda de
ingresos das operadoras móbiles”.
A actual
situación económica, engade, “impulsa ás operadoras
móbiles a reducir os seus equipos de traballo e os gastos de capital”. Non
vaia ser o demo e, no tanto de incrementar os beneficios nun 50 por cento, só
obteñan un 35…!