AMTEGA e o sector TIC avanzan no desenvolvemento da nova Axenda Dixital de Galicia
luns, 1 de decembro do 2014
Esta mañá celebrouse no
Gaiás, en Santiago, a presentación das principais liñas e desafíos
da Axenda Dixital de Galicia para o período 2020. A cita contou coa
presenza da directora de AMTEGA (Axencia
para a Modernización Tecnolóxica de Galicia), Mar Pereira, e
dun bo número de representantes do noso sector tecnolóxico-dixital.
Durante o transcurso do encontro, abordáronse de xeito conxunto os
retos aos que nos enfrontamos ao longo dos cinco vindeiros anos en
materia TIC. O obxectivo da cita, sinala AMTEGA, foi o de recadar
ideas e reflexións de alto valor.
Ademais da reunión
deste luns, a axencia enviará aos profesionais un formulario para
canalizar as súas achegas que serán valoradas de cara á
conformación final da Axenda Dixital de Galicia 2020. Esta xuntanza
co sector tecnolóxico forma parte da campaña de elaboración da
dita axenda, que se iniciou en xullo deste ano. A nova folla de ruta
en materia tecnolóxica presentarase no primeiro trimestre de 2015 e
estase a elaborar en base a “un modelo de intelixencia colectiva”,
informa AMTEGA, “un modelo que se nutre das achegas das
institucións públicas, dos axentes sociais e económicos e da
sociedade galega oir enteiro”.
Mar Pereira fixo saber
a este respecto que a vindeira Axenda Dixital “será unha Axenda de
todos e para todos, orientada a asegurar que Galicia compite como
referencia no eido dixital a nivel europeo”.
Lembrar
que como parte desta campaña, o pasado 28 de xullo publicouse
o blog.adg2020.es,
a través do cal calquera persoa puido achegar ata hoxe as súas
propostas aos desafíos, participar nos foros de discusión sobre os
mesmos ou enviar as suxestións que considerase a través da conta
adg2020@xunta.es.
Segundo fixo saber a
Axencia que dirixe Mar Pereira, as actuacións da futura Axenda están
en liña con cinco ámbitos establecidos na Estratexia Galega de
Crecemento Dixital, aprobada a finais de 2013: “En primeiro lugar,
acadar unha Administración Dixital innovadora, avanzando cara unha
Administración das persoas, ubicua, con cero papel e cuns servizos
públicos avanzados en ámbitos chave para a cidadanía”. Polo que
atinxe á segunda área de actuación, búscase “incrementar a
capacitación dixital das persoas, acadando a plena integración das
TIC na práctica educativa e posibilitando a inclusión dixital de
toda a cidadanía”. O terceiro punto consiste no pulo á economía
dixital a través da implantación de infraestruturas e solucións
tecnolóxicas nos diferentes sectores produtivos. O cuarto eido
céntrase no afianzamento do sector TIC como estratéxico e en quinto
lugar está o impulso ao despregamento de infraestruturas de
telecomunicación modernas e sustentábeis.