Presenza TIC nos premios de investigación da RAGC
xoves, 24 de xaneiro do 2019
- Os premiados e as autoridades no acto celebrado onte
A
Real Academia Galega de Ciencias
(RAGC) celebrou na tarde deste 23 de xaneiro a toma de posesión
do seu novo presidente, Juan Manuel Lema Rodicio, que releva no cargo
a Miguel Ángel Ríos Fernández, ao frente da institución durante
os últimos cinco anos. Durante o acto, que se desenvolveu no
compostelán Pazo de San Roque, entregáronse tamén os Premios de
Investigación Ernesto Viéitez a un equipo internacional liderado
por investigadores da Universidade de Santiago de Compostela (USC) e
a un enxeñeiro informático da Universidade da Coruña (UDC).
Asistiron
ao acto a directora da Axencia Galega de Innovación (GAIN), Patricia
Argerey; o reitor da UDC, Julio Abalde; o vicerreitor de
Investigación e Innovación da USC, Vicente Pérez Muñuzuri; a
vicerreitora de Investigación da Universidade de Vigo (UVigo), Belén
Rubio; a presidenta do Consello da Cultura Galega, Rosario Álvarez;
o arcebispo de Santiago de Compostela, Julián Barrio; e o director
da Escola Naval Militar de Marín, Ignacio Cuartero.
- A nova xunta directiva da RAGC
Durante
a súa intervención, Juan Lema, catedrático de Enxeñaría Química
da USC e académico da RAGC desde 2016, recoñeceu e enxalzou o
traballo do seu antecesor e dixo que o seu obxectivo é ampliar ao
máximo o radio de acción da RAGC, “buscando a colaboración do
maior número de entidades”, tanto no eido da Administración
(desde a autonómica ata as provinciais e as locais), como no das
fundacións, os colexios profesionais, as asociacións, outras
academias, o tecido empresarial, o ámbito educativo, etc.
Nanopartículas
patentadas
Os
representantes do equipo recoñecido co Premio de Investigación
2018, Alejandro Sánchez e Inés Fernández, quixeron dedicarlle o
galardón a Begoña Seijo. Esta investigadora da USC foi, en palabras
dos seus compañeiros, “unha gran científica cuxo falecemento
prematuro lle impediu ver que as nanopartículas que foron
desenvolvidas coa súa axuda presentan hoxe un enorme potencial
clínico”. O seu proxecto propón o uso de nanobiotecnoloxía para
deseñar terapias diana “cun método de preparación extremadamente
sinxelo, compoñentes de baixo custo e elevada seguridade”, capaces
de reducir a metástase do cancro de colon no fígado ata nun 80%. A
investigación foi publicada na revista International Journal of
Cancer, de referencia no ámbito da oncoloxía, e, tal e como
destacaron os premiados, “a recente concesión da patente nos
Estados Unidos, considerado como o mercado máis importante no cancro
co 50% das vendas mundiais, supón un importante aval sobre a
innovación que representan as nosas nanopartículas”. O proxecto
está a ser liderado pola USC e conta coa colaboración da
Universidade do País Vasco; do Instituto de Investigación Sanitaria
Biodonostia; da Universidade de Düsseldorf (Alemaña); e do
Instituto Nacional de Saúde e Investigación Médica de Francia
(INSERM).
Pola
súa banda, o enxeñeiro informático premiado na categoría de
investigadores mozos, Adrián Diéguez, debullou a súa estratexia
para facilitar o traballo dos programadores cando se enfrontan á
resolución de grandes problemas científicos aplicando técnicas de
computación avanzada. Este investigador do Grupo de Arquitectura de
Computadores da Facultade de Informática da UDC puxo como exemplo de
aplicación a manobra que un coche autónomo ten que facer de xeito
inmediato para esquivar un peón na calzada. “A velocidade de
cálculo é esencial para que o vehículo poida tomar a decisión de
xirar en cuestión de milisegundos”, explicou. A solución proposta
por el simplifica o traballo dos programadores na resolución deste
tipo de problemas científicos a través do uso de tarxetas gráficas
(GPU), capaces de facer cálculos complexos a máis velocidade que un
procesador (CPU).