O proxecto EcoRaee insiste na reutilización de aparellos eléctricos fronte a reciclaxe
venres, 12 de xuño do 2015
Reutilización
ou reciclaxe? Esta é a cuestión
sobre a que estiveron a traballar ao longo de tres anos cinco
departamentos da Universidade de Vigo (Enxeñaría Mecánica,
Enxeñaría Eléctrica, Enxeñaría Informática, Economía Aplicada
e grupo REDE e Dereito Ambiental, xunto coa Oficina de Medio
Ambiente), Revertia e EnergyLab, dentro do proxecto
EcoRaee,
que xa tirou conclusións: a
reutilización dos
aparellos eléctricos e electrónicos é máis eficiente que a
reciclaxe. Así, na actualidade, a meirande parte destes produtos
son reciclados, fundindo as súas pezas para fabricar outros novos,
pero moitos dos seus compoñentes son altamente contaminantes.
Por se
isto non abondase, estímase que o 4% do lixo xerado no continente é
electrónico e calcúlase que para 2020 trataranse de maneira
inaxeitada 4,3 millóns de toneladas cada ano de computadores,
móbiles ou consolas. Neste contexto preocupante xorde a idea de
reutilización como alternativa ao proceso de reciclaxe, recuperando
os aparellos, reparándoos e dándolles unha nova vida.
Segundo as análises e
demostracións levadas a cabo ao abeiro do proxecto EcoRaee nos
últimos anos, non é só unha alternativa, senón que é un proceso
máis eficiente: optar pola reutilización fronte á reciclaxe supón
un aforro de 45 euros en custos ambientais por cada aparello tratado.
Atendendo a todos estes datos, salientouse a necesaria
colaboración das autoridades para mellorar a lexislación que
incremente e faga máis doada a reutilización e tamén para a
concienciación da sociedade. Como exemplo da falta de coñecemento e
divulgación neste eido, explicouse que as empresas fabricantes están
obrigadas a recoller os refugallos, algo que os consumidores
descoñecen. “Até agora cando se mercaba un televisor, por
exemplo, o vendedor debía acceder a recoller o vello, pero agora,
coa entrada en vigor do novo real decreto en 2015, deben facelo aínda
que non merquemos un novo”. Isto está ligado cunha das
recomendacións de modificación do ordenamento xurídico que achegan
dende EcoRaee, para que as facturas detallen o custo de reciclaxe ou
reutilización de cada aparello. “Os fabricantes pagan un canon
para que alguén se ocupe posteriormente deses procesos, e ese canon
trasládase ao comprador e acaba formando parte do prezo de venda do
produto”, explica Vilán. Polo tanto, as empresas están obrigadas
a recoller os aparellos vellos ou estragados, xa que o consumidor
paga por ese proceso.
EcoRaee é
o sexto dos 35 proxectos seleccionados na convocatoria 2011 do
programa da Unión Europea LIFE+ dentro do subprograma de política
medioambiental e gobernanza.