O GPUL converteu a FIC nun fervedoiro de desenvolvedores e usuarios libres

Estes días, até hoxe (incluído), estívose a celebrar na Facultade de Informática da Coruña unha relevante xuntanza para ver de preto (e para implicarnos de preto) as razóns que en palabras da comunidade de usuarios e desenvolvedores de software libre inclinan hoxe en día a balanza tecnolóxica en favor dos programas non privativos. Estamos a falar da X.Org Developer’s, que se celebra dende o mércores coa presenza dalgún dos máis destacados representantes da tecnoloxía non privativa, dentro e alén das nosas fronteiras.
Por exemplo Google, Intel, AMD, NVidia, Valve ou a galega Igalia. A cita está a ser unha palestra para visualizar o potencial de grandes proxectos e para asentar os alicerces colaborativos doutras novas propostas.
Segundo informa a organización, a X.Org Developer’s é un escenario para o intercambio de coñecemento e recursos arredor de ferramentas empregadas a día de hoxe por centos de millóns de persoas de todo o mundo. De feito, céntrase en tecnoloxías gráficas libres dos sistemas de escritorio de sistemas operativos tan populares como GNU/Linux e Android.
Nesta conferencia están a participar arredor de 150 expertos procedentes de empresas líderes do sector tecnolóxico, entre as que se encontran AMD, ARM, Collabora, Google, Igalia, Intel, NVIDIA ou Valve, entre outras. Houbo charlas, obradoiros e relatorios sobre técnicas gráficas do eido dos escritorios libres. Amais, combináronse xeiras de traballo especializadas con actividades lúdicas de convivencia e intercambio de coñecemento.
As sesións da conferencia poden seguirse vía streaming a través da plataforma de vídeoconferencia da UDC.
O evento vén da man de GPUL (Grupo de Programadores e Usuarios de Linux) e a Universidade da Coruña e conta coa colaboración da Xunta de Galicia, o Concello da Coruña, a Compañía de Tranvías da Coruña e Igalia, a consultora de software libre afincada na Coruña.