O Cluster TIC Galicia incorpora a 7 novas empresas asociadas
luns, 15 de outubro do 2012
- Antonio R. del Corral é o actual presidente do Cluster TIC Galicia, e amosou a súa satisfacción polas novas incorporacións
As empresas presentes en Galicia e con implantación
internacional, Alba Technology Altia, Blusens, HP, Idom, Satec e Vodafone, pertencentes ao sector industrial, a
consultaría, os servizos de telecomunicacións e a enxeñaría, incorporáronse
como socias ao Cluster TIC Galicia, o
que representa un importante pulo para o proxecto do Cluster TIC, centrado na
captación de recursos e o desenvolvemento de proxectos que supoñan a creación
de valor para as empresas do híper-sector das tecnoloxías da información e da
comunicación de Galicia.
Neste modelo, as firmas de maior tamaño xogan un papel fundamental pola súa
capacidade para xerar proxectos tractores e impulsar a comercialización de
produtos tecnolóxicos galegos nos mercados internacionais. Este efecto de
arrastre significa para as empresas pequenas unha axuda para o desenvolvemento
de capital intelectual, que é o factor chave para a súa competitividade.
Antonio Rodríguez del Corral, presidente do
Cluster TIC Galicia e representante de R na entidade, manifestou a súa
satisfacción polas novas incorporacións, sinalando que van responder á
confianza dos novos socios do Cluster “xerando negocio para as empresas,
axudándolles na súa internacionalización e atraendo capital ao sector. En
definitiva, sendo útiles aos nosos socios”.