GAIN mobiliza 3,2 millóns para contratos-programa nos nosos centros tecnolóxicos e de investigación
luns, 17 de xullo do 2017
- Unha xornada de traballo recente celebrada no Centro Tecnolóxico Aimen
GAIN (Axencia Galega de
Innovación) informou estes días da
posta en marcha dunha convocatoria de axudas con 1,87 millóns de
euros para novos contratos-programa cos nosos centros tecnolóxicos e
de apoio á innovación. Á iniciativa, que xa rematou o prazo
para a achega de candidaturas, presentáronse as oito entidades que
cumprían cos requirimentos establecidos. Trátase das seguintes:
Aimen, ANFACO-CECOPESCA, o Centro Tecnolóxico da Automoción de
Galicia (CTAG), o Instituto Tecnolóxico de Galicia (ITG), Energylab,
o Centro Tecnolóxico de Telecomunicacións de Galicia (Gradiant), o
Centro Tecnolóxico de Investigación Multisectorial (CETIM) e o
Centro Tecnolóxico da Auga (CETAQUA).
De maneira paralela, a
Consellería destinou 1,34 millóns de euros á sinatura de
contratos-programa cos centros de investigación sanitaria da
Fundación de Investigación, Desenvolvemento e Innovación Ramón
Domínguez; a Fundación Profesor Novoa Santos, a Fundación
Biomédica Galicia Sur, e a Fundación Pública Galega de Medicina
Xenómica,así como cos centros galegos do Instituto Español de
Oceanografía e do Consello Superior de Investigacións Científicas.
En total GAIN mobilizou
3,2 millóns de euros para estes contratos-programa cos que, nas súas
palabras, “quérese promover a excelencia científico-técnica e a
posta en valor do coñecemento, impulsando tamén a colaboración co
tecido empresarial para potenciar o impacto na competitividade das
empresas e o crecemento da economía galega”. Ademais, engade a
axencia, “a través dos contratos-programa axúdase aos diferentes
centros a orientar a súa estratexia a medio prazo e potenciar as
principais liñas de investigación”.