Biostatech organiza en Santiago un curso de introdución á contorna libre R
mércores, 11 de setembro do 2013
A firma galega Biostatech,
xurdida ao abeiro da área de bioestatística da Universidade de
Santiago, informa dunha interesante actividade formativa sobre
software libre. Máis polo miúdo, trátase dun curso
de introdución ao programa estatístico R, achegando formación
básica sobre este contorno
informático estatístico (análises de datos, xeración de
gráficas, recursos para a docencia) e previsto para celebrarse na
aula Novoa Santos (aula 1) do Complexo Hospitalario Universitario de
Santiago (CHUS), entre os días 23 e 26 de setembro e en horario de
tarde. O curso virá da man de Mónica López Ratón, licenciada en
Matemáticas e Máster en Bioestatística pola USC. Segundo informa a
empresa, contará con persoal de apoio para acadar “unha formación
completa e íntegra”.
A actividade inclúe un total de 22 horas
formativas, 18 presenciais e 4 de traballos prácticos a través de
plataforma web, presentarase de forma teórica e práctica un
interesante programa a través do que o alumnado acadará os
conceptos básicos para poder empregar a potente ferramenta
estatística R. Segundo informa a empresa e reflicte Mancomún,
o programa inclúe unha introdución á contorna libre, á estrutura
da información que achega e ao manexo e manipulación dos datos que
permite, entre outras moitas cousas. Por certo que é preciso que os
asistentes dispoñan do seu propio equipo portátil co software
instalado para poder seguir as prácticas. Para facilitar esta
preparación, antes do comezo do cursos remitiranse aos inscritos as
instrucións de descarga e instalación do software R para os
distintos sistemas operativos, GNU/Linux, Mac OS X e Windows.