Telefónica segue ampliando nos nosos concellos a súa cobertura de tecnoloxía FTTH, e un dos termos municipais onde se veñen de dar importantes avances é o de Mazaricos (A Coruña), onde xa hai 582 novas vivendas e locais incorporadas á rede galega de unidades inmobiliarias que teñen ao alcance da man da fibra da operadora, e que se unen, tamén ás preto de 300 unidades de Mazaricos que xa dispuñan previamente do servizo.

A Cámara de Comercio da Coruña vén de lanzar unha iniciativa para encher de formación online o panorama galego do emprendemento xuvenil, máis polo miúdo ás mozas e mozos innovadoras/es de idades comprendidas entre os 16 e os 29 anos. Estamos a falar da Aula Virtual da entidade cameral coruñesa, que arrinca cun catálogo inicial de 10 cursos subvencionados ao 100% polo Fondo Social Europeo e a Cámara, enmarcados no Programa PICE, que tamén ofrece axudas á contratación.

O Concello de Santiago presentou este luns os detalles da quinta edición do concurso #Fotolingua, que, segundo fixo saber, renova o obxectivo de visualizar nas redes sociais os negocios que se comprometen co uso de galego. A nova edición do certame foi presentada en rolda de prensa pola concelleira de Políticas Lingüísticas, Noa Díaz, quen lembrou que calquera persoa pode participar publicando nas redes fotografías orixinais que capturen elementos da paisaxe comercial nos que se amose o galego (letreiros, escaparates, carteis, sinalizadores, catálogos, etiquetaxe, menús...).

Está previsto que entre agosto e setembro Samsung presente os seus novos móbiles insignia da familia Note, que previsiblemente continuarían a liña marcada polos S20, o que confirmaría unhas imaxes filtradas a través da páxina web rusa de Samsung, onde puido verse o que sería o Samsung Galaxy Note 20 Ultra.

A Rede galega non descansa, nin sequera nun período tan complexo dende o punto de vista social, económico e sanitario como este que estamos a vivir. Sen ir máis lonxe, este mes de xullo colle impulso unha nova iniciativa galega online, o sitio Agora.gal, unha iniciativa de agregación de contidos cuxo obxectivo é “xuntar nun mesmo portal o mellor da Internet en galego”, un eido de actividade que, segundo destacan os impulsores da plataforma, converteuse nun fervedoiro de medios e blogs que atesouran gran calidade e reflicten as temáticas máis diversas. Para dar conta deles e do seu traballo, achegándoo á comunidade lectora, nace Agora.gal.

A asociación Startup Galicia (Startup.gal), comunidade aberta de emprendedoras e emprendedores galegas/os da innovación, vén de achegar a súa particular contribución a prol do emprendemento e a innovación nesta carreira pola Presidencia da Xunta na que estamos a día de hoxe mergullados, unhas eleccións que moveron ao colectivo a elaborar unha serie de propostas de acción para tratar de empurrar e desenvolver o ecosistema de empresas tecnolóxicas e innovadoras en Galicia. Froito deste labor de reflexión colectiva xurdiu un manifesto con 10 ideas concretas que a asociación vén de compartir coa comunidade internauta.

A Tecnópole de Ourense (Parque Tecnolóxico de Galicia) vén de pór en marcha unha iniciativa para a mocidade dobremente innovadora e pioneira: o Campamento Tecnolóxico de Galicia. E dicimos o de “dobremente” porque se trata do primeiro campamento tecnolóxico galego e, tamén, do primeiro que se desenvolve en clave virtual (co fin de garantir as mellores condicións de seguridade sanitaria para as e os participantes). O T2W (Tecnópole Technological Workshops), que ata o de agora era presencial, cumpre a súa oitava edición. Vén da man da Tecnópole e conta coa colaboración da Consellería Economía (GAIN).

Estes días está a chegar ao mercado español o Motorola One Fusion+, un smartphone con cámara cuádrupla cun sensor principal de 64 Mpíxeles e boa autonomía que busca convencer aos usuarios cunha pantalla Total Vision de 6,5 polgadas IPS Full HD+ e un son que promete graves 4 veces máis potentes, ou sexa, que estamos ante un teléfono que coida tanto a creación como a reprodución de contidos audiovisuais.

A compañía galega SIVSA, referente tecnolóxico estatal e europeo, vén de presentar detalles do seu novo prototipo destinado a apoiar aos profesionais médicos nas súas decisións: Tatanka, un sistema de soporte para facilitar o día a día dos facultativos nas súas resolucións médico-terapéuticas. En palabras da empresa viguesa, este modelo de coñecemento permite, entre outras aplicacións, “establecer un diagnóstico personalizado, facer un prognóstico preciso dun paciente ou medir en detalle a evolución dunha lesión”.

Continúa nesta segunda semana da xullo a actividade da rede SmartPEME da Deputación de Pontevedra, achegando máis formación tecnolóxica (unha formación máis relevante ca nunca de cara á produtividade, á competitividade, á empregabilidade e ás posibilidades de superarmos fortalecidas e fortalecidos a grave crise económica e sanitaria) para persoas autónomas, pequenas e medianas empresas e profesionais. O novo paquete formativo, que tamén se achegará de maneira virtual, vén con sete novas accións.

A Consellería de Cultura e Turismo e a AMTEGA veñen de remitir ás Comunidades autónomas polas que discorre o Camiño de Santiago o protocolo para adherirse a canle sobre a Ruta Xacobea que porán en marcha a Xunta e Google. Con este protocolo búscase formalizar a invitación que a Administración autonómica trasladou ás Comunidades no reunión do Consejo Jacobeo celebrada o pasado 4 de maio, para sumarse a iniciativa liderada por Galicia e colaborar na difusión e promoción internacional do Camiño de Santiago.

Hai algo máis de tres anos Horizon Zero Dawn chegou a PlayStation 4 como un xogo exclusivo realmente impresionante, que converteríase nun dos grandes exemplos de aproveitamento da PS4. Pero este título postapocalíptico no que a protagonista Aloy ten que enfrontarse a criaturas mecanizadas moi variadas e desafiantes sorprendeu polo feito de que Sony permitise que Guerrilla Games o levase a ordenadores persoais, feito que por fin xa ten data, e será o vindeiro 7 de agosto canto a edición completa do xogo (ou sexa, coa súa expansión) chegue a Steam e á Epic Game Store a un prezo de 49,99 euros (mentres que na PS4 pode adquirirse por 19,99 euros xa que forma parte dos PlayStation Hits).

A Deputación e a Universidade da Coruña veñen de xuntar forzas para garantir que os concellos apliquen as mellores prácticas en relación á seguridade informática. O presidente da entidade provincial, Valentín González Formoso, e o reitor da UDC, Julio Abalde, asinaron este venres un convenio para formar persoal das administracións en materia de protección de datos, sentando os alicerces dun curso de posgrao sobre cumprimento legal e privacidade.

Kongregate é unha páxina web creada en 2006 que durante anos gozou de moito sona por ofrecer xogos en Flash que funcionan directamente no noso navegador web, chegando a superar o seu catálogo os 128 mil xogos, pero agora que a tecnoloxía Flash está a piques de rematar a súa extinción absoluta, anuncian que deixan de recibir novos xogos en Kongregate.com.

Este verán o sector dos videoxogos quedou sen eventos presenciais aos que poder achegarse para poder probar os vindeiros xogos que van a chegar ao mercado, e para suplir esta carencia dende Microsoft decidiron organizar entre os días 21 e 27 de xullo o Summer Game Fest Demo Event, unha cita para usuarios de Xbox One no que aseguran que estrearán máis de 60 versións de demostración totalmente novas de xogos en desenvolvemento, que os usuarios poderán probar de balde.

A Consellería de Medio Ambiente, Territorio e Vivenda acaba de activar esta mesma semana unha nova funcionalidade dentro do visor telemático do Instituto de Estudos do Territorio (IET) que permite localizar e consultar información sobre todas as praias da comunidade.

Finalmente xa sabemos cales son os proxectos seleccionados no HACKatHOME, o hackathon virtual organizado pola axencia autonómica GAIN durante catro xornadas, xuntando persoas de diferentes ámbitos innovadores, co apoio de empresas e centros tecnolóxicos e universidades, para desenvolver solucións innovadoras que dean resposta ás necesidades xeradas polo coronavirus na industria, o comercio e o emprego. Un dispositivo para minimizar o contacto con superficies como pantallas informativas ou máquinas de vending, un supermercado online que mellore a experiencia de compra a través da simulación en 3D e unha aplicación para organizar feiras virtuais son os tres proxectos seleccionados.

O Concello de A Pontenova vén de publicar un novo portal web para mostrar de maneira máis integral, eficaz e universal os seus atractivos turísticos. Trátase de www.turismoapontenova.es, unha páxina coa que se queren achegar aos visitantes e viaxeiros todas as propostas que ofrece o municipio, con contidos en galego, español e inglés. Este proxecto conta cun orzamento de preto de 22.000 euros do Plan Único da Deputación de Lugo.

O director xeral de Defensa do Monte, Tomás Fernández-Couto, estivo este 3 de xullo na base de helicópteros de Silleda para entregar catro drons aos axentes ambientais das brigadas de investigación de incendios forestais (BIIF), catro vehículos aéreos non tripulados cos que se poderá localizar incendiarios e mellorar a vixilancia preventiva, a detección e a extinción de lumes.

A aula de informática municipal do Concello de Teo vén con tecnoloxías para a rapazada nesta recta inicial do verán: un programa de dous obradoiros de robótica para achegar lecer, coñecementos e formación útil, entretida e segura ás crianzas do concello. O primeiro obradoiro, baixo o título Scratch+Lego está dirixido a nenos/as empadroados/as no concello de 8 aos 11 anos. Será do 13 ao 17 de xullo de 10 a 12 horas na aula de informática municipal. Durante as 10 horas que dura o curso as persoas participantes construirán robots de Lego e comezarán a programar coa ferramenta de programación para escolares Scratch.