A Casa da Xuventude de Ourense acolle este sábado a nova xuntanza de Trasno
luns, 23 de maio do 2011
Trasno, un dos colectivos que máis está a
traballar polo afianzamento na nosa terra dunha Sociedade da Información accesíbel
dende tódolos puntos de vista (económico, produtivo, a nivel de estándares,
adaptábel ás necesidades particulares de cada quen), vai celebrar o vindeiro 28
de maio a
súa seguinte xuntanza trasneira.
A cita será en Ourense, na Casa da Xuventude,
e comezará cunha asemblea xeral ordinaria na que se fará reconto do acadado e
estableceranse os vieiros inmediatos a seguir pola plataforma, para logo dar
renda solta a un fondo e participativo debate sobre tradución ao galego de
software libre. A Trasnada 11.0, de feito, será máis que nunca un obradoiro colectivo
de traballo entre usuarios e deseñadores de software libre e tradutores.
De feito, informa o colectivo Trasno, están
convidadas/os a participar neste debate sobre presentes e vindeiros consensos
de localización ao galego tódalas e tódolos tradutoras/es de programación
aberta que desexen pór o seu gran de area no traballo conxunto. Esta rolda de
intercambio de datos, libre para o público en xeral, dará comezo sobre as 12.00
e proseguirá ao longo do resto da xornada.
De xeito complementario á rolda de debate,
engade Trasno, celebraranse actividades de promoción e formación en
localización á nosa lingua de programas abertos. A primeira hora da tarde, ás
17:00, terá lugar un relatorio na que se conmemorarán os 11 anos de Proxecto
Trasno, repasarase a súa historia e exporanse os logros en tradución feitos
este último ano. Ás 18:00 terá lugar un curso rápido de formación en tradución
de software libre, que permitirá aos asistentes adquirir nocións de abondo como
para comezar a participar no proxecto. O evento clausurarase ás 19:30.
Con independencia da axenda da xornada,
informa Trasno, “calquera pode achegarse
en calquera intre ao evento e coñecernos de primeira man”.
A Trasnada forma parte das actividades que
Trasno realiza co financiamento da Xunta de Galicia a través do Convenio de
Colaboración das AGUSL coa Secretaría Xeral de Modernización e Innovación
Tecnolóxica da Xunta de Galicia incluído dentro do Plan de Acción FLOSS 2011.
Nos vindeiros días irase fornecendo aos internautas galegos de máis información
sobre a xornada, deixándose a porta aberta para a inclusión dalgunha que outra
sorpresa no programa de actividades.