Vitae convoca un curso para converter as reunións de traballo en áxiles e produtivas
mércores, 11 de setembro do 2019
Entre
as numerosas accións formativas que ten programadas a consultora
galega Vitae para este outono, todas elas co nexo común de facernos
avanzar como profesionais dos sectores máis estreitamente ligados á
innovación, figura un curso directamente encamiñado a mellorar nas
xuntanzas de traballo os parámetros de eficiencia, eficacia e
rendibilidade. Estamos
a falar do Curso Reunións Áxiles con Scrum, Axilidade Avanzada,
unha actividade de 10 horas programada para os días 4 e 5 de outubro
e impartida por Josefina Alonso. A cita vén con opción de
Certificación Scrum Manager. Celebrarase en Vigo, no Centro Social
Abanca, no número 24-26 da rúa Policarpo Sanz.
Segundo
nos conta Vitae poñéndonos en antecedentes, as reunións constitúen
decote unha perda de tempo e esforzo para os traballadores dunha
empresa tecnolóxica, ou de calquera outro sector. Os principais
inimigos das xuntanzas laborais son a falta de obxectivos claros, de
axenda de traballo, de necesidades ou de expectativas. Todos estes
condicionantes soen derivar en perdas de tempo ao abeiro dos nosos
proxectos e organizacións. A nova achega formativa de Vitae tenta
establecer unha serie de boas prácticas que nos axuden a realizar
“reunións produtivas, curtas e que sexan quen de aportar valor,
así como afondar nas xuntanzas máis relevantes de axilidade
concretamente de Scrum”.
No
obradoiro explicaranse as regras básicas así como os métodos e
técnicas máis requiridos para conducir con éxito as reunións de
Scrum. O curso proporciona 55 PDA para a Certificación Scrum Manager
e, segundo informa Vitae, non é preciso ter cursado o curso troncal
de Scrum Manager.
A
encargada de impartir estes contidos será Josefina Alonso Nocelo,
enxeñeira superior en Informática e na actualidade coordinadora de
Proxectos e responsábel de Seguridade da Calidade do Desenvolvemento
de Software na dirección de Electrónica HMI do Centro Tecnolóxico
de Automoción de Galicia, o CTAG. Josefina Alonso, ademais, posúe
unha ampla experiencia nos eidos do desenvolvemento de software e do
asesoramento empresarial e a centros de I+D (traballou para a Axencia
Europea do Espazo, o CTAG, o CITIC, Tecnocom, SIVSA, Seresco,
Coremain ou Balidea, entre outras moitas entidades).