Salvador Naya presenta o proxecto da Cidade das TIC nun simposio internacional na Universidade de Durham
luns, 4 de xullo do 2022
O
vicerreitor de Política Científica, Investigación e Transferencia
da Universidade da Coruña, Salvador Naya, participou como relator
nun simposio internacional con varios expertos de todo o mundo,
celebrado na Universidade de Durham co obxectivo de “debater a
protección do patrimonio cultural”. Neste foro analizouse, entre
outros temas, a recuperación de espazos ou a xestión do patrimonio
cultural ante os problemas económicos, sociais, políticos e globais
e como se pode axudar ás institucións e organizacións patrimoniais
desde a Universidade.
O
simposio incluíu unha mesa de debate copresidida polo profesor da
UNESCO Robin Coningham, co Departamento de Arqueoloxía da
Universidade de Durham e a doutora Mariann Hardey, da Escola de
Negocios, con contribucións adicionais de especialistas que se
uniron ao panel desde Ucraína. Nesta mesa discutiron os efectos do
actual conflito en Ucraína sobre o patrimonio cultural e o que hai
que facer para protexer e reconstruír o patrimonio cultural do país.
Outros
relatores foron o profesor decano executivo Kieran Fernandes, que
abriu o evento, a coordinadora do Patrimonio Mundial de Durham, Jane
Gibson, e a profesora de medios interactivos da Universidade de York,
Marian Ursu. A eles uníronse o presidente da Asociación de
Investigación de Viaxes e Turismo, Olivier Henry-Biabaud, e o
profesor asociado de Estudos de Turismo Cultural en Chiang Mai,
Ploysri Porananond.
A
recuperación-transformación da antiga Fábrica de Armas da Coruña
Neste
contexto, a intervención do vicerreitor Naya tratou sobre a
experiencia da recuperación da antiga Fábrica de Armas coruñesa
nun
proxecto innovador no eido das Tecnoloxías da Información e a
Comunicación (TIC), como é o da Cidade das TIC. Baixo o título
ICT city Project (Project to create an ICT and digital innovation
in A Coruña), o vicerreitor explicou a transformación que se
pretende levar a cabo co liderado da Universidade da Coruña,
espertando gran interese entre os asistentes ao simposio.
