SES Astra amosou en Santiago os atrancos e gastos que está a xerar o uso integral da TDT
martes, 18 de novembro do 2014
- Luis Sahún, director xeral de SES Astra, este martes en Santiago
A empresa
SES Astra estivo este
martes en Santiago para
reunirse con profesionais e empresas da nosa terra do ámbito da TV e
as telecomunicacións e, tamén, para dar a coñecer aos medios
de comunicación os seus puntos de vista sobre os cambios que estamos
a vivir por mor da liberación do Dividendo Dixital (a liberación da
banda 800 MHz para dar sitio aos operadores de telefonía e a súa
tecnoloxía 4G), algúns deles molestos para a cidadanía
(resintonización, reantenización) e, en palabras da empresa, caros
de máis. A mensaxe de SES Astra foi clara: en 2010 a Administración
central tomou a decisión equivocada ao apostar de xeito integral
pola Televisión Dixital Terrestre, a TDT.
Segundo
fixo saber aos medios Luis Sahún, director xeral da compañía,
daquela (en 2010) xa se sabía que se ía ter que liberar o Dividendo
(en varios procesos) e tamén se sabía que ía haber interferencias
coa 4G, igual que se coñecía que a TDT non era a mellor opción
para amplas áreas da nosa xeografía. “O ideal”, dixo Sahún,
“tería sido un escenario de convivencia de tecnoloxías onde cada
quen puidese elixir a que máis e mellor lle acaese”. Pola contra,
esta situación, engadiu, si que se dá noutros países da nosa
contorna, o que pon a España nunha situación de clara desvantaxe e
perdendo unha boa cantidade de oportunidades de desenvolvemento. “O
satélite é inmune a todos estes cambios e transformacións que se
fan con diñeiro público, e que se impulsan con axudas que temos
que pagar todas e todos”, explicou o director xeral de SES Astra,
quen tamén quixo romper unha lanza a favor da igualdade: “Queremos
que se trate ao satélite de xeito neutral con respecto a outras
tecnoloxías”. Na súa opinión, este intre que estamos a vivir,
cos problemas de adaptación dos que imos ser testemuñas (e
“vítimas”) ao longo dos meses vindeiros, é o intre de
rectificar.
A
xuntanza en Santiago de SES Astra cos profesionais galegos artellouse
en base a unha serie de presentacións. Unha delas tivo que ver coa
televisión con tecnoloxía de Ultra Alta Definición, da que se
puido ver un exemplo nun dos claustros do Hotel Monumento San
Francisco, cunha pantalla Samsung recibindo sinal por satélites
Astra e achegando unha calidade de 8 millóns de píxeles. A conto da
abraiante calidade de imaxe e son fornecida, os responsábeis de SES
Astra sinalaron que botando man da TDT “sería imposíbel” acadar
un nitidez e definición semellante.
A
compañía SES Astra, que conta con máis de 50 satélites en órbita
cubrindo o 99% da poboación mundial, amosou en Santiago (paralelo ao
encontro coa prensa) os detalles sobre os vindeiros pasos do
audiovisual en Galicia. Segundo fixo saber a firma, “non será a
derradeira vez que a TDT sufra modificacións”. Ao fío disto, Luis
Sahún engadiu que “o espectro radioeléctrico é limitado, e a
demanda de servizos de mobilidade medra de xeito exponencial, polo
que xa está decidido que a banda de 700 MHz se asigne a estes
servizos, tendo que acometerse unha vez máis, no futuro, novas
actuacións e investimentos no que afecta á TDT”.
Tamén
fixo saber que en xuño de 2013, a Comisión Europea de Competencia
declarou ilegais e incompatíbeis co mercado europeo as axudas
públicas encamiñadas a dixitalizar a televisión en zonas remontas
e pouco poboadas do Estado, incluída Galicia, lugares alén dos
compromisos oficiais de cobertura. A Comisión, dixo, determinou a
obriga de recuperalas dos beneficiarios das mesmas. Como consecuencia
disto, “o conxunto de Comunidades Autónomas deberá recuperar dos
beneficiarios máis de 230 millóns de euros”. O gasto público
encamiñado en Galicia a dixitalizar a TV nestas zonas ascendeu entón
“a 17 millóns de euros”, engadiu.