PC City abre este sábado en Santiago unha tenda que contará con 20 profesionais galegos

Se cadra os veciños e veciñas de Santiago xa estarán ó tanto desta nova, sobre todo se pasaron por ese curruncho onde se arrexuntan as rúas Hórreo e República Arxentina e onde xa está collendo corpo un rechamante establecemento de produtos vinculados á informática. Tanto para os que xa viron a tenda como para os que non teñen constancia dela, dicirlles que se trata dunha nova sucursal da cadea PC City (e van 2 na nosa terra, con esta de Compostela incluída), que vai abrir as súas portas este sábado 8 de setembro e que, segundo informa a propia empresa, vai contar con 20 profesionais galegos, entre os que se inclúe a xefa do establecemento, Teresa Varela.
O caso é que PC City semella que está a desembarcar en Santiago pola porta grande. E tanto, por así dicilo: a superficie da tenda é de 890 metros cadrados e dará cabida a ata 4.000 referencias. Segundo informa a propia casa, “este novo establecemento confirma o interese de PC City por acadar maior espallamento en Galicia, onde xa contaba con outro centro na Coruña dende 2005”.
Subliñar que a empresa ocupa neste intre os postos altos do ranking de puntos de distribución de produtos informáticos en Europa, e que está presente en 28 países do continente. Pertence ó grupo DSG (antes Grupo Dixons) e traballa en España dende 2000, país no que conta con 1.600 empregados e 31 sucursais. As tendas de PC City están especializadas na venda de equipos informáticos de sobremesa, portátiles, impresoras, televisores, pantallas, software, cámaras dixitais, consolas ou videoxogos.