Os enxeñeiros de Telecomunicación presentan o documento-marco para garantir e optimizar a implantación do fogar dixital
luns, 15 de outubro do 2012
- Ramón Bermúdez de Castro e Mar Pereira na presentación da guía, na Cidade da Cultura
O
fogar dixital non vai resultar só un pulo fundamental para o acceso
ao coñecemento, tamén vai significar a mellora na calidade de vida
de amplos sectores da nosa poboación. Isto, lonxe de ser unha
realidade afastada, é algo que temos ao alcance da man, grazas en
boa medida ao traballo desenvolvido pola Asociación de Enxeñeiros
de Telecomunicación (AETG), que, como
xa avanzamos dende Código Cero, estivo (e está) a traballar
conxuntamente coa Axencia para a Modernización Tecnolóxica de
Galicia (AMTEGA) na materialización dos mellores alicerces para
permitir e asegurar a evolución na nosa terra das vivendas
conectadas (no pleno sentido do termo). Froito disto é a elaboración
da Guía práctica para a implantación
do Fogar e do Edificio Dixital, un
documento-marco que se presentou este luns na Cidade da Cultura de
Santiago e que se perfila como obra de referencia para todas e todos
os que queiran participar neste desenvolvemento.
E son
moitas e moitos os que poden participar. Tanto a nivel de usuarias/os
como de provedores ou impulsoras/es en calquera das súas vertentes:
promotores, arquitectos, construtores, provedores de servizos,
técnicos municipais, enxeñeiros de telecomunicacións,
administracións públicas, etc. O documento-marco, elaborado pola
AETG e a devandita axencia AMTEGA, foi debullado en detalle polo
presidente da asociación, Ramón Bermúdez de Castro, quen fixo
fincapé na vertente práctica que introduce esta guía, xa que
“contén toda a información precisa
en termos técnicos e económicos sobre a implantación do fogar
dixital e que servirá de referencia a tódolos sectores involucrados
no seu impulso”. Bermúdez de Castro,
que aproveitou a ocasión para lembrar que os profesionais galegos do
sector teñen unha cita ineludíbel o vindeiro 26 de outubro (a Noite
Galega das Telecomunicacións, desta volta centrada nunha
cuestión que vén moi a conto: a cidade dixital), deu paso a unha
xornada de carácter práctico e dirixida a tódolos especialistas
implicados na cuestión. No encontro estiveron presentes os
principais profesionais técnicos do fogar dixital dos 315 concellos
galegas e das entidades máis representativas neste ámbito.
A cita
tamén contou coa presenza de Mar Pereira, directora de AMTEGA, que
salientou
cuestións de orde social e sanitaria vinculadas ao espallamento do
fogar dixital, un concepto, dixo, que non só muda o noso xeito de
acceder á información, senón tamén o noso xeito de vivir. As
vivendas conectadas do futuro son, dixo, importantes oportunidades
para que unha boa parte da nosa cidadanía adquira máis autonomía e
calidade de vida (persoas dependentes, con diversidades funcionais ou
motrices, doentes crónicos, etc). Ao seu xuízo, a chegada do fogar
dixital é todo un reto que esixe pleno acceso ás telecomunicacións,
precisamente “unha das liñas
prioritarias do Goberno galego, que hoxe en día achega xa o 92,5% da
cobertura prevista”.
A presentación da guía
tamén serviu, xa en materia, para avaliar o propio concepto de fogar
dixital e as súas implicacións: unha vivenda onde converxen
infraestruturas (primeiro), equipamentos (segundo) e servizos
(terceiro), satisfacendo necesidades actuais dos habitantes. Por
certo que de darse as dúas condicións primeiras (estruturas e
equipos), a listaxe de servizos resultante pode ser infinita,
lembraron os responsábeis do documento-marco presentado. Estes
requirimentos, máis doados de cumprir para as vivendas máis
recentes (sobre todo as construídas a partir de 1998, coa aprobación
das normativas específicas que obrigan a estruturas comúns de
acceso), veñen detallados na devandita guía, un documento consenso
chamado a orientar as actuacións de tódolos axentes implicados “co
obxectivo de garantir o correcto e homoxéneo desenvolvemento destas
infraestruturas TIC nas novas construcións que se leven a cabo en
Galicia”, sinala a AETG.
A publicación, por
certo, foi entregada na súa versión electrónica aos asistentes á
súa presentación, e no seu seo recóllense datos precisos, en
termos técnicos e funcionais, sobre a definición e desenvolvemento
do edificio e fogar dixital, incluíndo inmobles residenciais e non
residenciais e as vivendas unifamiliares. O documento tamén abrangue
a estimación económica do afianzamento da vivenda dixital,
analizando o investimento preciso para a preinstalación do mesmo.
Segundo fixo saber
Bermúdez de Castro, o pulo a este novo concepto de espazos
familiares ou empresariais plenamente conectados “é un
obxectivo estratéxico de calquera sociedade avanzada, base da cidade
dixital ou cidade intelixente, un concepto máis amplo, eixe vital da
Axenda Dixital Europea, que define o espazo urbano como un ecosistema
de innovación aberta, unha cidade mellor xestionada, máis sostible,
máis habitable e, en definitiva, con mellor calidade de vida, grazas
ao emprego de múltiples tecnoloxías e dispositivos para transmitir
información útil e prestar servizos aos cidadáns”.