O proxecto en liña Xente con Vida acada as 420.000 páxinas vistas
martes, 21 de agosto do 2012
Xente con Vida é un proxecto en liña posto a andar
pola Consellaría de Sanidade para axudar á cidadanía galega a levar unha alimentación
saudable, que dende a súa estrea no pasado mes de marzo, acadou xa as 420.000
páxinas vistas.
A iniciativa, que está
presente na Rede a través dunha web, un blog de seu, e perfís en Facebook e
Twitter, ten por obxectivo informar ás persoas usuarias sobre temas
relacionados coa saúde e a boa alimentación, e vistos os datos de visitas
recadados, pódese dicir que a acollida entre a poboación é moi boa.
Tan boa que en 18 semanas
a web e o blog de Xente con Vida
sumaron 125.297 páxinas vistas (o que supón unha media diaria de 930 páxinas
vistas) e 25.413 visitas, é dicir, 5 páxinas vistas por visita e día. O
director xeral de Innovación e Xestión da Saúde Pública, Manuel Varela Rey, que
recentemente fixo balance da iniciativa, resaltou que os artigos da web teñen
unha valoración moi positiva por parte da cidadanía, “cunha media de 4 puntos sobre 5 posibles”, apuntou.
Os contidos máis
comentados e compartidos polos usuarios, explicou Varela, “son as propostas de menús infantís e para toda a familia; os artigos
sobre mantemento de peso; os consellos para previr enfermidades; e as
informacións sobre mitos en torno a alimentación”.
No que atinxe ao seu
perfil en Facebook, Xente con Vida
suma xa 295.000 páxinas vistas, máis de 700 fans, 2.300 accións dos usuarios e
87 mensaxes publicados, con 32.000 persoas de alcance real.
Pola súa banda, Twitter
estase a perfilar como unha canle de comunicación directa con profesionais do
eido sanitario, nutricionistas e expertos en alimentación, profesores e
cidadáns con interese na alimentación saudable.
Todo isto, sinalou o
director, “sen investimento publicitario,
polo que se trata, segundo destacou, dunha iniciativa dunha grande eficiencia”.
A maiores hai que engadir
que a partir do vindeiro mes de setembro, a web ampliará o abano temático coa
inclusión da categoría de exercicio físico, coa que os responsables achegarán
información relativa á práctica deportiva saudable para a mellora da calidade
de vida dos galegos e galegas.