O festival en liña Animacam bótase á vida real na Coruña, en febreiro no MAC

Animacam, o festival galego de cinema e animación que naceu na Rede e para os internautas, vai dar o chimpo ao mundo real. Máis polo miúdo, a un mundo real ben concreto: o do Museo de Arte Contemporáneo Gas Natural Fenosa (MAC) da Coruña, entre os días 5 e 8 de febreiro. O festival, do que temos falado en Código Cero para salientar entre outras cousas a súa aposta polas canles en liña ou os recoñecementos ás mulleres directoras feitos dende o seu seo, terá a partir dese intre unha vida dupla: como certame físico con datas e emprazamento concreto (acubillando 36 filmes) e, tamén, como certame en liña (con máis de corenta títulos finalistas, xa). Malia todo, non serán vidas que se exclúan. De feito, a metodoloxía usada para votar as melloras obras na primeira andaina do festival (o xurado son os internautas), será semellante na segunda andaina: vota o público.
Lembrar que Animacam comezou coñecéndose tamén como Festival de Animación en Internet, vindo da man de Limaia Produccións (con sede en Sandiás, Ourense) co patrocinio do Xacobeo, Turgalicia e as consellerías de Cultura e de Economía e Industria.
O certame xurdiu cun obxectivo ben claro: pór en competición pezas chegadas de todo o mundo, favorecer a creación audiovisual dende todas as frontes (autores, escolas, produtoras) e, tamén, dar información sobre o Camiño de Santiago do mellor xeito (unhas biblioteca, fototeca e videoteca virtuais do Camiño cos escritos, fotos e vídeos dos peregrinos-internautas). Recordar tamén que a primeira achega de Animacam.tv, celebrada de xullo a outubro de 2008, foi visitada por máis de 75.000 internautas e rematou coa participación nas seccións competitivas de 164 filmes de animación procedentes de 33 países dos que seis foron seleccionados para cadanseus premios de 2.000 euros por votantes rexistrados dende máis de 40 países.