O Día do Emprendedor de Galicia celebrarase este martes coa vista posta nas TIC

Este martes celébrase en Santiago un evento multitudinario que, sen ser tematicamente cuestión de prioridade en Código Cero, apenas se entende, formalmente e de contido, sen a cuestión que nos atinxe: as novas tecnoloxías da información. Estamos a falar do Día do Emprendedor de Galicia na súa edición compostelá, encontro que vén da man da Consellería Economía (co IGAPE e BIC Galicia) e que servirá, entre outras moitas cousas, para pór de manifesto a importancia dos devanditos recursos dixitais á hora de asumir tódolos restos que esixe unha iniciativa empresarial, dende o primeiro elo da cadea ata o último. Estímase que a celebración reúna a máis de 2.000 persoas en Compostela, no Pazo de Congresos, ao longo de toda a xornada deste martes 25.
Segundo informa a organización, a xuntanza dará a acubillo a máis de medio centenar de relatores, algúns deles representantes das institucións públicas ligadas ao emprendemento e á innovación e outros moitos empresarios e profesionais convocados para dar conta das súas experiencias perante todas aquelas persoas que estean a piques de pór en marcha a súa propia iniciativa. Tematicamente, a xornada tocará asuntos como as posibilidades do mercado actual (nichos de potencial), as vantaxes das novas ferramentas e servizos tecnolóxicos (como a computación na nube), a busca de financiamento para empresas tecnolóxicas, etc.

Programa das xornadas en formato PDF

Cómpre lembrar que a cita de Santiago non foi a única, e que o Día do Emprendedor xa tivo edicións recentes en Ourense e Lugo, o 18 e o 20 de outubro. As sesións comezarán a primeira hora, da man do socio fundador e accionista primeiro de Intercom, Antonio González. Para tódalas persoas que non poidan acudir ao Pazo de Congresos ou que queiran completar o que alí se debata e se expoña, dicirlles que poderán facer un seguimento exhaustivo do encontro a través das diferentes redes sociais. Entre as institucións presentes na celebración estará a Consellería de Educación, que estes días está a celebrar unhas xornadas para fomentar o espírito emprendedor do alumnado e profesorado de 4º de ESO, Bacharelato e Formación Profesional, dentro das accións que se están a realizar para o Día do Emprendedor 2011. As accións desenvólvense ata o día 25, precisamente.
A xornada poderá ser seguida a través das redes sociais. As novidades do encontro estanse a comunicar no seu espazo en Facebook en LinkedIn e en Twitter. Ademais, a xornada será retransmitida a través de Twitter para todos aqueles emprendedores que non podan achegarse a Santiago de Compostela.