Femxa anuncia a contratación de 60 mozas e mozos en Vigo
luns, 4 de maio do 2015
A empresa galega Femxa,
centrada en formación e tecnoloxías para facilitar esa formación,
anunciou os días pasados que antes do remate, contratará 60 novos
traballadores. E engade: “Serán persoas desempregadas menores de
26 anos e seleccionaranse de entre os que rematen con éxito dous
cursos de balde para os alumnos”. Estes cursos son Desenvolvemento
de Produtos Editoriais Multimedia (que comezará en breve en
Vigo e do que abrollará a contratación de 45 alumnos) e Actividades
Administrativas na Relación co Cliente (que
xa foi inaugurado e do que sairán 15 dos novos traballadores). As
mozas e mozos seleccionadas/os traballarán na sede de Femxa en Vigo
a xornada completa, engadiron fontes da empresa.
A compañía tamén
lembra que arestora pasaron polas súas actividades de formación
415.000 persoas (ao longo dos seus tres lustros de traxectoria) e que
o seu obxectivo principal, un obxectivo no que se insiren as
devanditas contratacións, “é mellorar a empregabilidade dos seus
alumnos”. Desta arela xurdiu, precisamente, a súa actividade como
axencia de colocación, que segundo apuntan os responsábeis da
empresa ten unha taxa de éxito do 20%.
Doutra banda, Femxa tamén
informa que a dia de hoxe ten entre mans a posta en marcha dun
sistema para mellorar a saúde no traballo. Trátase dunha plataforma
en liña creada pola empresa Vidahora e que se centra en axudar a
crear hábitos saudábeis de actividade física, alimentación, lecer
e xestión da tensión. Desde ela e a súa aplicación móbil,
propóñense actividades semanais coas que cada persoa pode mellorar
o seu estado físico e ver os seus progresos. Os programas de saúde
están artellados en módulos trimestrais “para que os
traballadores teñan tempo de adquirir novos hábitos”, informa
Femxa, que tamén lembra que a plataforma Vidahora é un novo
proxecto empresarial galego nado na incubadora de empresas de Zona
Franca, Vía Vigo.