Familiasgalegas.org estrea un servizo en liña de orientación familiar
martes, 17 de xullo do 2012
A Consellería de Traballo e Benestar da Xunta de Galicia, vén de por en
marcha un novo servizo virtual de información e asesoramento ás familias
galegas, que se aloxa na web Familiasgalegas.org e que recolle todo o que concirne
á orientación e á conciliación da vida familiar dos galegos e galegas.
Falamos do Gabinete
de Orientación Familiar (GOF) virtual, un servizo destinado ao apoio e á
promoción da calidade de vida das persoas e das familias, ao que se accede
dende o menú principal da devandita plataforma.
O servizo en liña procura proporcionar, sempre de balde, información e
asesoramento sobre diversas cuestións, como servizos, recursos sociais,
programas específicos, disposicións legais, etc. da man de profesionais
especializados no eido da familia e da infancia.
O servizo tamén se centra na atención e prevención de posibles situación
problemáticas que se poidan dar no ámbito da convivencia cotiá, mais iso si,
sen achegar directrices sobre pautas de comportamento ou habilidades concretas,
senón información e asesoramento sobre as “portas” nas que pode petar cando
xurde calquera problema na contorna familiar.
Ademais de explicar o que é a orientación e o apoio familiar, os niveis de
actuación e o seu obxectivo, na plataforma inclúense distintas ligazóns de
interese para os usuarios do servizo, entre as que destacan a do Portal de Escolas Infantís, a da web Crecendo como pais e a web da propia
Consellería de Traballo e Benestar, entre outras.
Os e as profesionais encargadas de atender ás persoas usuarias da web proveñen
do GOF de Lugo, os cales tratarán de dar resposta, dun xeito claro e preciso,
sobre a normativa, os recursos, os programas ou calquera outra información
relativa a este ámbito de actuación, que poida ser relevante para a persoa
demandante de información, “proporcionándolle
unha visión xeral das opcións dispoñibles”, indican os seus responsables.
Este servizo virtual é anónimo; as persoas usuarias unicamente precisan
seleccionar o sexo e a idade segundo tramos, e indicar o enderezo de correo
electrónico onde desexan recibir a contestación, o que permitirá, segundo
informan dende a entidade desenvolvedora, “extraer
estatísticas e conclusións sobre as necesidades e demandas das familias galegas
e das persoas que as compoñen, segundo as variables descritas”, e en base a
isto, proceder ao desenvolvemento de novos servizos de axuda aos galegos e
galegas.