España sitúase a rentes dos 2 millóns de liñas de fibra óptica
venres, 29 de maio do 2015
Medra a banda larga fixa
en España, con liña ascendente e cunha curva de feitura alpina.
Así
o confirma o novo informe da CNMC, no que se apunta que as liñas
FTTH (fibra até o fogar) rexistraron en febreiro (por sexto mes
consecutivo) un medre superior ás 100.000 liñas. Máis polo miúdo,
en febreiro a cifra foi de 127.735, superando os 1,8 millóns. A
nivel anual, respecto de febreiro de 2014, os autores do informe
salientan “o aumento de máis dun millón de liñas FTTH, fronte á
perda de máis de medio millón de liñas con tecnoloxía DSL”.
Este tipo de liñas (ADSL) confirma na nova investigación unha liña
claramente descendente (perdeu 100.000 liñas) que contrasta
drasticamente coa suba imparábel da fibra óptica.
A CNMC tamén sinala que
as liñas de banda ancha en España medraron en febreiro un 6%
respecto ao ano anterior, acadando os 12,8 millóns. Orange, con
19.037 liñas máis que en xaneiro de 2015, liderou no devandito mes
a ganancia de liñas de banda ancha fixa, seguido de Telefónica, Ono
e Jazztel con 13.331, 9.200 e 6.139 liñas, respectivamente. Como
dato salientábel, sinalar que Telefónica cede un algo de terreo con
respecto aos seus competidores, malia seguir sendo líder cunha cota
de mercado do 45,2%, seguida de Orange cun 15,6%.
Polo que atinxe á
telefonía móbil, o total de liñas caeu en febreiro en 119.135
liñas, “debido á baixada de 217.991 liñas de prepago que non
compensou o aumento de case 100.000 liñas de pospago”, sinala a
Comisión, que engade que febreiro pechou cunha cifra de 50.472.517
liñas móbiles, o que supón un 0,8% máis que en febreiro de 2014.
A penetración foi de
108,5 liñas por cada 100 habitantes, case un punto porcentual máis
que hai un ano.
No mes de febreiro
portáronse 500.000 números móbiles, o que supón un descenso da
13,4% fronte ao volume rexistrado en febreiro de 2014. Movistar e
Vodafone foron os operadores que este mes rexistraron un saldo
negativo de portabilidade, con 44.028 e 40.404 liñas
respectivamente. En contraposición, os OMV presentaron un saldo
positivo de 78.967 e Orange e Yoigo conseguiron importar ao redor de
3.000 liñas máis das que cederon a outros operadores.