Disney adquire unha empresa de vídeo en liña por entre 500 e 950 millóns de dólares
luns, 24 de marzo do 2014
- Os fundadores de Maker Studios
Nos últimos anos puidemos ver numerosos fenómenos audiovisuais
na Internet que captaron moita atención do público, especialmente a través de
YouTube, onde podemos ver como o Gangnam Style de PSY está a achegarse aos 2.000
millóns de reproducións, e algúns youtubers
conseguen volumes de subscricións millonarios, sendo un dos grandes referentes PewDiePie con máis de 25
millóns de seguidores en YouTube. Pero esta actividade non está a ser allea ás
oportunidades de negocio, e precisamente PewDiePie é unha das numerosas canles que
están agrupadas baixo Maker Studios,
amparando a videoblogueiros independentes, proxectos de webseries e programas
de éxito como Epic Rap
Battles of History (que consegue uns 30 millóns de reproducións de media
por episodio, chegando incluso a superar os 83 millóns).
Maker Studios incluso soubo organizarse como un grupo mediático creando
sub-marcas temáticas como Polaris (para
a cultura friki), The Platform (para o mundo da beleza e a moda), Cartonnium
(para os debuxos animados infantís), The Mom’s View (para nais), Maker Music
(para descubrir música en liña) e Animonster (para animación de calidade).
Finalmente este xigante do vídeo en liña que trunfa á hora de levar os contidos
ao público a través das súas plataformas preferidas chegou a atención das
compañías tradicionais do sector audiovisual, e a
propia Disney vén de chegar a un acordo de compra por Maker Studios por uns 500
millóns de dólares, co que conseguiran un importante peso no mercado do
vídeo en liña, xa que os estudios adquiridos conta cunha carteira de máis de
55.000 canles con máis de 380 millóns de subscritores e máis de 5.500 millóns
de reproducións ao mes en YouTube, á vez que poden servir de grande axuda á
hora de dar forma aos propios contidos da Disney para a súa distribución nas
novas canles. Á cantidade pactada poderían sumárselle ata outros 450 millóns de dólares de acadarse certos obxectivos por parte de Maker Studios.