Detallan as especificacións do portátil que podería comercializar Xiaomi o ano que vén

Estamos xa afeitos a ver como os fabricantes chineses están a rachar cos prezos dos smartphones e as tabletas, e nos últimos meses rumoreouse que Xiaomi ía atacar agora ao mercado dos ordenadores portátiles, aposta con moitas incógnitas que xiran ao redor do sistema operativo que integraría o equipo, mentres que a nivel de hardware parece que as cousas están máis claras, e filtráronse as especificacións do que podería ser este ordenador que sairía á venda no mes de abril a un prezo de 2.999 iuans (425,68 euros) polo que serían bastante asumibles.
Estariamos ante equipos cun acabado que imitaría ao MacBook Air, pero cunha pantalla Full HD de 15,6 polgadas, procesador Intel Core i7 de cuarta xeración, 8 GB de RAM, gráfica nVIDIA GeForce GTX 760M (con 2 GB de memoria), e o seu sistema operativo podería ser un Linux personalizado, na liña do que Xiaomi fai con Android, aínda que é de esperar que o ordenador sexa compatible con Windows 10, de xeito que sería un dos ordenadores portátiles máis atractivos do mercado (pola súa relación entre prestacións e prezo).