Comezan os traballos para implantación da eAdministración en Compostela
luns, 4 de xuño do 2018
A
pasada semana, a sexta feira (venres), o
Concello de Santiago deu finalmente comezo ao proceso interno para a
implantación da Administración Electrónica no seo da propia
entidade local. A posta en marcha dos traballos materializouse
cunha primeira xuntanza de coordinación que estivo presidida polo
concelleiro de Medio Ambiente, Convivencia e Informática, Xan Duro.
Na reunión, a empresa adxudicataria informou aos representantes
municipais dos que serían os primeiros labores a realizar ao abeiro
do proxecto, sendo o seu obxectivo “acadar a modernización global
da xestión municipal”. O Goberno santiagués destinará máis de
1,8 millóns de euros á nova plataforma.
En
detalle, o obxectivo da reunión do pasado venres foi fixar un
primeiro calendario para o desenvolvemento e posta en marcha da
iniciativa de eAdministración de “forma gradual”. En palabras do
Goberno compostelán, trataríase do proxecto local de optimización
administrativa (e de comunicación e de xestión) “máis relevante
da historia recente do Concello”.
O
prazo para dar rematada a iniciativa é de dous anos. Entre outras
cousas, quérese botar man das máis avanzadas tecnoloxías para
“facilitarlle á veciñanza a súa relación coa administración e
permitirlle realizar a maioría dos trámites desde as súas casas,
de maneira telemática”. Para isto, habilitarase unha plataforma de
eAdministración con sede e rexistro electrónicos e un novo xestor
de expedientes. Asemade, informaron os responsábeis do Concello,
“permitirase modernizar a xestión tributaria e de tesourería ou a
xestión do padrón de habitantes”.