As televisións españolas poderían emprender medidas legais contra Zattoo

As 5 televisións xeralistas de España están a estudar medias legais contra Zattoo, aplicación que se vale de tecnoloxía P2P para a distribución do seu sinal a través da Internet, valéndose do argumento de que se a empresa responsable se considera operadora de cable estaría obrigada a emitir as seis canles analóxicas que hai no Estado.
O problema da argumentación de Zattoo é que a lexislación española cambio, de xeito que agora é preciso que as canles e as operadoras de cable cheguen a un acordo para a redifusión do sinal o que levou, por exemplo, a que Antena.Neox e Antena.Nova desapareceran da grella en aberto de R, e dende laSexta xa aseguran que Zattoo carece de autorización algunha para a difusión da súa canle polo que anuncian que están a preparar unha demanda que presentarán “o vindeiro mes de setembro”.
TVE, Antena 3, Cuatro e Telecinco tampouco ven con bos ollo a difusión do seu sinal, e tamén están a estudar as medidas a tomar ó respecto.
Actualmente Zattoo está a ter moito éxito en España, cunhas 240.000 descargas do seu programa, de xeito que a súa base de usuarios estaría a medrar entre 20.000 e 30.000 persoas cada semana.
Dende a publicación Cinco Días tamén inciden no feito de que Zattoo está a incluír na súa oferta de canles Canal 24 Horas e Teledeporte, que son dixitais, polo que a aplicación da lei na que se escuda Zattoo non sería axeitada, valendo só para as canles analóxicas.
Os responsables de Zattoo en España agardan pechar acordos coas canles de televisión en breve, pois coidan que serán quen de convencelas de que a difusión pola Rede das mesmas lles resultará beneficioso.