A memoria externa Leef iBridge amplía a memoria dos dispositivos iOS
mércores, 15 de xullo do 2015
Semella que hai
dispositivos para cada estación. Entre
os que cualificados como trebellos especialmente de verán sitúase
Leef iBridge, un solución para dispositivos iOS que, en palabras
dos seus creadores, “é moi acaido para salvarnos da temida
situación de falta de almacenamento”. Polo tanto, semella indicado
para ampliar as posibilidades de acubillo de ficheiros dos
dispositivos iOS (iPhone, iPad ou iPod). Segundo engaden os
desenvolvedores do produto, o 22% dos usuarios destes trebellos
afirma non ter espazo de abondo para almacenar fotografías e vídeos.
Polo tanto, cousas como inmortalizar e recuperar o noso primeiro baño
no mar do verán ou ese festival que tanto nos gustou están, grazas
á solución, “máis que aseguradas”, engaden.
A memoria externa é un
accesorio plug-in de características compactas e lixeiras que
ofrece aos usuarios “ampliar espazo sen necesidade de borrar as
súas prezadas fotos, vídeos ou música”. Ademais de visualizar e
reproducir os contidos desde o mesmo dispositivo, Leef iBridge tamén
permite realizar unha copia de seguridade automática dos contidos
dixitais á memoria externa, “polo que non haberá máis
preocupacións por perder documentos”, sinalan. Está dispoñíbel
en varias capacidades (16GB, 32GB, 64GB, 128GB, e 256GB), inclúe
conector USB de alta velocidade e permite a visualización inmediata
de música, vídeos e documentos. Os prezos oscilan entre os 59 euros
para o modelo de 16GB e os 399 do modelo de 256GB.