A Piuvi-Tecnópole de Ourense ofrece catro espazos de balde para outras tantas empresas de base científico-tecnolóxica
xoves, 7 de xuño do 2012
Hoxe en día, ter unha idea innovadora para un negocio emprendedor, por boa
que sexa, non é garantía ningunha de éxito se non se conta con financiamento
para desenvolvela, ou a lo menos, algo de axuda económica para dar os primeiros
pasos.
Con esta idea, a de axudar aos membros da comunidade universitaria a botar
a andar as súas ideas emprendedoras de negocio, a preincubadora do campus de
Ourense, Piuvi-Tecnópole, vén de aportar o seu gran de area, ofrecendo catro espazos
de balde no Parque Tecnolóxico de Galicia, para outras tantas empresas de base
científico-tecnolóxica.
Na iniciativa colaboran tres entidades galegas moi comprometidas sempre
neste tipo de causas, que son o Parque Tecnolóxico de Galicia-Tecnópole, a
Cámara de Comercio e Industria de Ourense e a Confederación de Empresarios de
Ourense.
A convocatoria para acceder a estas prazas foi publicada este mércores, 6
de xuño, e nela convídase a estudantes e novos titulados “a presentar proxectos emprendedores relacionados con calquera das ramas
do coñecementos dos estudos da Universidade de Vigo”, aclaran
no DUVI.
Entre as
ideas que se presenten, e logo dunha entrevista persoal, unha comisión valorará
o proxecto e elixirá un total de catro para arrancar a actividade da
preincubadora universitaria.
A cada un dos proxectos elixidos, a Tecnópole asignaralle nas súas instalacións
un espazo de 20 metros cadrados totalmente de balde, para usar libremente por
un período de 6 meses, prorrogables ata un ano.
O cubículo
dispón de electricidade, dunha liña telefónica con ata 25 euros mensuais de
consumo e dunha rede de ata 5 GB de tráfico.
Ademais, segundo explica Alberto Vaquero, director da Área de
Descentralización do campus de Ourense, os beneficiarios terán a posibilidade, tamén de xeito
gratuíto, “de aproveitar as actividades
de formación e asesoramento ofertados pola Cámara de Comercio e Industria de
Ourense e pola Confederación de Empresarios de Ourense”.
Os proxectos poderán ser elaborados individualmente ou en grupos formados por
un máximo de catro estudantes, que deberán presentar, entre outra
documentación, a descrición da idea emprendedora cunha extensión máxima de 10
páxinas, o currículo de todas as persoas solicitantes e unha carta de interese
na que xustifiquen a súa motivación para participar nesta convocatoria, así
como as súas expectativas en caso de resultar gañadores.
Na
valoración das propostas, a comisión de selección premiará criterios como o
carácter innovador do proxecto, o seu nivel de desenvolvemento e a súa
viabilidade; o potencial internacional e de creación de emprego e calidade do
mesmo; o aproveitamento dos recursos dispoñibles; a sustentabilidade e
responsabilidade social do negocio e o nivel de implicación real dos
emprendedores.