A Oficina de Acollida ao Peregrino presenta unha nova web de información estatística
martes, 28 de marzo do 2023
A
web da Oficina de
Acollida ao Peregrino estreou unha nova sección de estatísticas,
máis ampla e mellorada, que permitirá aos usuarios ter acceso a
información en tempo real dun “xeito dinámico e visual”. Así o
fixeron saber en rolda de prensa as entidades responsábeis do
proxecto: a Universidade de Santiago (a través do grupo de
investigación que coordina a profesora de Métodos Cuantitativos
Isabel Neira) e máis a Fundación Catedral de Santiago. A nova
ferramenta, indicaron, permitirá mellorar o coñecemento dos camiños
e os peregrinos que realizan o Camiño de Santiago, a través da
análise dos datos estatísticos do censo de peregrinos recolleitos
pola propia Oficina do Peregrino.
Este
proxecto de visualización foi deseñado mediante a ferramenta
informática Power BI, de Microsoft, dando forma a un sitio web que,
entre outras vantaxes, posibilita aos usuarios da web dispoñer de
paneis con obxectos visuais como táboas e gráficos interactivos a
través de filtros personalizábeis, segundo as necesidades de
información de cada quen. Desta maneira, poden obter información
detallada sobre os peregrinos que realizan o Camiño, analizando as
orixes, os camiños que percorren e as súas variábeis demográficas,
o “que contribuirá a mellorar o coñecemento sobre eles”,
explicaron na presentación.
Esta
colaboración entre a Universidade e a Catedral de Santiago,
engadiron, é “un exemplo de como a tecnoloxía e a investigación
poden contribuír ao acceso ao coñecemento e mellorar a experiencia
das persoas, de maneira que se ofrece un acceso a información
relevante e personalizada en tempo real que permita coñecer co
máximo grao de detalle a experiencia da peregrinación xacobea”.