A Deputación de Pontevedra porá na Rede a memoria histórica da provincia coa axuda de familias e entidades
luns, 19 de decembro do 2022
A
Deputación de Pontevedra puxo en marcha unha campaña para
recompilar a memoria colectiva da cidadanía no Arquivo Provincial,
aquela que quedou no anonimato no século XX silenciada pola
ditadura. Trátase
da iniciativa Cae de Caixón, un programa da área de
Memoria Histórica da Deputación que busca captar, documentar e
rexistrar fondos privados (imaxes, cartas e documentos ...) que
poidan ter interese para a poboación pola súa relación co golpe de
Estado de 1936, o tempo inmediatamente anterior ao golpe, ou da
ditadura. A información difundirase de maneira pública á sociedade
e aos investigadores a través da web
AtoPo da Deputación (buscador catálogo documental e
bibliográfico).
Segundo
explica a deputada de Memoria Histórica María Ortega, moitas
familias e entidades teñen “alfaias de interese público que deben
saír do caixón: a foto do avó que estivo preso cando era novo, ou
da avoa na época en que foi rapada”. Para a familia, subliñou,
“son só fotografías dunha persoa querida, pero para o resto da
sociedade son parte da historia dun tempo que non podemos esquecer”.
O
obxectivo da Deputación é facer que o Arquivo Provincial, subliñou
a nacionalista, “se converta no grande lapis de memoria que
recompile toda a memoria histórica que agora fica espallada nas
casas e tamén nas institucións”, asegurou. Lembrou que xa hai
colaboracións co Concello de Redondela, o de Pontevedra ou o Arquivo
Provincial estatal “no rescate de material”.
A
xefa do Arquivo Provincial (servizo de Patrimonio documental e
bibliográfico) Ana Vicente, explicou que todas as familias e
entidades que desexen achegar fotografías, documentos, cartas, ou
diarios poden facelo con total confianza porque o material será
tratado “con todo o respecto, dignidade, esmero e dedicación”.
O
obxectivo da Deputación, dixo, é facer público o material e que se
poida descargar a través de Atopo, pero sempre será decisión da
persoa, familia ou institución que cede ata que punto se debe manter
a privacidade. De feito, as persoas doantes deberán elixir se deixan
o material só para ser consultado en sala por persoas
investigadoras, se o deixan para que apareza en Atopo solicitando
permisos concretos para usalo noutros ámbitos, ou se o ceden para a
descarga libre.
Aclarou
que o material sempre quedará en mans das persoas propietarias, xa
que só o deben achegar polo tempo preciso (uns días) para que sexa
dixitalizado. Logo, os orixinais devolveranse acompañados por un
lapis de memoria (USB) con todos os fondos tamén en formato dixital.
As
persoas interesadas neste proceso poden contactar co Arquivo
Provincial, enviando un correo a memoriahistorica@depo.gal ou
poñéndose en contacto persoalmente con este departamento ou coa
área de fondos audiovisuais, onde tamén se lles informará de todo
e se concertará cita para unha primeira reunión co equipo.