A Deputación de Lugo anuncia a súa adhesión a Smart Agro nun ciclo sobre robótica agrogandeira
luns, 11 de xullo do 2022
Este
luns celébrase en Lugo a primeira xornada do ciclo de conferencias
Robótica agrícola e gandeira. A
inauguración, que se desenvolveu no salón de actos da Escola
Politécnica Superior de Enxeñaría do Campus Terra, contou coa
participación do da delegada do reitor Elvira López Mosquera, a
directora da dita Escola, Rosa Romero, e o deputado de Promoción
Económica e Socia, Pablo Rivera, quen puxo en valor a innovación ao
servizo do sector primario e salientou o exemplo da Granxa
Experimental do Leite, de titularidade provincial, como un exemplo de
tecnoloxía avanzada ao servizo da gandería. A iniciativa, que
continuará ata mañá, está organizada polo Campus e conta coa
colaboración da Deputación de Lugo.
Rivera
Capón incidiu en que o apoio á actividade agrogandeira “é
precisamente unha das liñas de actuación fundamentais da Deputación
de Lugo”. E engadiu: “Colaboramos coa Universidade de Santiago e
co propio sector produtivo para impulsar accións, coma esta, que, a
través da transferencia de coñecemento, axuden a mellorar a
competitividade, a produtividade, a diversificación e a creación de
valor engadido do sector agroalimentario da provincia”. Un dos
proxectos destacados dentro da colaboración da institución
provincial coa Universidade, dixo, “é a Granxa Experimental de
Leite, na que temos un exemplo da robótica gandeira que abordan
estas xornadas”.
Así
mesmo, lembrou que a xunta de Goberno da Deputación aprobou o pasado
venres a adhesión da entidade ao proxecto Smart Agro: Territorios
rurais, agroalimentarios e intelixentes, unha iniciativa da que
forman parte outras 8 deputacións e máis de 30 empresas de toda
España co obxectivo de concorrer conxuntamente a fondos europeos co
fin de potenciar o sector primario a través da dixitalización e a
innovación. “A Deputación de Lugo”, destacou, convértese deste
xeito “na entidade de referencia no Norte de España” deste grupo
de traballo, pois o resto de institucións presentes son do sur e do
centro do país: Córdoba, Cáceres, Badaxoz, Cidade Real, Xaén,
Salamanca, Soria e Teruel.
“Apostar
polo sector primario é apostar polo futuro da provincia de Lugo. Un
futuro que pasa pola formación, pola investigación e pola
modernización constante. Un futuro que pasa por iniciativas coma
esta”, recalcou Pablo Rivera.
O
ciclo de conferencias Robótica agrícola e gandeira busca dar
a coñecer as novas tecnoloxías na agricultura e a gandería. Os
expertos tratarán durante as dúas xornadas o estado da robotización
agrícola e gandeira en España e as tendencias para os próximos
anos. Tamén se abordará a imaxe que esta robotización da
actividade agrícola está a ter na sociedade.